Profet Esekielgo Po Asęai Buku 33

Godigo te Israel dabe augwali bugagia ma bidimainu ilaibao

(Dąį 33–37)

Godigo Esekiel te bidi tonalubo bidi nigilali

(Ese 3:16-21)

1 Genuai Bidigo enabolo e tama po wali, 2 “Tǫde bidio, nago naga hani bage, te Israel bage dali, te Juda we bidi dali si, augwalibolo te bidi tonalubo bidigo ebo sę po pusa mao. Te eno boi bidi dabe me te kantri me dali hwįmainu taga palobaso da, teda te kantri we bidigo augwa tonaluabo bidi me deli sa mubo dao. 3 Tama te tonalubo bidigo boi bidi dabe asobo sulama da, teda agai te biugel bu wabo dao, te we bidibolo boi asobao olama mayu, te po wabo dao. 4-5 Tama tialima, te bidi me deligo te biugel bu wabo odama, tama aga wi pelama, tama duala sabo pesage gegegi pisąma yai digi, tama te boi bidi dabego aga elama isilali da, teda te bidi aga dagede aga isai dao. Magi baso meni. Ma, aga duala sigi pigi sogo da, teda aga me isigi menio. 6 Tiali goli, te tonalubo bidigo te biugel bu wasiąma yali da, teda te boi bidi dabego te we bidi sese tama ela silaibao. Te mu tama goli da, te we bidi augwaligo dwai sęgę elama, isali goli dao. Tiali goli, eno gedude da, te tonalubo bidi dabego geda muanigo da, te augwali te isali dao. Tama eno aga dali te po tų yaibao,” wali.

7 “Tǫde bidio, eno nage Israel dabe tonalubo bidi nigilibao. Te eno bomai po augwalibolo pusabo po elalubaso da, teda eno nagebolo menama, tama nago augwalibolo pusa magameo. 8 Tialima, eno bidi mego dwai kolesaga ebo subaso da, tama eno aga isaibao obaso da, teda nago agabolo pusao. Nago agabolo agai homu kolesaga, me agai ebo kolesaga hasegeleyu yao po wao. Tialima, nago agabolo wasiąma yali da, teda agai sęgę me tama elaluaibao, tama aga isaibao. Tiali goli, eno gedude da, teda nago dagede aga isaibao. 9 Tiali goli, nago te sęgę sabo bidibolo po walai digi, tama agai te dwai kolesaga tagalisąma ebaso da, teda te dwai kolesagago aga dolama, tama aga isaibao. Tiali goli, nago te sę yalide sęgę me sogobeo, tama nage me isigobeo,” wali.

Genuai Bidigo homugo dwai kolesaga ebo bidi isibo hagela homu yali

10 Genuai Bidigo enabolo po geninama ma weyu, e tama po wali, “Tǫde bidi, nago eno te po te Israel we bidibolo pusa mao, ‘Dagego e tama po wabo dao, “Dago sęgę hauwa sabo da,” po wali, “tama tialima, da homu sęgę genuai mu ebao,” po wali, “tama dago tigi dili pulu ha mu ebao, mena tama tiyu, da bugagia bidigowe?” Dagego te po wabo dao.’ 11 Te Israel dabebolo e tama po walao, ‘Ena God Genuai Bidi, ena tigidali sogo bidibo dao, tama mu tama dao, te dwai kolesaga ebo bidi dabe isibaso, eno tede wiegi yai homu pemene egobe dao. Menio. Eno te dwai kolesaga dabeba tudi ola menama bidibo bidi dabeba eno wiegi yai homu pemene ebo dao. Dage Israel dabego odao. Ma begasa asao. Dagego duga ebo dwai kolesagaba tudi ola menama, tama dage enaba ma asiąo. Magi baso dagego isabo sę idu gebawe?’ Nago augwalibolo te po wao,” wali.

