1 Te Besalel dali, te sę ebo bidi dabe dali, augwaligo te ni akas selama, te ofa ebo nai dabe ulabo alta sai nigai. Te alta sesegede te tigidali te deli tigi poai naga yali, te 2 mita 20 sentamita te usu tama yali, tama ugwadu usu sali, te 1 mita 30 sentamita, te tiwai usu sai dao. 2 Tama augwaligo te bulmakau gąų tiwai nai me si me si habu badu te ugwadu, te tiwai nai me si me si dulama, tama te gąų dabe te altade mu dąų wai. Tama te alta tigidali augwaligo te brasgo haluai dao. 3 Tama augwaligo te bras selama, te sia munama tolabo plet dabe badi, te dwasianu savol dabe me, te pou dabe badi, te age age yai na dabe me, tama te sia nogani keli sabo pou dabe, te tama nai dabe tigidali nigai. 4 Tama augwaligo te bras selama, tama te moni sawali bras nigiyu, polola polola pelama, tama te nai nigilama, tama te nai te alta halobage tomode elalumainogo eyu, muani. 5 Tama augwaligo te ring bras me si me si nigilama, tama te alta dage me si me si dage badu kęnai. Te ring dabe te ni munama, te alta tolabo digi nigai dao. 6 Tama augwaligo te alta tolabo te ni akas si dulama, tama brasgo haluai dao. 7 Tama augwaligo te ringba te alta si dali si badu muai. Te alta te augwaligo ni namego nigai halobage tiwai yali, tiali goli aga pagede te ni name meni yai.

8 Tialima, te Godigo ugwa be tų mabode sę ebo we dabe augwaligo te bras Besalelbolo mawai. Te bras te augwa gesabi subo dula dabe tiwai. Tama te sę ebo bidi dabego te bras selama, tama te wę pauabo genuai pou me deli nigibadi, te pou muabo page me deli nigibadi yai dao. *Sai 30:18

9 Augwaligo te Godigo ugwa be bagulabo obo ugwa nigali. Te sesege bogo badu bobobage usu sali, te 44 mita te usu tiwai. 10 Tama augwaligo te bras selama, te bidi sese pos nigibadi, te pos dabe page dodolabo halobage te bidi sese nigali, tama augwaligo te huk dabe, me te ba dabe te silva dabego nigai. 11 Tama augwaligo te deli tigi poai naga te me sesege badu nigai dao.

12 Tama te sia ge dulubo badu te name ugwa me deli walai elaluali, te ugwago bobage usu sali, te 22 mita elaluai, tama nogo si pos bras badi, te me nogo si te pos page dodolabo te halobage bras dabe elaluai. Tama te posde kęnabo dabe me, te ba me, te nai dabe augwaligo te silvago nigai. 13 Tama te giliga pedalu badu obo me te usu sali, 22 mita yai. Tų te obo badu elaluai. 14 Te obo me deli te sesege badu te tų sesegede te ugwa me deli walai elaluali, te ugwa aga bobage usu sali te 6 mita ma 60 sentamita usu sali tiwai yali, tama pos sela elaluali, me sela te pos dodolabo halobage nigai elaluai. 15 Tama augwaligo te deli tigi poai nai naga te gasa tų sesege obo badu nigai dao. 16 Augwaligo te gasa wiegi yai ugwa tigidali naga te obode walabo nigai. 17 Augwaligo te bras selama, tama te pos dabe page dodolabo halobage nigali. Tama augwaligo te silva selama, te huk dabe nigali, tama te pos dabe kęabo ba te nigai. Tama augwaligo te pos tobolude te silvago naga haluai. Tama te tigidali obo pos dabe augwaligo te ba silvago naga wadolai dao.

18 Tama augwaligo te obo tųde muabo ugwa wiegi yai mu nigai. Tama augwaligo te ugwade au ilibo nai hobolali, te haniani hobigo, tama te husugu sipsipgo, me te mama yai sipsip nisigo nigai hobigo hobolai. Te ugwago bobage usu sali, te 9 mita tama yali. Tama te ugwa ugwadu dai badu usu sali, te 2 mita 20 sentamita yali, te obo bagulali ugwa te tiwai nigai. 19 Tama augwaligo te bras halobage me si me side dolalubo te pos me si me side te ugwa walai. Tama te huk dabe me, te pos tobolu haluali nai me, te posba wadolali ba dabe me, te augwaligo silvago naga nigai. 20 Tama augwaligo te bras selama, tama te tǫba enebo bobage nil dabe nigai, te bomonama kekelama tama te ugwa be dolaluabo bono dąų waliyu, tama te ugwa be bobegelali obo dąų waliyu yainogo tiwai dao.

