1 Te Godigo dwagi yai po mobo Noabolo me, aga ogomani dabe dalibolo mayu, e tama po wali, “Te wai dabe hauwa mu ame nenama, te dagego hanigo te tigidali tǫ pedai pągąna sao. [a] 2 Te tigidali tǫde hasa sibi me, te ba dabe me, te dwasianu hasa sibi dabe me, te sųgų dabe, te augwali dagede wi mu yaibao. Eno te augwali dagego nogoba muyu, tama dagego te augwali tonaluaibao. 3 Dagego te tigidali haniani hasa sibi me te haniani tǫde bilalubo hasa, te dagego tuabo nai da, te usu yaibao. Polobadu eno te we bidi dabebolo te tǫde holobo nai, te nai walobo nosa me, te haniani du walobo nedu du wai dabe, te nai dabe eno tama mayu, tama dagego tuabo nai dao wali. Tama te tiwai gilama eno megi obao, te tigidali nai te dagego tuabo nai dao. 4 Tiali goli, te nai me deli da dagego me tugio, te kaneme hauwa me elalubo mi, magi baso meni, te kaneme da, te bidibo ula elalubo page te dao. [b] 5 Te bidi me deligo dage ela mubaso da, teda eno te bidi sula tagalogobeo, eno agabolo me wei ponaibao. Tama te hasa sibigo dage me elibaso da, teda aga me eno ela muaibao. Ma, bidigo gasa bidi ela mubaso da, teda agabolo eno wei ponaibao. 6 Te bidigo gasa bidi ela mubosi, aga digi te bidi dabego nogode isimainogo yaibao, magi baso meni, ena God eno bidi nigali, te ena noma bidi tiwai digi nigali. [c] 7 Megi da, dagego wai dabe hauwa ame nomainao, tama dagego wai dabe hani te hauwa mu pedelama, tama tigidali tǫ pedai badu pągąna sao,” Godigo te po wai. [d]

8 Tama Godigo Noa dali, me aga ogomanibolo dali po weyu, bomonama te po wai, 9 “Megi ena da, eno bomo yai po dage dali, me te dagego nosali ame neyu elalua pabo bulai wai dabe dali te dąų obao. 10 Tama eno te tigidali bidibo ula elalubo nai sibi dali me te bomo yai dwagi yai po dąų obao, te ba dabe me, te bidigo negebo hasa dabe me, tama te bulude bidalubo uni hasa sibi dabe me, tigidali te dage dali sip tomode bidaluai. 11 Eno dage dali e tama pogo dąų obao, eno po dąų mu weyu, te bidibo ula elalubo tigidali nai dabe te eno munu me ma te ąįgo me dologobeo. Tama wę asiyu, te e tǫ munu ma dologobeo,” Godigo te po wai.

12-13 Tama Godigo te po wali, “Eno te dagalude unigi bidi mubo, te eno dage dali, me te hasa sibi dali, sesemane sogo yali te dąį tiwai mubao. Te unigi bidi te eno tigidali tǫde bidi dali po dąų wali dąį dao, tama te dąų wali dwagi yai po munu me siligobeo. 14 Te eno dagalude te pǫ pedalumainogo ebo sogo da, teda te unigi bidi me pedelaibao. 15 Tama tiyu, eno te po dage dali, me te hasa sibi dabe dali, te dąų wali po eno homugo konealu, teda te tiwai wę asiyu, te bidibo ula elalubo tigidali nai dabe me dologobeo. 16 Te eno te unigi bidi te dagalude pedalubo subo sogo da, teda eno te elalua pabo gamonabo dąų wali po sesemane sogo kone palu, te megi eno te tigidali tǫde bidibo ula elalubo nai dabe dali me tiaibao.” 17 Tama Godigo po weyu, Noabolo te po wali, “Te e unigi bidi da, te eno dąų wabo dwagi yai po te tǫde bidibo ula elalubo tigidali nai dabe dali dąį ilibao,” te po wai.

18 Te e da Noago ogwa sela te sip tagalama dulali ogwa sela nogi dao, Siem, me Ham, me Jafet dao. Tama Ham te Kenango aya dao. 19 Te bidi Noago te ogwa dabe da, augwali te tǫde bidalubo tigidali bidi sibigo wąį monu dabe te augwali dao.

20 Noa aga te gi sę ebo bidi bidai, tama aga te bono du ąį wain gi bulali. 21 Tama nosali me sogo deli sogode agai te wain bomai ąį meba tulama, te aga tobolu gęǫ eyu, aga esela pai. Tama eyu, aga ugwa dabe pepeda pelama, tama aga bolu olo te aga ugwa be tomode pila muani. 22 Tama Ham, te Kenango aya, agai te aga aya bolu olo pila mubadi sulama, tama aga pelama, aga ama sibolo wagi pai. 23 Tialima, Siem de Jafet sigo te ugwa selama, te augwa si nageba muani. Tama augwali si te ugwa be tomoba tudibadu naga pelama, tama augwa si aya te ugwago haluali. Te augwali sigo gesabi begelama, te augwa si aya bolu olo pila mubo subeo.

24 Tama nosali Noa aga hodaluama, tama aga homu kolesaga ma peda pabode, agai odali, te sabi bidi ogwago te agade yali po odai. 25 Tama agai te po wali, “Genuai sęgę te Kenande ugwadu elaluaibao. Te aga hani dabe te aga ama dedego hani dabego nogi meni yai sę ebo olo gagalama, bidaibao,” wali. 26 Tama Noago te tiwai po me wali, “Dago te Yawego nogi ugwaba sinao, te Siemgo God da. Kenan da, te Siemgo olo sę ebo bidi elaluaibao. 27 Eno homugo Godigo Jafetgo wai puluba dabe te hauwa pedalumainu ilaibao, tama augwali te Siemgo hani dabe dali bugagia bidalumainu yaibao. Tama Kenan da, te Jafetde te olo sę ebo bidi elaluaibao,” te po wai.

28 Te genuai wę asali sila madi, tama Noa te kibu be hauwa 350 mu ma bidai dao. 29 Tama e tǫde bidali sogo te umabo kibu be 950 bidama, tama aga isai dao.

<- Tigidali Nai Gagalama Nigali Side 8Tigidali Nai Gagalama Nigali Side 10 ->