1 Te kibu be 9 da te kalabuside bidali, te dei 10 wabode, te 10 poluade, te bidali kibu bede, *Te dago megi elalubo kalendade, te deli wabo poluago 15 dei, te kibu be 588 te Krais e tǫde ame nisiąbadi bidali sogo dao wali. Genuai Bidigo enabolo te tiwai po wali, 2 “Tǫde bidio, te side naga gagalasa, te Babilon kingo te Jerusalem bagulubo sę yali. Tialima, nago te side te Israel dabego koneyu, te nago po te mu po yabo te po wabo dei asęao,” wali. *2 Kin 25:1; Jer 52:4 3 “Nago te Israel hagoma bidi dabeba nago te po digi po begelama, augwaliba pusao. Te God Genuai Bidi eno po da e tiwai, ‘Nai ulubo bidi, nago sospen te isiba ugadu munama, te sospenba ąį tabilao. 4-5 Te sipsip me deli wiegi yai mu me deli selama, elama, te togao. Te agai polalubo mi me badu sao, te wiegi yai na mi, me sągą mi da, te wiegi yai dili dabe selama, te sospenba tigidali buao. Te dili dabe te mi dologode munama, te kibu mi me dili dabe bugagia posolo ąįba ulao,’ eno te tiwai po asęao,” wai.

6 “Ena God Genuai Bidi, eno te po obao. Jerusalem taun te brasgo nigai sene me deli tiwai elalu, te aga tomode meda mu elaluali, te bidi dabego aga wiegi yai pedalumainu yabo usu egobeo. Te senede kibu mi pedai tigidali, me kibu dili me teda muao, te senede deli me elalusiąwai. Magi baso meni. Te Jerusalem dabego gasa bidi dabe ela muani, tialima te augwali mu dolaibao,” wali. 7 “Augwaligo te augwa dwai kolesagade homu kone me tųą pabeo. Menio. Augwaligo hanilama, bulu ulade yali. Te augwaligo te bidi dabe elama, te kaneme te masigi elalubo pesage daide gealu tiwai yali. Augwaligo kaneme te tǫba gealumainu me ebeo, te tǫgo geme dualumaina wabeo. 8 Tiali digi, ena eno te masigi elalubo pesagede augwaligo kaneme gealumainu ilali, te eno sumainu yali. Te eno augwaligo yali dwai sęde homu kone palama, te augwaliba eno haliga sębę eyu, te eno augwaliba dwai dene mawaibao,” wali.

9 “Tialima, ena God Genuai Bidi, eno te tama po obao, eno te kaneme pągąnalubo taun mu dolaibao. Te taun ulabo isi ena digi pesage holaibao. 10 Isi hauwa pesage holama, te sia nogolama, ula ilao. Te sene posolo ąį kulukulu olala pidu genama, wa pelama, te kibu mi dabe me dili te isigo mu tigidali dela pelama, te senede mu silao. 11 Tialima, te bras sene te iside ulalumainu elama, te posolo hobulu mu yai pedalumainao. Te sene meda mu yali, te eno homugo te isigo te dila pai pobele bage hogomu silimainu elama, te sene wiegi yai meda meni yai ma pedalumainu yao. 12 Tiali goli, ena odolali sę dene yali. Isigo te pobele bage dela silabo usu meni yai dao. 13 Dage Jerusalem, te yaba yali po wali page te dagego dwai meda yai kolesagade dąį elasa walio. Eno dagego dwai kolesaga sela sąbo usu sali, tiali goli dagego hagela yali. Dage meda dali bidabo homu naga yali. Tialima, te ena haliga sębę ebaso, te eno dageba dwai dene mabo sę ebaso, te eno dageba dwai dene mabo sę mu yaibao. Tama dage te meda dali me tama bidaludubadi, te eno haliga sębę yali silibo sogoba usu naibao,” wai dao. 14 “Ena Genuai Bidi, eno mu po obao, te dage eno dolaibao. Te dagego meda yai kolesaga ebode te tigidali eno homu kone ebo gegeda palogobeo. Te dage eno homu dene me isąma, te eno dageba olo mu tau sabo wiegi yai kolesaga me egobeo. Mu menio. Te eno dage po tų ilama, te dagego yali dwai kolesaga tigidali dolo wei ponaibao. Ena God Genuai Bidi, eno te po wai dao,” wali.

