1 Gasa sogo te nasi ebo si te buluba pedelali, te polobadu Abraham bidali sogo pedelali nasi tiwai ma pedelali. Tialima, Aisak te Filistia dabego tuni bidi Abimelek bidibo bulu te Gerarba pali. 2 Yawe te Aisakba pedelama, tama agabolo te tiwai po wai, “Nage te Isipba munu me pelamuo. Nage te eno nagebolo bida wabo bulude bidagameo,” wai. 3 “Nage te bulude bolo bidao, tama ena nage dali bidiyu, tama dwagi yai tau sabo sę nage dali yaibao. Te e elalubo tǫ pedai tigidali te eno nagebolo mayu, te nago hani wąį dabe augwalibolo me mawaibao wai. Tama eno te nago aya Abraham dali dąų wali po te eno homude me gegeda palogobeo. 4 Te nago wąį hani augwali te umabo mu pedalumainu yaibao, te dagalude elalubo hǫ dabe tiwai gilama yaibao. Tama eno e tǫ pedai te tigidali eno augwalibolo mawaibao. Tama te tǫde tigidali bidi dabego te augwali da dali dwagi yai sę yao wabo po enabolo hanalu, te eno nago hani wąį dabe dwagi yai sę yali tiwai gilama yao po waibao. *Gag 22:16-18 5 Abrahamgo eno haniani te kolesaga yao po odama, tama agai eno bomai po tigidali wali pai. Tama tibaso, eno nage dali dwagi yai sę yaibao,” Yawego te po wai. 6 Tialima, Aisak te bulu Gerar tede bididualio.

7 Tama te bulu bidi dabego te aga we po agabolo hanalubo sogo agai te tiwai po wali, “Aga te ena abe dao.” Aga wi ebaso, tama agai te po me wabe, “Aga te eno we da,” wabeo. Aisak wi elama, tama tiwai homu yali tiyu, te bidi dabego Rebeka sainu te aga ela muidali homu yali. Magi baso meni, Rebeka te gasagi yai sawi yai we bidai. *Gag 12:13; 20:2

8 Aisak te badu bidali sogo sesabi gana elama bidai, tama te Filistia tǫ tonalubo tuni bidi Abimelek te be tomodu te winduadu tonobadi dolaluyu, tama agai suali, Aisak aga we Rebeka tigiba nono tubo sę ebo suai. 9 Tialima, Abimelekgo Aisak i olama, agabolo te po wai, “Odao. Te nago we dao! Tiali goli, magi baso nago te naga abe da po waliwe?”

Tama Aisakgo te po wei ponoyu, te po wali, “Eno e tama tiwai homu yai, ‘Te eno po weyu, te ena we da po obaso da, teda augwaligo ena ela mugowe?’ te homu yai dao.”

10 Tialima, Abimelekgo te po ma wai, “Magi baso nago da dolainogo yaliwe? Suao, te eno hani bidi hauwa te elalubao, te dua digi mu te bidi me deli nago we dali olo pigi pigi dao. Te bidi me deligo tama tigi sogo da, te naga digi te dwai sęgę daba pedelabo page yalio,” wali.

11 Tama tibaso, nosali Abimelekgo te e tiwai po bomo elama, te tigidali bidi dabebolo walio, “Te bidi me deligo dwai sę te e bidi dali, ma we dali me ebaso da, teda te bidi aga mu isimainao.”

12 Aisakgo te tǫde nai wai dabe bulama, tama te kibu bede nai umabo mu pedelama, tama agai nai te hauwa sogo mu bulu dali tiwai gilama yali. Yawego aga tau siyu, tama dwagi yai sę aga dali yai, 13 tama agai nai hauwa mu sidu geani, tama aga genuai bidi mu pedelai. 14 Agai kibu sipsip me, bulmakau me, sę ebo bidi me hauwa mu elalubaso, tama te Filistia bidi dabego te sulama, tama augwali pesą yali. 15 Te Abraham tede bidali sogo, agai sę bidi dabe augwaligo te wę ulu dabe nigali. Megi te Filistia dabe augwaligo te Aisak dali dwai homu ebaso, augwaligo te tǫde ulu wę pedalubo te ma dąų olama, te tǫgo ma paliali.

16 Tama nosali Abimelekgo Aisakbolo te tiwai po wai, “Nago da taga peyu, pao. Megi nage bomo mu ebao. Da nage dali usu me egobeo,” wali.

17 Tialima, Aisak tede bidali taga peyu, tama aga pelama, te bidabo pesage me deli te bulu du si elalubo madi tomode, te tǫ me badu tede bidali, te odogo tǫ nogi te augwaligo Gerar poai. 18 Abrahamgo te wę ulu tǫde meba polobadu nigai. Tiali goli, te aga isali sogo te Filistia bidi dabego te wę ulu dabe paliali. Tama Aisakgo te wę ulu dabe ma dalama, tama aga ayago polobadu deli delibolo poali nogi tiwai ma poalio.

