1 Eno te tama tebo sulama, ena kidu sugunama, te gesabidi tǫba pǫgulali. Tama eno odali, Godigo enabolo te tiwai po wali, “Tǫde bidio, nage hogodao. Eno po nage dali wainogo ebao,” wali. 2 Te Godigo enaba te po wabo sogo, te agai Mobo Noma Bidi enaba aselama, te ena hodolobaso, ena dolugulali. Tama eno odali, Godigo enabolo te tiwai po ma wabo odalio, 3 “Tǫde bidio, megi eno nage te Israel dabe augwaliba tagala palaibao, te augwali eno po sela sąyu, hagoma eyu, te ena tudiba mubo we bidi dabe da. Augwali te augwa wąį nǫų dabego hagoma ebo tiwai yai bidi dabe dao. 4 Augwa tobolu dili dagana sigi pelama, te augwaligo eno po me odobeo. Megi da, eno te nage augwaliba pomaina homu elama, te eno po augwaliba magi pao. Te augwaliba te tiwai po walao, ‘Te e da Tigidali Bomo Elalubo Godigo po digi eno dageba obao.’ 5 Te augwaligo nago po odobaso, ma odisąbaso da, te tagalao, teda te hagoma ebo hani we bidigo te tiwai konemainao, te eno profet bidi me deli augwali dali bidiba homu yaibao,” te po wai dao.

6 “Tialima nage, te tǫde bidi, nage augwalide wi elama, te augwaligo nageba wabo pode nage wi me igio. Te augwaligo nago po aiyaba elaluama, nage begela dolaibao. Te nage augwali tomode bidiyu, te tiwai dwai haliga yaibao, nage te dwai sesane elalubo bono sili tomode bidibo tiwai yaibao. Ma, nage te dwai marasin elalubo hwą dabe tomode bidibo tiwai elalueibao. Tiali digi tagalao, nage augwalide wi eyu, te augwaligo pode me wi igio. Menio. 7 Nago koneani, augwali te hagoma bidi naga elalubao. Te augwaligo nago po odisąbadi goli, tagalao, te eno nageba mabo po tigidali te nago augwaliba walao,” te po wai.

8 “Tǫde bidi, eno te po bugagia odao. Te gasa Israel bidi dabego ebo tiwai nago hagoma elamuo. Nago pedauwali diliginama, eno nageba te mabo nai nago tuao,” wali. 9 Agai te po ola silama da, teda eno te nogo me deligo te buku me deli ena pąde tolalubo sualio. 10 Te buku te pepa me deli tiwai augwaligo te bebe pelama, te kęąį elaluai. Tialima, nogo te buku diliginama, tama eno suali, te bukude te si badu po asęai elaluali. Te bidi dabe augwali te haliga sęgę eyu, dwai gela weyu, homu dene ebo tęąbi ebo po dabe augwaligo asęai elalubo suali. Te tobage po te pepade asęani pągąnalualio. [a]

<- Profet Esekielgo Po Asęai Buku 1Profet Esekielgo Po Asęai Buku 3 ->