12 “Tǫde bidi, nago te naga hani Israel dabebolo walao, ‘Tialima, te doloba pai bidi mego dwai sę ebaso da, teda agai polobadu yali doloba pai kolesaga aga me bugagia bidimainu tau me sogobeo. Tialima, bidi me dwai sę iduai bidigo dwai kolesaga tagalama, wiegi yai kolesaga ebaso da, teda agai aga yali dwai kolesagaba tudi ola mayu te ebao. Teda eno aga dologobeo. Tama tialima, te doloba pai bidi me deligo dwai sę ebo gagalobaso da, teda eno agai yali doloba pai kolesaga koneama, tama eno aga bugagia bidimainu me sula tagalogobeo. Menio. 13 Eno te doloba pai bidi dabebolo augwali bugagia bidaibao po wabo dao. Tiali goli, bidi mego homugo agai yali wiegi yai kolesagago aga tau saibao olama, tama agai doloba pai kolesaga tagalama, tama agai dwai sęgę sabo sę eyu da, teda God eno agai polobadu te yali doloba pai kolesaga kone me egobeo. Menio. Megi aga dwai kolesaga yai baso da, teda aga isimainao. 14 Tama eno bidi dwai dabebolo augwali isimainao po wabo dao. Tiali goli, te dwai kolesaga ebo bidigo aga yali dwai kolesagaba tudi ola menama, tama agai doloba pai kolesaga naga idu baso da, 15 teda aga munu me isigobeo. Tialima, te bidi agai te bidi me delibolo agai te negeli yali te tonalubo nai ma wei mobaso, o agai wi sali nai ma wei ponobaso, me agai eno tigidali bomai po wali pelama, tama agai dwai kolesaga isąma eyu da, teda te bidi munu me isigobeo. Menio. Aga bugagia mu bidaibao. 16 Tialima, eno agai polobadu yali dwai kolesaga kone me palogobeo. Megi da, agai doloba pai kolesaga ebaso da, teda aga bugagia bidaibao.’ Te po augwalibolo pusao,” wali.

17 “Tiali goli, tǫde bidio, naga abagi dabego te po wabo dao, Genuai Bidi eno kolesaga dolo menio po wabo dao. Tiali goli, menio, te Israel dabe augwa kolesaga te dolo menio. 18 Tialima, te doloba pai bidigo aga te doloba pai kolesaga tagalama, tama dwai kolesaga ebaso da, teda aga isaibao. 19 Me ma, te dwai kolesaga ebo bidi me deligo aga yali dwai kolesaga tudi ola menama, tama agai doloba pai wiegi yai kolesaga wali peyu da, teda aga bugagia bidaibao. 20 Tiali goli, dage Israel dabego te po wabo dao, Genuai Bidi eno kolesaga dolo meni po wabo dao. Teda odao. Nosali eno dage po tų elama, tama dagego kolesaga osola sulama, tama dage deli deligo ebo kolesaga dagalaibao,” Genuai Bidigo enabolo te po wai.

Jerusalem dolalio

21-22 Te da kalabuside bidibadi kibu be namba 12 wabode, tama te dei namba 4, te namba 10 poluade, te sogo pio te eno Genuai Bidigo bomo ena tigiba asobo gagama yali. Tama te sogo kigamu Genuai Bidigo eno pedauwali ma usu ilama, tama eno po ma wabo usu ilali. [a] Tama elama, tama bidi me deli aselama, tama enabolo te po wali, “Jerusalem polo dolalio,” te po wali. Te boi bidi dabego te Jerusalem hanu dolobo sulama, tama te bidi aga ena bidibo madi asali. [b]

