Hibru Dabeba Tolali Pas 4

Te Godigo we bidi augwali toma nabo po wai

1 Godigo dąų wali po megi me elalubao, tama agai tede te po wai, “Dage eno te toma nabo nigilali te tomoba piagameo.” Tama tibaso da wi me yao. Tiyu Godigo gedude dage tomode me deli te tų geda muyu, tama te toma nabo pesage tomoba pabo usu egobeo waidali weyu, dage dua dao. 2 Dago te Godigo bukude te toma nabo pesagede wiegi yai po pusali te odai, te Israel dabego polobadu odali po tiwai. Tiali goli augwaligo te po olo dali odolama, tama tede augwaligo homude te konealubo po dąų me wabeo. Tama tiyu, augwaligo te odali po, te pogo augwali tau me sabeo. 3 Da te Kraisde konealubo po dąų wabo we bidi, te da toma nabo pesage te tomoba paibao. Polobadu Godigo te pesageba pisąbo bagede po weyu te po wai,

“Ena sębę eyu, tama eno po hasegelidali weyu eno

mu po olama dąų wali, te po wai,

‘Augwali eno te toma nabo pesageba munu me

asogobeo. Munu me asogobeo. Mu menio,’ te po

wai.” [a]

Godigo te tigidali nai nigila silali sogo, te agai yabo sę me elalubeo. Tiali goli dago agai te tiwai po te aga toma nabo pesagede po wai odobaso, teda dago koneagameo, te toma nabo pesage me elalubao. 4 Tama te bukude asęani po me delide te bidigo te nogo a naga me badu si wali sogode te po wai,

“God aga tigidali nai nigila silama, tama te nogo a naga

olama me badu si wali sogo te aga toma neyu olo bidai.”[b]

5 Tama te gasa asęani pode me te toma nabo pesagede Godigo te po wai,

“Augwali te eno toma nabo pesageba munu me

asogobeo. Munu me asogobeo!” [c]

6 Tama te wiegi yai po te polobadu odali te we bidi, augwaligo te po mu po dao te homu isąyu tama te po sela sąwani, tama augwali da te toma nabo pesage tomoba pabeo. Tialima gasa we bidi augwali Godigo gedude te toma nomainogo yali te pesage tomoba pabo usu dao. 7 Te dago e tama koneani: Godigo bodolu me sogo deli ma muai dao. Agai te bodolu muani nogi yali “Te megi naga tama.” Hasia te Israel dabego agai po sela sąwani. Tiali goli nosali te kibu be hauwa pai madigi tama Godigo po te bidi Devitgo penanede ma pusali, te dago te tiwai po tamadi wai,

“Te megi e sogo tama dagego Godigo pedauwalide

po odali da, teda dagego duga olo munu me palia

sigio.” [d]

8 Te polobadu te tobolu bidi Josuago te Israel we bidi augwali te Godigo mawaibao wali toma nabo pesage tomoba selasa pigi sogo da, teda Godigo nosali te gasa sogode me da po wagi menio. [e] 9 Tiali goli dago koneani, te toma nabo sogo te me elalubao. Te Godigo tigidali nai nigila silama, tama aga toma nani sogo, te tiwai tama te toma nabo sogo asobo te Godigo we bidi augwali tonalubo dao. 10 Magi baso meni. Dago koneani, te Godigo te toma nomainogo nigilali pesage tomoba pabo bidi, te aga digi sę yali silama te toma nabo te tiwai ebao, te polobadu God aga digi sę silama, te toma neyu olo bidali tiwai gilama tebo dao. [f] 11 Tama tibaso, te toma nabo pesage tomoba painogo da te dago sę bomonama yao. Tiyu yaide te bidi me deligo te Godigo po sela sąbo kolesaga wali peyu, te Juda bage augwaligo polobadu yali sę tiwai yabuo, tama aga tula munama tama hagawaibao. Te tiwai idali weyu, dago bomonama Godigo po bugagia wali pao.

12 Magi baso meni. Te Godigo wali po te bidabo ula elalubao, tama aga te sę bomo idubao. Te mu poa pai, tama te si dali si badu poa pai hwą gego poai yali te aiyaba elaluai. Tama bidigo poa pai kago hwą gego hasa mi togoyu, tama te poa pai hwą ge polo te hasa dili tomoba tugi pelama, tama te dili hania pedalobo dao. Tama te tiwai me Godigo wali po dago homu tomoba peyu, tama dago homu ogwa wai dali dago mobo dali si pedebo dao. Tama agai wali pogo dago ebo homu dali dago homu kolesaga page dali si, te tigidali te agai osola subo dao. 13 Te Godigo nigali nai me deli te God agai gedude te geme dula sainogo ebo te usu munu me egobeo. Menio. Te tigidali nai te hania mu te Godigo gedude tigidali te elalubao. Tama Godigo naga te dago ebo kolesaga tigidali dagalabo bidi dao.

Te gesi dąų wabo sę kontrak yali bidi Jisas te dagalude polalubo pris bidi bidibao

(Dąį 4:14–10:38)

14 Te God aga te dago ebo kolesaga dagalabo bidi bidibaso, dago te Kraisde homugo konealubo po, te gasa we bidi dabebolo pusabo po, dago te pode dago homugo mu kęą pao. Magi baso meni, dago genuai pris tobolu bidi te bidibao, tama aga te dagaluba holama tama Godigo bidibo digi tomoba mu pai. Aga te bidi Jisas, te Godigo Ogwa dao. 15 Dago digi te sęgę aiyaba elaluabo bomo menio. Tiali goli dago genuai pris tobolu bidi aga tede da homu dene isąbo tiwai bidi da po wagobeo. Menio. Te daba usu siyu te pedalobo sęgę tigidali, te tigidali sęgę agaba me pedalama aga me usu sai. Tiali goli agai dwai sę munu me ebeo. 16 Tama dago te tobage genuai pris tobolu bidi elalubaso, da te dwagi yai homu eyu tama God pąba pao, te da wi me egimio. Aga da te olo tau siyu wiegi yai kolesaga mabo bidi dao. Tama da agaba peyu, tama agai da homu dene ebo homu eyu te da tau saibao. Tama dago sęgę elalubaso da, teda agai te olo tau sabo wiegi yai homu kolesaga ebogo te da tau saibao.

<- Hibru Dabeba Tolali Pas 3 Hibru Dabeba Tolali Pas 5 ->