19 Te Aisakgo sę bidi dabe augwaligo te bulude tǫ diganama, tama te wę ulu me deli nigainu te augwaligo dwasianu wę ulu tǫde pedalubo gegalio. 20 Tiali goli, te Gerar tede te kibu bulmakau tonalubo bidi dabego te Aisakgo kibu tonalubo sę ebo bidi dabe dali wado po weyu, te po wai, “Te e wę dago wę dao,” po wai. Tama Aisakgo te wę ulu nogi e tiwai nogi poai “Wado po wai.” Magi baso meni, te bidi dabego wado po tede wai. 21 Tama Aisakgo sę bidi dabego gasa wę me ma nigali, tama tede me augwaligo wado po wai. Tialima, Aisakgo te wę ulu nogi e tiwai nogi poai “Genuai wado po wai.” 22 Agai te pedai badu tagalama, te aga gasa badu me te wę ulu ma nigai. Tiali goli, te sę ebo bidigo tede te wado po me wabeo. Tialima, Aisakgo te e tiwai nogi poali “Te pesagede po ma wasiąwai,” tama agai te po wali, “Megi da, Yawego da e tǫde te genuai bidabo pesage mayu, tama te da bugagia homu nagame elama bidimainu yalio. Tama dago te bulude doado bage hauwa elaluaibao,” te po wai.

23 Aisak aga tede bidali taga peyu, te aga te Berseba teba sabolali. 24 Te sogo hulide Yawe te agaba pedelama, tama te po wai, “Ena naga aya Abrahamgo God dao. Nage wi me elamuo. Ena nage dali bidibao. Te eno nage tau siyu, nage dali dwagi yai sę elama, tama nago wąįgo wai dabe hauwa pedalumainu yaibao, magi baso meni, eno te ena sę bidi Abraham godolo mu yali dao, tama aga tobade eno tama tiaibao,” wali.

25 Aisakgo te ofa maiabo alta me deli te bulude dodolama, tama agai Yawebolo lotu wai. Nosali agai te bidabo pesage tede nigilama, tama aga sę bidi dabego tede tǫ diganama, tama te wę ulu me deli nigali.

26 Abimelek te aga bulu Gerar taga soyu, asama, Aisak suagasali. Ahusat, te bidigo Abimelekbolo te wiegi yai homu kolesaga mabo bidi, me Fikol, aga te aga ami bidi dabe tonalubo polalubo bidi, augwali si te Abimelek dali asai. *Gag 21:22 27 Tialima, Aisakgo augwalibolo hanalu wali, “Polobadu dagego ena dali wado po olama, tama ena dagego bulude bidibadi gudulai. Tama magi baso megi da, duga digi dage ena bidibo digi asaliwe?” wali.

28 Tama augwaligo te tiwai po wei ponani, “Megi dago koneani, te Yawe nage dali bidibao. Tama dago homugo te dago dage dali te mu po naga dao weyu, te boi homu ebo silabo po me deli dąų waibao. Dago nagebolo dwai sę me ilibeo. Tama dago homugo te nago bomo yai po dąų weyu, 29 te nago da me dolamu dao. Dago wiegi yai kolesaga nagebolo yali, te nago dago bulu taga soali sogo te dago nage dali me hwįbeo, te nage homu nagame dali dua digi soai dao. Magi baso meni, te hania pedelalio, te Yawego te dwagi yai sę te megi nage dali ebo dao.” Augwaligo te po wali.

30 Aisakgo te augwali nai genuai me ulama, tama augwali nai me wę tuai. 31 Te kigamu digi mu augwali hogodaluama, tama augwali dali, Aisak dali, augwaligo augwa nogo guni sisu muyu, augwa hasi e tiwai po dąų wali, “Te dago dage dali sesemane sogo te wiegi yai homu deli naga elama, bidaibao.” Aisakgo augwaliba dage tao olama, tama augwali nogo menama, tama augwali pali.

32 Te sogo digi te Aisakgo sę bidi dabe sabolama, tama augwaligo agabolo te augwaligo wę ulu nigali po wagasai. Augwaligo te po wai, “Dago wę gegalio.” 33 Tialima, Aisakgo te wę ulu nogi Seba nogi poai. Tama megi tebode augwaligo te hanu nogi Berseba wabo dao. *Te Hibru pogo te nogi Seba te page si elalubao, me page te “mu po naga dao weyu, tama po dąų walali,” me page te “nogo a naga olama, me badu nogo si” wabo. Te nogi Berseba me te page si elalubao, te “wę ulude augwaligo te mu po naga dao po weyu tama po dąų walali,” ma te “wę ulu nogo a naga olama me badu nogo si wabo.”

34 Iso aga kibu be te bidi sese si olama, 40 wabode, tama agai te we Judit sali, te Berigo wegi, te Hit bidi hani me deli da. Isogo te Basemat te we me sali, te Elongo wegi, te me Hit hani bidi me deli dao. 35 Aisak de Rebeka si te we sigo ebo kolesaga hagela homu eyu, tama haliga dene mu iduai.

<- Tigidali Nai Gagalama Nigali Side 25Tigidali Nai Gagalama Nigali Side 27 ->