Te we bidi kantri Israelde bididuali we bidigo dwai kolesaga yalio

23 Genuai Bidigo enabolo e tama po wali, 24 “Tǫde bidio, Israel dabego taun polo dolalio. Tiali goli, te we bidi te taunde me bidibao. Augwaligo e tama po wabo dao, ‘Abraham aga te bidi deli goli dao, tama Godigo te tǫ tigidali tama agabolo mawai dao. Tiali goli, megi da, dago we bidi hauwa te elalubao. Tama tilama, Godigo te tǫ mu tama dabolo mawai yali bogo.’ Augwaligo te po wabo dao. 25 Tama tibaso, megi da eno homugo nago te po augwalibolo pusa mao. Ena God Genuai Bidi eno te po e obao. Dagego dwai kolesaga hauwa ebo dao. Te dagego te hasa dabe tuainogo elebo sogo, dagego kaneme dabe sela sąbo menio. Me, dagego tibo god dabeba lotu po weyu ebo dao. Me, dagego bidi dabe ela muyu ebo dao. Mena tibaso dagego te tǫ saiba homu ebawe? 26 Tigidali sogo dagego subigila hwįyu ebo dao. Tama me, dagego dwai damua pai kolesaga dabe ebo dao, me dagego duga abagi sologo we dabe dali penani sę eyu ebo dao. Dagego homugo mena tama tiyu, dagego te tǫ saiba homu ebawe? Dagego usu munu ma me egobeo,” wali.

27 “Tialima, eno homugo nago ena God Genuai Bidigo po augwalibolo pusa mao. Ena God dao, tama ena tigidali sogo bidibo dao, tama eno mu po e tama obao. Te boi bidi dabego te dolai taunde bidalubo we bidi sese tama ela silagasaibao. Tama me, te bulu hasa dabego te taunde bidisąma, olo bulu badu bidalubo we bidi elama, tuagasaibao. Tama me, te dualaluabo pesage wiegi yai digi duala sali we bidi, me masigi dudulawede duala sali we bidi, augwali genuai gasi mu selama, isaibao. 28 Tama eno te tǫ dolama, tama te tǫ olo tǫ mu pedelaibao. Te Israel dabe augwaligo augwa bomode mu gana pabo dao. Tiali goli, eno augwaligo te bomo mu silaibao. Tama te Israel dabego bulu du te dwai bulu dasu mu pedelaibao, tama te bidi dabe augwali tede bilibo hagela yaibao. 29 Te augwaligo te dwai damua pai kolesaga ebaso da, eno te we bidigo bulu tǫ te olo bulu tiwai pedelemainu ilaibao. Te tiwai ilibo si da, teda augwaligo e tama bugagia koneaibao, ena deli naga te Genuai Bidi te yabo homu yaibao,” wali.

Te we bidi augwaligo te profetgo po wali pabeo

30 Genuai Bidigo enabolo e tama po wali, “Tǫde bidio, te naga abagi dede augwali te taun obo pąde sisinibo sogo, me augwa be sunumi pąde sisinibo sogo augwaligo nage koneama, augwaligo e tama po wabo dao. ‘Polo pinao, da pelama, Genuai Bidigo mena po aga profet bidibolo megi maniwe odigi pinao,’ wabo dao. 31 Tama tialima, eno we bidi augwali nago po odainu sisinagasobo dao. Awe, augwali nago gesabidide dualama, nago po odobo dao. Tiali goli, augwaligo olodali tama odobo dao. Augwaligo te po wali pabo menio. Augwaligo te timainao po wabo dao. Tiali goli augwaligo te mone hauwa sabo homu naga ebo dao. 32 Augwaligo nago po odabo homu ebao, te bidigo gita eleyu, te wiegi yai musik wabo tiwai odabo homu ebo dao. Tama me, te bidigo wiegi yai dogoni elaluyu, tama bidigo we godolo eyu, te wiegi yai balia po wabo odabo homu ebo tiwai ebo dao, augwaligo nago po tigidali tama odobo dao. Tiali goli, augwaligo dwasianu wali me pabo menio. 33 Tiali goli, mu tama, nosali nago wali po sese tama mu pedalaibao. Tama te sogo augwaligo koneaibao, te nago te pusali po dabe, te eno po mu te yabao homu yaibao.” Genuai Bidigo te po wali.

<- Profet Esekielgo Po Asęai Buku 32 Profet Esekielgo Po Asęai Buku 34 ->