15 Genuai Bidigo enabolo te tama po wali, 16 “Tǫde bidio, eno koneani, nago naga we godolo homu mu yai, tiali goli te polo tama eno te we dagala selama, te nage olo bidaibao. Tiali goli, nago agade gela weyu, te hobede ebo balia me olamu dao,” wali. 17 “Nago haligade naga hwąwa wao. Te bidi dabego nage odomainu me ilamuo. Tama nago te isai bidi dabede hobede ebo kolesaga dabe tiwai me elamuo. Te nago tobolude mubo ugwa name belama, te sągąde nadoba gudao, te naga sesemane sogo au ebo tiwai yao. Te nago pedauwali panigio. Te abagi dabego hobede ebo kolesaga wali peyu, te nageba nai sela asobo sę tiwai nago me elamuo dao.” Genuai Bidigo enabolo te po wali.

18 Te kigamu te we bidi dabe dali eno po miani, te pio eno we isalio. Te do tama kigamude, eno te Genuai Bidigo enabolo po wali sę dabe yai dao. 19 Te we bidi augwaligo ena sulama, te augwaligo enabolo te tiwai hanalu wali, “Magi baso nago te homu dene ebo kolesaga wali pabewe? Te nago magi nai me deli dabolo ola maiabo homu eyu eba, agawe?” te po wali.

20 Tama tibaso, eno augwaliba te tama po wei ponani, “God Genuai Bidigo enabolo waliyu, 21 te dage Israelba te po pusao wali, Godigo te tama po wali, ‘Dagego God eno moni tempel bede wiegi yai homu pemene eyu, tama dagego te po weyu, te bomai dila pai be mu da, wali. Tama te be dagego godolo mu ebao. Tiali goli, eno te be dolaibao. Te dage hani wai dabe te Jerusalemde me bidalubo te boi hwįnama dolaibao. 22 Tialima, te Esekielgo yali kolesaga tobage te dagego me yaibao. Te dagego duga pedauwali me panigobeo. Tama te duga abagi dabego te hobede ebo kolesaga eyu, te dageba nai dabe sela asobo sę dagego iligobeo. 23 Te dagego ugwa tobolude belama, te sągąde nadoba bulama, paibao. Dagego te isali we bidide homu dene elama, gela wabo homu eyu tigobeo. Magi baso meni, te dagego duga digi yali sęgęde homu kone hauwa tųą pelama, te dagego tigi dabe te nomona saibao. Tama dagego duga haside digi hwąwa weyu tiaibao. 24 Esekiel te dagego dąį tiwai ilali, magi baso meni, dagego me agai te yali kolesaga tobage naga yaibao. Te tigidali sę pedalubo si da, dagego te tiwai tama koneagameo, ena digi ena Genuai Bidi dao.’ Godigo te po dagebolo pusao po wai dao,” eno te po wai.

25 Te Genuai Bidigo po enabolo weyu, te tama po ma wali, “Tǫde bidio, eno be augwaligo be tomode elaluali, tialima te augwali bomo elama, dolalueiba, te homu augwaligo yali. Augwaligo te be godolo homu elama, tede wiegi yai pemene eyu, teba sesemane homu kone elaluali. Tiali goli, eno ena te be dolama, tama eno augwaligo wai dabe ela muaibao,” te po wai dao. 26 “Eno te tama sę ebo sogo, te bidi me deli te Jerusalemdu wi aselama, te sę dabe pedelali po nageba walagasaibao. 27 Te bubugade naga, te eno nago pedauwali usu ma ilama, te nage pedauwali pania sai munu me elalugobeo. Tialima, te nageba po sela asali bidi dali te nago po ma miaibao. Te Israel augwaligo sueibao, te nago po ma obaso, te Israel dabego te tiwai koneama, ena digi ena Genuai Bidi bidibo dao,” po wai dao.

<- Profet Esekielgo Po Asęai Buku 23Profet Esekielgo Po Asęai Buku 25 ->