Tigidali Nai Gagalama Nigali Side 30

1 Te Reselgo wai me ame nisąbadi te sogo, agai te aga ama Lea dali haliga sębę elama, tama Jekopbolo te po wai, “Nago enabolo wai mao. Te menisiąyu da, teda ena isaibao,” wali.

2 Jekopgo wado po Resel dali weyu, te po wai, “Eno te Godigo yali sę hasegelibo usu me iligobeo. Aga digi te nago tabi paliama, tama nago te wai me ame nabe dao,” wali.

3 Tialima, Reselgo te po wai, “Nago te eno sę ebo we Bilha sao. Nago aga dali pilama, tama agai eno wai ame nomainu yaibao. Tama ena te wai dabego ida pedalaibao,” wali. 4 Tialima, Reselgo te aga sę ebo we Bilha te Jekopbolo tagala palama, tama Jekop aga dali piali. 5 Tama Bilha tabi elama, tama Jekopgo ogwa me deli ame nani. 6 Tama Reselgo te po wai, “Godigo ena dagala sulama, tama agai eno gedu haluasa po wabo odama, tama agai ogwa wai me deli enabolo manio,” wali. Tialima, Reselgo te wai nogi Dan poai. [a] 7 Tama Bilha te Reselgo sę ebo we te aga tabi ma elama, tama Jekopgo ogwa tomo bidi ame nani. 8 Tama Reselgo te po wai, “Eno te ena ama dali bomonama mu hwįanigo tama megi eno nogi ugwa sali.” Tama agai te wai nogi Naptali poai. [b]

9 Leago suali, agai te wai ma ame nabo homu isąbaso, tama agai aga sę ebo we Silpa te Jekopbolo mawai. Tama Silpa te Jekopgo we tiwai pedelai. 10 Nosali Silpago te Jekopgo ogwa me deli ame nai. 11 Tama Leago te po wai, “Ena nogi ugwaba mu igulalio.” Tama tibaso, agai te wai nogi te Gat poali. [c] 12 Tama nosali Silpa, te Leago sę ebo wego, te Jekopgo tomo ogwa ame nani. 13 Tama Leago te po wai, “Megi ena wiegi yai homu pemene mu yali, tama tigidali we dabe sibigo enabolo te po weyu, te eno homu pemene wiegi yai mu ebo da po wai dao,” wali. Tama agai te ogwa nogi Aser poai. [d] 14 Tialima, te tubo nai wit togobo sogo pedalubode, tama te ogwa Ruben te wit togobo madiba pelama, tama agai te wego wai sainu tau sabo nai te dwasianu nide sai. Tama agai te aga ida Leabolo sela asali. Tama Reselgo te naide koneama, tama Leabolo te po wali, “Nago te wai sainu tau sabo nai meba te enabolo mao,” wali.

15 Tiali goli, Leago po wei ponoyu, te po wai, “Nago eno bidi sai dao, tama nago te olo nai da te homu ebawe? Tama megi nago te eno ogwago sali nai nago godoloyu sainogo obawe?” wali.

Tama Reselgo te po wai, “Te nago ogwago gegali nai te ena mobaso da, teda nage Jekop dali megi hulide piagameo,” Reselgo te po wai. 16 Te pio Jekop te giba pali beba ma asobadi, tama Lea te sunumidu aga tiąba pelama, tama te po wai, “Nage megi hulide ena dali piagameo, magi baso meni, te eno ogwago gegali naigo nage abelalio.” Tialima, te sogo hulide Jekop aga dali piali. 17 Tama Godigo te Leago gedu haluasa po wabo odama, tama Lea tabi yai. Tama agai wai te a naga wabo ame nani. 18 Tama Leago te po wali, “Eno sę ebo we te ena bidibolo menama, tama Godigo dwagi yai sęgo ena abelali.” Tama agai te wai nogi Isakar poai. [e] 19 Nosali Lea aga tabi ma elama, tama agai wai te nogo a naga olama, me badu deli wabo wai ame nai. 20 Tama agai te po wai, “Godigo te dwagi yai sę me deli enabolo yai. Megi da, te ena bidigo te ena godolo mu yaibao, magi baso meni, eno agai wai te nogo a naga, me badu deli, te tama wai eno ame nani,” wali. Tama agai te wai nogi Sebulun poali. [f] 21 Tama nosali Leago wegi me deli digi ame nani, tama agai te aga nogi Daina poai.

22 Tama Godigo Resel homu kone ma palalio. Tama agai Reselgo gedu haluasa po wabo odama, tama aga te wai ame nomainu ilalio. 23 Tama Resel aga tabi elama, tama ogwa me deli ame nai. Tama agai te po wai, “Godigo eno hale elaluali te dagala sąwai. 24 Eno homugo te Yawego te gasa wai enabolo momainu homu ebao,” olama, tama agai aga nogi Josep poai. [g]

Jekopgo te Laban dali bisnis sę yabo po dodolali

25-26 Reselgo te Josep ame nai digi, tama Jekopgo Labanbolo te po walali, “Eno te we dabe dali, te wai dabe dali abelibo sę dene ela silalio. Tialima, megi ena tagala palama, tama ena te ena buluba ma paio,” wali. “Nago koneani, eno nagede bugagia mu sę yalio,” wali.

