1 Genuai Bidigo enabolo te tiwai po wali, 2 “Tǫde bidio, eno homugo nago te Jerusalem we bidi po tų ila homu ebao. Augwaligo te bidi hauwa ela muani. Nago augwa te yali dwai kugumini yai kolesagade augwali po tų ilagameo po wao. 3 Eno po te tiwai obao, ‘Ena God Genuai Bidi, eno dage Israelde po elalubao. Dagego duga we bidi digi hauwa ela muani. Te dagego te tibo god dabeba lotu weyu, te duga digi eno gedude meda yai mu pedalubao. Tialima, te dage dolabo sogo pąba yagasai dao. 4 Dagego te dwai kolesaga dabe yaligo, te dagede sęgę elalubao. Tialima, dwasianu sogo naga elalubao, tama dage dolaibao. Te pagede naga tama, te gasa hani we bidi dabego dage gisugu mayu, te dageba posobo po omainu te eno sula tagalaibao. 5 Te gasa hani te digibulu bidibo, me pąde bidibo bage dabe, augwaligo koneani, dage te tobage dwai kolesaga ebo we bidi da homu eyu, te augwaligo dageba posobo po waibao,’ te po augwalibolo wao,” wali.

6 “ ‘Te Israel polalubo bidi dabe, augwali tigidaligo te augwa bomode tigidali sę ebo usu da homu yali. Tiyu, augwaligo te bidi dabe ela mubo sę yai dao. 7 Te Jerusalem taunde mena bidi me deligo te aga aya idago po dologoba me pabeo. Te dage dali bidibo gasa tǫ kantri bidi dabeba dagego dwai sę ebao. Te wilawe we dabeba te dagego dwai sę yali, te tiana wai dabeba me te tiwai dwai sę ebo dao. [a] 8 Dagego te homu eyu, enaba te lotu wabo nai dabe te olo nai da homu ebao. Tama me, dagego te Sabat bodolu muani side bomo yai po mu bolobo dao. [b] 9 Dage bidi mebago tibo po gasa bidi dabeba kisilama weyu, te po tųde augwali isimaina po omainu tebao. Te meba te tibo god dabeba lotu wabo pesageba pelama, te ofa ebo kibu mi dabe tubo da. Te mebago te lotu wabo pesagede penani sę ebo dao. 10 Mebago te augwa ayago we dali pagela piali. Te meba bidi dabego te augwa we dabe te poluago elali gasi elalubadi bomo elama, pagela piai dao. 11 Te mebago gasa bidigo we dali penani eyu, te mebago hale isiąyu, augwa ogwago we dabe dali pagela piyu yali, te mebago augwa ayago wegi dali pagela pialio. [c] 12 Te mebago augwa abagi dabe ela muabo mone sabo dao. Te mebago augwa abagi dabego te negeli ilali wei augwaliba ponobo sogo te gasa ugwadu daganobo mone dali sabo dao. Te mebago augwa abagi dabe wi ilibo sę elama, te augwaligo mone kekebo sę yalio. Dagego te ena God Genuai Bidi homu kone isąma, kegeda pali da,’ te po augwalibolo wao,” wali. [d]

13 “ ‘Eno wado po te dage nai wi sabo bidi dabeba, me te gasa bidi ela mubo bidi dabe, dageba eno wado ilaibao. Tialima, eno nogo bada bomonama eleyu, te eno dwai dene dageba mawaibao. 14 Te sogo dage wi dwai mu eyu, te dage dili elama, me dolalugobeo. Mu menio. Ena Genuai Bidi, eno te ena wali po tiwai gilama yaibao. 15 Te dage eno tigidali tǫ kantri pedaiba tagala palaibao. Tama eno dagego duga te dwai kolesaga tigidali tagalomainu ilaibao. 16 Dagego te ebo kolesagago te duga nogi aiyaba elalubaso, tama te tiwai dagego bugagia koneyu, ena digi ena Genuai Bidi da po wagameo,’ nago te po te we bidibolo pusao,” Genuai Bidigo te po wali.

17 Genuai Bidigo te tiwai po enabolo ma weyu, te tama wali, 18 “Tǫde bidio, te Israel we bidi dabe augwali eno hagela mu ebao. Te bidi dabego te kapa nogi silva elalubo masigide te silva sainu eyu, te genuai isiba ulama, te dwai hogomu sela sąbo dao. Te Israel we bidi dabe augwali te sela sąbo dwai nai naga tiwai dao, eno gedude. Bidi dabe augwaligo te tiwai pobele bage hogomu selama, sąyu naga ebo dao. 19 Tialima, dage Israel, te ena God Genuai Bidigo e po odiąo. Dage da, te bidi dabego te silva isiba ulama, te pobele bage hogomu tiwai ebao. Tialima, eno dage tigidali te Jerusalemba odasa pelama, te dwai dene dageba mawaibao. 20 Eno haliga sębę da, te genuai isi dabo tiwai ebao. Te dage eno ulaibao, te bidi dabego te masigi dabe genuai isiba ulama, te silva sainu ebo tiwai ebao. Augwaligo te isi ponobaso, te isi bogoli umagi posolo yai mu pedelama, tama silva te ąį tiwai pedalubo dao. Tama eno dageba te tiwai yaibao. 21 Mu tamao, eno dageba haliga sębę ebao. Tialima, dage eno te Jerusalemba sisinama, te dageba dwai dene ilaibao. Eno haliga sębę te genuai isi dabo tiwai pedelama, te dage mu ulaibao. 22 Te dagego eno bomo asobo hania mu sueibao. Te sogo dagego te tiwai bugagia koneyu, ena digi eno dageba dwai dene mabo dao,” Genuai Bidigo te po wali.