21 Tama augwaligo te tigidali nai nigali gol, me silva, me bras nedali, augwaligo te tobage wiegi yai kapago nigali nai te Genuai Bidigo ugwa bede muani nai dao. Te ugwa be da, te Godigo nogo si bomai po elalubo masigi pedai si elalubo be dao. Tama Mosesgo digi te Livai dabe augwalibolo te nai nedao po olama, tama augwaligo nedelama, tama nisu naga gol elaluali te augwaligo asęani. Itama, te pris Arongo ogwago te Livai dabego te sę ebo tonaluai dao. 22 Tama Besalel, te Urigo ogwa, tama Uri te Hurgo ogwa, te Juda hani dao. Tialima, Besalelgo te Genuai Bidigo Mosesbolo wali po gilama te tigidali nai nigibo sę yalio. 23 Tama Oholiap te Ahisamakgo ogwa, te Dango hani bidi dao. Te Oholiapgo te wiegi yai masigide asębo po togobo sę konebadi, tama agai te haniani gasa nai dabe nigibo sę me koneai. Tama agai te haniani gasa hobi dabego te au ilibo sę me koneyu, te sisi yai hobi, me te mama yai hobi, te tobage sipsip nisigo nigai hobigo te au dabe ilibo sę koneai dao. Agai te Besalel dologode bidiyu, aga tau sali. 24 Augwaligo te we bidigo te Godigo ugwa be sę emainogo sela asali nai dabe te tigidali gol nedai, tama te nai dabego aga sęgę da te e tiwai, te 1,000 kilo usu dao.

25-26 Tama augwaligo te silva nedali, tama te naigo sęgę te tiwai, te bidi sese hauwa, te 3,430 kilo sęgę yai. Te silva te bukude augwa nogi asęna elaluali bidi dabego sela asai. Te bidi dabego kibu be te bidi sese delidu ugwaba holali bage, augwali deli deligo te silva monego te mone ge a naga muani. Te bidi dabe te bidi sese hauwa mu, te 603,550, te tama bidi te mone muna muna pai dao. *Sai 30:11-16; Mat 17:24 27 Tama augwaligo te silvade sęgę 3,400 kilo yali, te Godigo ugwa be dili te dąų walabo nai nigali, tama te pos dabe page dodolabo halobage me, te Tedali Gasagi Yai Be Habu me, te Tedali Gasagi Yai Mu Be Habu me, te madi si te dualabo madi nai nigai. Te bidi sese a naga te 100 halobage elaluai. Te silva dage halobage deli deligo sęgę te 34 kilogram elaluai dao. 28 Tama me badu te munaluali silvago sęgę te 30 kilo usu tama elaluai. Tama te munaluali silvago augwaligo te huk nigilama, tama te pos dabede wadolama, tama te pos dabe ugwadu haluainogo tiwai sę yai dao.

29 Te augwaligo Genuai Bidiba mani tigidali brasgo sęgę te bidi sese hauwa mu, 2,425 kilogram igi pai dao. 30 Tama augwaligo te bras selama, tama te pos dabe dodolabo halobage nigali, tama te Godigo ugwa be tųde muainogo yali nai me, tama alta dali te alta tomoba muani pololai sawali bras, te nai dali elaluali, tama te altade sę yabo nai dabe tigidali nigai dao. 31 Tama augwaligo te ugwa be bobegelabo te pos bulabo halobage dabe, me te obo bagulali madi tų nigabo nai dabe nigai. Tama augwaligo te tǫba enabo bobage nil dabe, te ugwa be bomonama kekalumainogo dąų walobo nai nigiyu, tama te ugwa be bobegelabo nai me nigai dao.

<- Godigo Aga We Bidi Dabe Boi Bidi Nogode Ma Dobola Sali 37Godigo Aga We Bidi Dabe Boi Bidi Nogode Ma Dobola Sali 39 ->