27 Labango Jekopbolo te po wali, “Odao! Eno nage dali po elalubao. Eno te enade pedelali sęde konea selama, tama megi da, eno konebao, te Yawego wiegi yai sę enabolo yali, magi baso meni, te nage ena dali bidibo dao. 28 Nago te nisu naga nai sabo homu ebaso, te nago dolo enabolo wao. Tama eno te nai nagebolo mawaibao,” wali.

29 Tama Jekopgo agabolo te po wali, “Naga digi nago te eno yali sę nago koneani. Tama nago koneani, eno nago kibu sipsip hani te bugagia tonaluai. 30 Polobadu te nago sipsip hauwa meni yai, te dwasianu hani elaluali. Tama megi te ena nage dali bidiyu, tama nago sipsip kibu dabe geninama, hauwa pedelali, magi baso meni, te nago ena haniani sęba muani goli, te Yawego wiegi yai sę nagebolo yali. Tiali goli, te eno ena hani bage tau sabo sę nisu egowe?”

31 Labango hanalu wali, “Te eno nage magi naigo abelagawe?”

Tama Jekopgo te po wali, “Eno te mone po olama, i me wabeo. Te nago eno po wabo godolo ebaso da, teda nago sipsip hani dabe te eno ma tonaluaibao. 32 Megi da, te eno nago sipsip me meme dabe bugagia osola sueibao. Tama eno te tigidali husugu yai sipsip wai, me te tigidali meme dali, tigidali sipsip te husugu yai elalubo, me te dodobolo pai bage, teda eno sa muaibao. Te dabe da te eno saibao, te eno sę ebode sabo nai dao. 33 Tama eyu bidaluama, nosali nago osola sulama, te eno doloba pai kolesaga yali, ma nago suagameo. Te nago eno ena maiabo nai dodolobo sogo, tama te meme me deli, ma te sipsip me deli te dodobolo pai ma husugu yai elalusiąbaso da, teda nago koneyu, te eno wi sali da po wagameo,” wali.

34 Tama Labango te po wali, “Te wiegi yai dao! Dago te nago wabo po gilama tiwai yaibao,” wali. 35 Tiali goli, te sogo digi Labango digi te tigidali meme omai me, te tigidali meme so me, te dodobolo pai naga salio. Tama agai te husugu yai sipsip wai tigidali sali. Tialima, aga ogwa dabego te sipsip me meme dabe tonalumainu tedali muani. 36 Tama polo Labango Jekop taga soyu, tama aga dodobolo pai sipsip me meme dabe dali sela sogo tomoba pigi solama, tama augwali gasa pedai me badu bidai. Tama Jekopgo te Labango gasa hani dodobolo pisąwai sipsip me meme hani naga tonaluai.

37 Tama nosali Jekopgo te gesi ni nologo haniani selama, tama agai augwali husugu yai tigi wali me badu dagalama, tama te me badu tedela yai ilali. 38 Agai te tiwai dodobolo pai ni nologo tigidali te sipsip hani dabe augwali gesabidide te wę tubo pesagede dodolali. Agai koneani, te sipsip dabe me meme dabe augwali te wę tuagasobo sogo, te sipsip omai me te meme omai augwaligo te kibu so dabe penani yaibao, te homu yali. 39 Tama te meme omai dabego te ni nologo dabe sulama, tama penani emainu yali, tama nosali te so kibu dabego te ame nabo wai te dodobolo pai dabe ame nomainu yalio. 40 Tama Jekopgo te dodobolo pai sipsip wai hani tigidali te gasaba tedali muani. Tama agai te Labango tedela yai sipsip omai dabe te so dabe me selama, tama augwaligo Jekopgo dodobolo pai sipsip tonalubadi augwaligo penani yali. Agai te tiwai tama tilama, te aga digi sipsip me meme dabe pedalumainu ilali, tama agai te Labango sipsip me meme dabe dali deliba me sisinibeo. 41 Tama te wiegi yai bomai sipsip me meme dabe penani ebaso da, teda Jekopgo te ni nologo dabe te wę tubo madi te augwali gesabidide muani, tama augwaligo te ni nologo dabe sulama, tama penani yai. 42 Tiali goli, agai te bomo meni yai sipsip me meme dabe augwali gesabidide te ni nologo dabe me mubeo. Tama tibaso, te sipsip me meme dabe te bomo meni yai dabe augwali te Labango da, tama te wiegi yai, te boma pai, te dabe te Jekopgo sali.

43 Tama tibaso, Jekopgo doado bage geninama, umabo mu elaluali. Agai te sipsip me meme hani genuai mu elaluali, tama sę ebo bidi me sę ebo we hauwa bidai, tama te kibu kamel dabe me donki dabe hauwa bidaluali.

<- Tigidali Nai Gagalama Nigali Side 29 Tigidali Nai Gagalama Nigali Side 31 ->