Godigo Aga We Bidi Dabe Boi Bidi Nogode Ma Dobola Sali 30

Denami ebo pauda ulubo alta po wali

(Sai 37:25-28)

1 Tama Godigo po ma weyu, te po wai, “Dagego te ni akas selama, tama alta me deli nigilama, te denami ilabo nai pauda ulubo alta tama nigao. 2 Te alta bobage usu sabo te 45 sentamita, tama aga genuai te tiwai te 45 sentamita, tama te ugwadu usu sabo te 90 sentamita dao. Tama dagego te bulmakau gąų tiwai me si me si te alta dononama, ugwadu muabo te nai dulao. 3 Tama te me si me si habu badu mesegelama, tama ugwadu me, tama aga gąųde me, te wiegi yai golgo haluyu, tama bobage golgo te alta bobegelama, obo tiwai nigiyu, kęnao. 4 Tama te ni munama, te alta tolabo madi te alta me badu gaga nigiyu, me badu te gaga nigibadi yao. Tama te gaga nigali nai si te aiyadu te alta bobegelali gol pąde dagego te sesegede kęnao. 5 Tama te ni akas dage si selama, te alta tolabo nai dulama, tama te nai si te golgo mesegelao. 6 Tialima, te ugwa be tomode te genuai walobo ugwa dąį te bomo yai po dualali halobage, te dąį ugwa e badu te alta muao, te dwai sę ebo sęgę sela sąbo madi ugwadu pąde, te halobage munalubo digio. Tama te sęgę sela sąbo madi te eno dage sisinaibao.”

7 “Te tigidali sogo kigamu Aron aselama, te lam sole sisi yagasaibao, tama te tiagasobo sogo agai te pusu wiegi yai ebo pauda meba te altaba denami elainogo ulao. 8 Tama agai te tiwai naga te pio te lam sole domonagasu asobo sogo tiao. Dagego te ofa ena Genuai Bidibolo tigidali sogo nosali me te tiwai ofa elalua pao. 9 Dagego te gasagi yai nai dabe te altade ofa igio. Te haniani denami ilibo pauda me te eno dagebolo habu selali nai, te kibu, me wit, me wain ąį, te tama nai me e altade ofa igimio. 10 Tigidali kibu bede deli sogo Arongo te alta wiegi yai ilibo te sę eno gedude yao. Te tiwai sę yainogo da, dagego te sęgę sela sąyu te ofa ilali kaneme me badu sobadi, tama te nigilali alta gąų dabeba muao. Dagego te tebo sę te tigidali kibu bede yao. Tama tiyu, te alta te habu mu seliyu, tedali gasagi yai elaluaibao. Te Genuai Bidi eno nai naga da waibao.”

Genuai Bidigo lotu ugwa bede takis mone po

11 Nosali Genuai Bidigo po Mosesbolo weyu, te po wai, 12 “Nago te Israel bidi nogi selama, tama te bukude asębo sogo, tigidali bidi deli deligo mone meba enabolo mao. Ma, meni baso da, teda genuai gasi dwai mu pedelama, te sogo augwali dolaibao. 13 Tigidali bidi dabe augwali nogi sali bage, augwaligo te mone ge a naga te enabolo te ofa tiwai mao. * 14 Augwaligo te tigidali bidigo kibu be te 20de gagalama, te kibu be ugwaba holali bidi dabe nogi selama, tama tigidaligo te mone enabolo mao. 15 Te mone bidigo te agai mone hauwa me menamuo, te magi nai meni yai bidigo te dwasianu mone me mayu me igio. Tigidaligo te mone ge a naga, te tama naga enabolo mao, te tama tiyu augwa yali sęgę abeleyu da, teda augwali me isigobeo. 16 Te monego da, te eno lotu ugwa bede elalubo nai te dobaso da, te nai te monego gasa abelama, dodolabo mone dao. Te augwa bidibo ula abelabo mone eno te mone sulama, tama eno homu augwaliba muyu, tama augwali tonaluaibao.”

