1 God Genuai Bidigo po geninama ma weyu, e tama po wali. “Tǫde bidi, nago eno po te Gokbolo pusao Tama agabolo e tama po walao, ‘King Gok, nage te kantri Mesek me Tubal bidi dabego polalubo king dao, tama eno nage dali boi bidi homu ebao. 2 Te eno nage begelama, tama nago edaba te sautba begelaibao, tama eno nage kegaibao. Tama eno nage naga kantri u not badu mu tagalamainu elama, tama nage eno te Israel dabego bulu du buluba odasa aselama, tama nago Israel dabe dali hwįmainu ilaibao. 3 Tama eno nago enesigi te pobase nogo badu tuali te nogoba eno elama, tama te enesigi tulalueibao. Tama eno nago dolo nogo badu tuali ene dabeba elebo si, te ene dabe me tulalueibao. 4-5 Tama nage me, nage dali asali ami dabe, te haniani kantridu nage dali asali bage me, dage sese tama te Israel dabego bulude bulu dude isaibao. Tama dagego tigi dabe te pepeli dili tǫde olo munalua paibao. Tama te ba kemodage dabe, me bulu hasa dabego dagego tigi dabe tuagasaibao. Te da God Genuai Bidi eno po dao.’ Te po king Godbolo pusao,” wali.

6 “E po me agabolo pusao. ‘Tama eno isi te tǫ Magok bulude pedalumainu ilaibao, me te tamu ąį pąde dua bidibo we bidi tigiba me te isi pedalumainu yaibao. Tama te hani augwaligo te tama bugagia koneaibao, ena deli ena Genuai Bidi dao homu yaibao. 7 Te sę dabe eno ena we bidi Israel dabe dali yainogo ebo te sę dabe da, te augwaligo gasa we bidi hanigo eno wiegi yai nogi konemainu ola mawaibao. Tama augwaligo eno genuai nogi munu me aiyaba elalugobeo. Tama augwaligo e tama bugagia koneaibao, ena deli ena Genuai Bidi, tama ena te Israel dabe dali bidiba homu yaibao. Tama ena te tedali gasagi yai da, te eno kolesaga te wiegi yai doloba pai mu dao, augwaligo te homu yaibao.’ Te po me pusao,” wali.

8 “ ‘Ena God Genuai Bidi, eno te po obao. Mu tamao, te sogo mu pedalaibao. Tama eno wali sę dabe sese tama eno te sogo yaibao. 9 Tama te Israel we bidi dabe augwaligo augwa taun dabe tagalama, tama augwaligo te boi bidi dabego hwįbo nai dabe tǫde subigila tagalai wilalua pabo nai dabe sigi paibao. Te augwaligo te sabele dabe me te awa dabe siyu, me enesigi siyu, me ene dabe siyu, me hwįbo wąbi dage dabe siyu, me te bobobage sesemone dabe siyu yaibao. Tama augwaligo te nai dabe sisinama, tama augwaligo te isi pulu dabe ulubo tiwai yaibao. Tama tiyu, augwaligo ulabo isi te kibu be nogo a naga olama, me badu nogo si, te 7 kibu bede nogabo isi usu elaluaibao, 10 tama te kibu be a naga olama, me badu nogo si te kibu bede augwaligo buside o kala sili bulude isi gegebo sę meni yaibao. Menio. Te augwaligo te hwįbo nai dabe naga augwaligo isi ulubo sę eyu yaibao. Tama te kolesagago da, te Israel dabe augwaligo augwa boi bidi dabe augwaligo dwai kolesaga wei ponaibao. Te boi bidi dabego Israel dabe doado bage dabe wi sai, tama megi da, te Israel dabego te boi bidi dabego nai dabe saibao. Te da, God Genuai Bidi eno po dao,’ nago te po te bidi Gokbolo pusao,” wali.

11 “Ena Genuai Bidi eno po genina ma weyu, e po obao. ‘Te sę dabe tigidali pedalobo sogo da, teda eno te kantri Israelde te king Gok aga ami dabe dali augwali pubulabo gų page tǫ deli me sa muaibao. Te gų page da, te Osogo Bidagasali Bidi Dabego Odogo Malu Bulude elaluaiba, te u badu te giliga asobo badu te tamu ąį Detsi te sigi ąį badu. Tama te we bidi augwali te badu munu me ma biligobeo. Magi baso meni. Te Gokgo ami bidi dabego gų page te bulu badu mu pągąna paibao. Tama augwaligo te odogo malu bulu nogi e tama nogi nogi yaiba, Gokgo Ami Bidi Dabego Odogo Malu Bulu dao waibao. 12 Tama te Israel dabe augwaligo te Gokgo ami bidi dabego tigi pubalobo sę idubadi, te 7 polua bidaibao. Tialima, augwaligo augwali polo pubala silibo si, teda augwaligo tǫ eno gedude wiegi yai ma yaibao. 13 Te Israel dabe sese tamago te sę yaibao. Tama bidi dabego enaba genuai nogi mabo sogo da, teda augwali te sę yali bidi dabebolo me genuai nogi mawaibao. Te da God Genuai Bidi eno po dao. 14 Tama te a naga olama, si, te 7 polua silibode da, te Israel dabe augwaligo bidi dabe sa munama, tama augwali tigidali Israel tǫba pelama, tama te bidi dili dabe me munalubo gege biligi paibao. Tama augwaligo te dili dabe pubalaibao, te tǫ wiegi yai pedalomainu. 15 Tama te bidi dabe augwali biligi pelama, te bidi dili dabe elalubo subaso da, te bidi dabe augwaligo te dili elalubo pąde sa munagaliyu yaibao. Tama gasa bidi dabe mebago te dili dabe sagaselama, tama augwaligo te Gokgo Ami Bidi Dabego Odogo Malu Buluba pubaligi paibao. 16 Augwaligo te dabe sese pubala silibo si, teda Israel dabego tǫ sese tama wiegi yai ma pedelaibao. Tama taun me deli te gų page pąde elaluaibao. Tama augwaligo te taun nogi e tama nogi yaibao, Genuai Ami Bidi Hani nogi yaibao.’ Eno te po obao,” wali.