23 Genuai Bidigo po ma wadolama, te tiwai po wali, 24 “Tǫde bidio, nago te Israel dabeba te po walao, augwaligo dwai kolesaga hauwa eyu, te augwaligo tǫ eno gedude meda pedelali. Tialima, eno haliga sębę dwai mu augwaliba eyu, eno te tulubage paliama, te kalaba tulubage me paliama, te dene mabo sę augwaliba mobao. 25 Te profet dabego dwai kolesaga po mia selama, augwali te laion dabego te hasa ela munama, te hasa dili tologa tuyu i wabo tiwai yali. Te bidi dabego te augwa abagi dabe hauwa ela munama, tama augwa te abagi dabego mone me doado bage sali. Tama te isali bidi dabego we dabe sibi, augwaduba odolo bidibao. 26 Te pris dabego eno bomai po bolama, tama augwaligo homugo enaba te lotu wabo nai te olo nai tiwai da homu yali. Augwaligo te tobage deli kolesaga eno nai dabeba eyu, te augwaligo eno nai da weyu, sa musiąwai naiba ebo kolesaga tiwai yalio. Tama eno gedude te mena nai dabe te meda meni yai, me te mena nai dabe te meda yai da, te po te we bidi dabeba bugagia me ola mabo meni. Tama tiyu, augwaligo te Sabat side bomo yai po me wali pabo meni. Tama augwaligo te tama tebo kolesaga tigidalide te ena nogi aiyaba elaluai dao,” wali. [e]

27 “Te gegunai bidi dabe augwali te bulu uni yowi dabe tiwai eyu, te hasa elama, te tologolama tubo sę tiwai yali. Te gegunai bidi dabe augwaligo te mone me doado bage hauwa sabo homu eyu, te bidi dabe augwali ela munama, te augwaligo doado bage sabo dao. 28 Te we bidi dabe augwaligo dwai kolesaga ebaso, te profet dabego wado po augwaliba wabeo. Menio. Augwa te tama po wabo dao, te we bidi dabego wiegi yai kolesaga naga ebao wabo. Te wabo pogo te we bidi dabego dwai sę ebo geme dualubo dao. Te profet augwali da, te dila pisąwai obo nide te tedela yai pen pilibo bidi dabe tiwai elama, te bidi dabego te dila pai obo da homu emainu yalio. Augwaligo na dabe yali, te tibo na naga yali, augwaligo te pedelaiba po wali nai dabe, te me pedalubeo. Te profet dabego te po weyu, te God Genuai Bidi eno po pusabao wali, tiali goli eno po me deli augwaliba me mabeo. 29 Te bidi dabego augwa abagi dabe wi ilama, te augwaligo mone doado bage bisigi elama sabo dao. Te augwaligo nai dabe me wi siyu ebo dao. Augwaligo te magi nai meni yai bidi dabe, me gasa tǫ kantri bidi dabe te Israelba bidagasali bidi me, augwali dolobo sę dwai mu ebo dao,” wali.

30 “Te eno po pusulama, te we bidi dabe enaba ma odasa asabo bidi deli me eno gegebo usu sali. Tialima, eno gegebo sę ela pali, menio. Te tobage bidi bidigi sogo da, aga te taun dolainu asobo boi bidi dabe asobo sunumi paligi da, te taun bagulali obo tiwai pedaligi da. Tama aga te obo alua pali badu dolalu, te boi bidi dabe taun tomoba asainu ebo sogo, te hwįbo bidi tiwai pedaligi da. Ena digi eno te Israelgo boi bidi tiwai pedelali, te eno augwaligo tǫ kantri dolainu yali, tiali goli te tobage bidi bidigi sogo da, eno tama sę igi menio. Tialima, eno te tiwai bidi me subeo. Mu menio. 31 Tialima, eno augwalide haliga sębę ebaso, te augwali eno mu dolainu ebao, te isi dage kalaba munama, dala sabo tiwai yaibao. Te eno augwa yali dwai kolesaga dolo mu wei ponaibao. Ena God Genuai Bidi, eno te po wai dao,” wali.

<- Profet Esekielgo Po Asęai Buku 21Profet Esekielgo Po Asęai Buku 23 ->