4
Te Kraisgo yali sęde da olo mu sę ebo bidi bidali tagalama, te Godigo wai puluba pedelali po wali
1 Te Krais aga asisąbadi, te bomo yai pogo da tonaluai dao. Tama eno po meba te pode elalubao. E tǫde dago kolesaga e tiwai elalubo dao. Ogwa me deli aga aya ida si isibaso, nosali agai aga ayago elaluali nai mu saibao. 2 Tiali goli aga dwasianu ogwa bididubadi, aga te nogi meni yai bidi tiwai bidiyu, aga ayago amago aga tonaluaibao. Te ogwa te bidi dologode bidibo dao, te aga ayago doado bage sabo sogo tonalubo dao. 3 Tama te tiwai polobadu dago bugagia konesiąbadi, da e tǫde dwai olo kolesaga ebo dologode bidai dao. 4 Tialima, te Godigo bodolu mani sabolobo side, agai aga ogwa e tǫba tagala palai. Tagala palama, tama e tǫde wego aga ame nai, tama aga e tǫde bidibadi aga te Juda dabego bomo yai po dologode bididubadi yai. 5 Tama tiyu, agai da tǫde bidi bomo yai po dologode bidibadi abelai dao, da Godigo wai puluba pedalama bidimainogo yai. 6 Tama dage agai wai puluba bidibaso, God agai Ogwago Mobo Bidi dago homuba tagala palama, tama dago i weyu, te po agabolo wabo da, “Aya, Aya.” 7 Tama tibaso, megi dage deli deli te olo sę ebo bidi tiwai ma bidigobeo. Menio. Dage agai ogwa dabe bidibao. Tama agai aga ogwabolo maiabo nai dagebolo mawaibao, te agai te we bidi ma dobola sabo kolesaga agai dage dali yaibao.
Pol agai Galesia hani dali moni homu ebo dao
8 Te polobadu dagego God konesiąbadi, tama dage e tǫde dwai haubo noma bidi dabe dologode bidai dao, dage augwaligo olo sę ebo bidi tiwai bidai dao. Tama te god mu menio, te augwali tibo god dao.
9 Tiali goli, megi dagego God koneai dao. Woo, meo, te po dwasianu usube. Te e tiwai dao, megi Godigo dage aga dali wadolai. Tama megi dagego God mu koneai digi, magi baso te tǫde dwai olo kolesaga ebo dologoba ma geasa peyu, tama dage te kolesagade kalabus sęde ma bidibo tiwai ebawe? Augwaligo dage tau sabo usu egobeo, bomo elalubeo.
10 Tama tiyu, sesemane sogo dagego te genuai si bidibode me, te gesi polua pedalubode me, te genuai lotu po wabo sogode me, te gesi kibu be gagalobode, te dagego suyu, dagego homu te naide dąų wabo dao. Dagego homu ‘Dago te sę ebode Godigo da ma saibao’ geda muyu te homu ebo dao.
11 Dagede homu sęgę eyu, tama eno moni homu ebao. Te eno dage dali yali sę te olo elama, tama tagalobowe te homu eyu, eno dagede homu si ebo dao.
12 Eno ama dedeo, dagede eno homu dene eyu, tama bomonama eno dagebolo e po obao. Polobadu ena te da Juda dabego wąįgo yali kolesaga dologode bidibadi, tama dage te tiwai bidibe. Tama dage tau sainogo eno te eno wąį dabego kolesaga dologode bidali tagalama, tama dage tiwai bidali. Tama megi dage te Juda dabego wąįgo kolesaga tomoba pidali weyu, eno dagebolo te po obao, dage ena tiwai olo mu bidao. Ena hasia dage pageba asali sogo dagego ena dali magi dwai sę me yai menio. 13 Dagego koneani, te sogo eno tigi gasi selama, bomo meni yai. Tama te sogo hasia eno te Godigo dwagi yai po dagebolo pusai dao. 14 Tama eno gasi ebadi, dagego ena geseyu, bugagia tonaluai dao. Te sęde dage dene sai dao. Tama tiali goli ena tudiba muyu, tama dagego ena hagela ebo po me wai menio. Te tiwai menio. Tama Godigo ensel bidi me deli aga dage pageba asiyu da, tama dagego aga bugagia gesaibao. Ma, Krais Jisas aga digi aga dage pageba asiyu da, tama dagego aga bugagia gesaibao. Tama te tiwai ena dage pageba asali sogo dwagi yai homu mu eyu, dagego ena bugagia gesai dao. 15 Tama dagego te gesebo sę ebadi dagego ena dali te dwagi yai homu yali. Te homu megi mena tama elalubowe? Dage te homu gegeda paliwe? Eno mu po tama dagego te dwagi yai kolesaga yali haniliyu te po obao. Tama tebo sogode dagego te homu yai, ‘Dago Pol tau siyu, dago dena gedu ge gudama, agabolo magi sogo da, teda usu egi dao,’ dagego te homu yai. 16 Tiali goli dage megi magi yaliwe? Megi eno mu po dage dali obaso, tama dagego ‘Woo, megi Pol agai da dali boi bidi homu ebao,’ dagego te homu enade ebawe?