17 “Ena God Genuai Bidi eno te po me obao. Tǫde bidi, eno homugo nago e tǫde ba dabe me bulu hasa dabe asomainu i ola kegelao. Eno e po augwalibolo pusao, ‘Dage te Israel dabego bulu du buluba dabe sisinagaselama, tama dagego eno dagebolo ofa nai mawainu ebo te ofa nai tuagameo. Te eno dagebolo tuabo mi hauwa mayu, me tuabo kaneme hauwa mu mayu yaibao. 18 Te dagego te king hauwago bomai ami bidi dabego tigi mi me kaneme hauwa tuyu yaibao, te bidi dabego mi dabe te Basan bulude sabo wiegi yai tumona pai genuai sipsip kibu, me meme kibu, me kau kibu ofa ebo mi tiwai tueibao. 19 Te eno te ami dabe te ofa tiwai elebo si da, dage te ba dabe me bulu hasa dabe dagego te tigi ili dabe tudubadi genama, dagego tabi pągąbo tagalama, tama augwaligo kaneme tudu pelama, dage polobo bidi tiwai ebo si tagalaibao. 20 Awe, eno dagego genuai nai da mu mawaibao. Tama dagego te hos dabego tigi dabe tuyu, me te hosde duabo ami bidi dabego tigi, me te hwįbo bomai bidi dabego tigi me tuyu yaibao. Tama dagego tabi mu pągąna paibao.’ Te da God Genuai Bidi eno po dao.” *Ped 19:17-18

21 Genuai Bidigo po bomonama ma weyu, te po wali, “Te eno te we bidi tigidali augwa dwai dwai kolesaga wei ponoyu, augwali dene mawaibao. Eno te tama tibo sogo da, teda augwaligo eno genuai bomo sulama, tama augwaligo enabolo genuai nogi mawaibao. 22 Tama tialima, te sogo me, nosali bidibo tigidali sogo me, te Israel dabe augwaligo te tama bugagia koneaibao, ena deli ena Genuai Bidi, tama ena augwa God dao waibao. 23 Tama gasa tǫ kantride bidibo we bidi hani bidi eno te Israel dabe dali yali sę page mu koneaibao. Te eno te Israel dabe digibulu buluba kalabus sę emainu tagala palali sogo, eno te tama tiai dao. Magi baso meni, te Israel dabe augwaligo eno po sela sąnama, sęgę sobaso tiai dao. Tama tialima, eno augwalibolo tudi ola mawai dao. Tama te boi bidi dabego augwali aiyaba elaluama, tama augwali sese ela isila silimainu sula tagalai dao. 24 Eno augwaliba tudi ola menama, tama augwaligo dwai meda yai sę dabe elama, sęgę sę dabe yali wei ponoyu, tama tiai dao, augwa dagede,” wali.

25 “Ena God Genuai Bidi, eno te po obao, eno te Israel dabe dene polo mawai dao. Tama tialima, eno megi augwali ma homu dene ma yaibao. Tama bidi mego eno genuai nogi aiyaba elalubo usu me egobeo. 26 Te augwali augwa tǫde bugagia bidiyu, tama bidi mego augwali wi ma ilisąma ebaso da, teda augwaligo augwa polobadu yali dwai kolesagaba kone palama, tama augwali hale dwai mu yaibao. 27 Eno augwali augwa boi bidi dabego kantride selama, tama augwali augwa kantri muba ma odasa asaibao. Tama te gasa hani bidi dabego eno te Israel dabe dali yali sę sulama, tama augwaligo e tama koneaibao, te ena tedali gasagi yai dao, tama eno kolesaga wiegi yai doloba pai mu augwaligo suaibao. 28 Tama te Israel dabego eno augwali dali yali sę kone palaibao. Te augwaligo eno augwali gasa kantriba kalabus igi pomainu tagala palali, me augwali augwa kantriba ma odasa asali kone paliyu yaibao. Tama augwaligo e tama bugagia koneaibao, ena deli ena Genuai Bidi augwaligo God dao homu yaibao. 29 Tama eno ena mobo bidi augwalibolo mawaibao. Tama eno augwali tudi munu me ma ola magobeo. Ena God Genuai Bidi, eno te tama po te wali dao,” te po wali.

<- Profet Esekielgo Po Asęai Buku 38Profet Esekielgo Po Asęai Buku 40 ->