17 Te gasa bidi dabe meba augwali dage pageba nosali asiyu, tama augwaligo dagebolo homu bega sabo po bomo elama wabo dao. Tiali goli augwaligo dage homu bega sabo po wabo te dwalio. Te dwagi yai po menio. Augwaligo dage ena dali tomode togolama, dage augwaligo po wali pomainogo bomo ebo dao. Tama dagego augwaligo nogi ugwaba somainogo tama tebo dao. 18 Tama bidigo te homu bega sabo po te pode te wiegi yai po obaso da, teda te po usu dao. Tama sesemane sogo da te wiegi yai homu bega sabo po naga wao. Tama te sogo da hodobo bidisiąyu da, tialima dagego te tebo homu kolesaga me tagalamu dao. 19 Eno wai puluba, polobadu dagego homu kolesaga Kraisde dąų wasiąbadi, te sogo dagede ena moni homu eyu dene sai dao. Tama te tiwai megi me ena te dene ma sabo dao. Te wego wai ame nainogo dene ebo tiwai, dene megi eno ebo dao. Tama ena te dene sesa pidubadi tama dagego homu kolesaga te Kraisgo homu kolesaga tiwai ebo side te eno homu wiegi yai eyu usu yaibao. 20 Tama megi moni homu eyu, eno homugo dage pageba asabo homu ebo dao. Tama ena dage dali bidiyu da, teda eno po dua dage dali wagi da. Tiali goli ena dage dali meni baso, eno dagede moni homu eyu, tama eno dagebolo te po bomo elama obao.
Te we Hagarde Sara side po digi po begelama wai
21 Te dage Galesia dabe mebago ‘Godigo da doloba pai bidi dabe da waibao’ homu eyu, tama dage te Juda dabego bomo yai po dologoba painogo homu ebo dao. Tama tibaso da, te po eno megi dagebolo hanalu obao, dagego te bomo yai po page bugagia odobo dawe?
22 Tama te bomo yai po tomode po me deli e tama wai dao, te bidi Abraham polobadu mu bidai, te Juda hanigo agai wąį, te bidi Abraham agai wai ogwa si elaluai. Tama te ogwa mego ida te Abrahamgo aga we mu bidai, te we nogi Sara dao. Tama gasa ogwa aga ida, te we da te Sara aga sę ebo we nogi Hagar dao.
* 23 Tama Abraham aga te we Hagar dali bidibaso, te wego aga ogwa nosali ame nani. Te ogwa ame nabo te tǫde we bidi dabego ebo kolesagade bidiyu ebo kolesaga tiwaigo te sę elama te ogwa ame nani. Te polobadu pedalisiąbo kolesagade isiąbo tiwai yai meni. Tiali goli aga wai ame nesiąbo mosi we mu Sara, te wede Godigo aga dąų wali po wali pobaso, Sarago te ogwa ame nani. Tama tiyu, te we bidi noma sabo sę tama pedalali.
24 Tama te we si augwalide te po digi po begelama tama wali po page e tiwai elalubao. Te we si da, te dąų walali kontrak po si dao. Te dąų walali kontrak po me deli te bulu du nogi Sainai tedu asali, tama te dąų walali kontrak po te Godigo Mosesbolo mani bomo yai po dao. Tama te bomo yai po dologode bidibo we bidi augwali da te kontrak pogo wai puluba tiwai dao. Tama dago po digi po begelama, tama te bomo yai po kontrak po te we nogi Hagar dao.
25 Tama Hagar da, te Arebia tǫde elalubo bulu du nogi Sainai dao. Tama gasa piksa mede, te we Hagar te megi elalubo hanu Jerusalem tiwai dao, te hanude bidibo we bidi augwali te bomo yai po dologode dąų weyu bidibo dao.
26 Ao, tiali goli megi eno te gesi hanu me Jerusalem tede po digi po begelama obao, te hanu aga dagalude megi tonalubo dao. Te gesi hanu Jerusalem te gasa we dao, te we nogi Sara dao. Aga te olo sę ebo we menio. Tama da te Godigo mani gesi kontrak po dologode olo bugagia bidibo, tama te we Sara aga te dago ida tiwai bidibo dao.
27 Tama te Godigo da dali dąų walali gesi kontrak po, te gesi pogo te polobadu mani bomo yai po kontrak po aiyaba elalubao. Eno tede tamadi wali po digi po tiwai po meba te bidi me deligo Godigo bukude tama po polobadu asęai,
“Tama nage dwai haliga tabi elalubo we, tama nago
wai ame nabo usu isiąwai, tama nage wai ame nabo
dene ebe, tama naga digi nago homu wiegi yai
hauwa elama, tama i bomonama ola bilao. Nago
bidi aga nage osogo taga pai goli, tama nosali nago
wai puluba hauwa ame naibao, te aga bidi dali
bidali wego wai puluba namba aiyaba elaluaibao,”
te po asęani.
*28 Eno ama dedeo, dage te bidi Aisak tiwai dao. Godigo te we Sarabolo dąų wali po mobaso, tama nosali te ogwa Aisak ame nani. Tama dagede me Godigo agai dąų wali po wali pelama, tama agai dage ma dobola sai dao. 29 Tama te Abraham tǫde bidali sogo te we Hagar aga ogwago te Sarago ogwa dali boi bidi homu eyu bidali. Awe, te tǫde kolesagade ame mani ogwa agai te Godigo Mobo Bidigo bomogo ame nani ogwa dali dwai homu eyu dene mani. Tama megi e sogo me te tǫde kolesaga wali pabo bage augwaligo te Kraisgo po wali pabo we bidi dali boi bidi homu ebo dao. * 30 Tiali goli, te bukude wali Godigo po te magi po elalubowe? Augwaligo te po e tama asęai:
“Te olo sę ebo we dali aga ogwa dali si megi sela
sąyao. Te olo sę ebo wego ogwa agai te aga ayago
doado bage meba nosali sogobeo. Te olo bidibo
wego ogwa naga, aga aya isibo si, agai aga ayago