Te pou augwaligo te brasgo nigali po

17 Tama Genuai Bidigo Mosesbolo te po wai, 18 “Dagego te bras meba selama, tama te genuai pou me deli nigibadi, te pou muabo page me nigao. Tama te altade te ugwa be si tomode te tǫba te pou munama, tama te poude te wę pągąnao. * 19 Tama Aron aga ogomani dali augwali nogo sągą te węde telamainogo yao. 20 Te augwali eno ugwa be tomoba painogo, me ma te altade te siago ulubo ofa dabe me yabo homu eyu da, teda augwaligo nogo sągą bolo hasia ąįgo tedelama, tama eno beba asobaso da, teda augwali me isigobeo. 21 Mu tama, augwali isidali weyu, augwa nogo sągą ąįgo tedelao. Augwali dali, augwa nosali ame nabo wai dabe dali, augwaligo te bomai po sesemane sogo wali peyu, bidimainao,” wali. Te pris dabe sa mubo wel po wali

22 Tama Genuai Bidigo po Mosesbolo ma weyu, te po wai, 23 “Megi nago te wiegi wiegi yai denami ebo nai dabe sao. Hasia bolo te denami ebo nai sanda mea sao, te nai sęgę te 6 kilo te elalubao. Tama te sinamon pauda meba te wiegi yai denami elalubo, te aga te 3 kilo, tama te tobage wiegi yai denami ebo awi dili badi, te aga sęgę me te 3 kilo dao. 24 Tama te ni kasia waligo nigai pauda meba sao, te aga sęgę 6 kilo dao. Tama te oliv wel sęgę 4 lita elalubo te nai dabeba gelama, 25 tama te sanda nigibo sę mu koneai bidigo ebo sę tiwai eyu, te nai dabe bugagia taluama, te sanda tiwai pedelemainao. Te nai dabe da, te eno nai sa muabo nai elaluaibao.”

26 “Tama nago te wel dwasianu selama, tama eno dage dali Deliba Sisinabo Ugwa Beba dwasianu geliyu, te bomai po munalubo halobageba gelibadi, 27 tama te bret muabo tebol, me te tebolde munalubo nai dabeba me gelao, tama te lam dabe tolalubo nai, me aga nai dabeba badi, tama te denami ilibo altaba me gelao, 28 tama te tigidali siaba uluyu ofa ebo alta me, te aga nai dabeba dali, te wę paubo pou me, te aga pageba me, te tiwai naga yao. 29 Nago te nai dabe te eno tedali gasagi yai nai dabe mu da olama, tama te we bidi augwalibolo habu mu selao. Ma, bidi me deligo, me ma wego, me ma magi nai dabego te naiba dįya idali weyu, te me habu seliyu, gasagi yai tedali pedelama, tama te eno nai naga dao.”

30 “Tialima, nosali te wel selama, tama dwasianu te Aronba, me te aga ogomani, augwaliba gelama, tama augwali pris pedelama, tama eno sę emainogo sa muao. 31 Tama nago te Israel we bidi augwalibolo e tiwai po wao, ‘Dage dali, te duga hani nosali nosali pedalubo bage, dagego te wel selama, tama te dago Genuai Bidigo nai naga da olama, sa muao. 32 Dagego te wel te olo bidi dabeba geligimio. Tama dagego te deli tigi poai wel nigigio. Te Godigo tedali gasagi yai nai naga da weyu, tama dagebolo habu selibao. 33 Ma, te bidi me deligo te deli tigi poai wel nigilama, te pris meni yai olo bidi mebabolo te wel gelibaso da, teda te bidi aga te Godigo we bidi hani bidibo tomode me bidigobeo,’ te po pusao,” wali.

Denami ebo pauda po wali

34 Tialima, Genuai Bidigo Mosesbolo po ma weyu, te po wai, “Megi eno homugo dagego te wiegi yai denami yabo pauda meba nigiyąo. Te pauda te deli tigi poai dabe naga usu nama, elalumainao. Te pauda mea badi, te augwaligo te lalaigo nigai nai dabe badi, tama te bomai nai te galbanum pauda kanemego nigai me, te ni balsam kanemego nigali, te nai dabe tama sao. 35 Tama te nai dabe sesa pelama, tama te denami yabo nai pauda bugagia taluama nigao, te wiegi yai denami ilibo nai nigibo bidigo sę ebo tiwai yao. Tama tamu dwasianu te pauda denami wiegi yai tedali gasagi yai ilimainogo, te tamu muao. 36 Te nai meba te pauda tiwai mu pedelemainogo, bugagia te nai me badu haluao, tama te ugwa be tomoba eno gedude sela pelama, tama te bomai po munalubo halobage pąde muao, te ena dage dali deliba sisinabo madi. Te denami ebo nai pauda te tedali gasagi yai nai mu dao, te olo nai mu menio. 37 Tama dagego duga nai da, te homu elama, tama te tiwai nai munu me nigilamuo. Te Genuai Bidi eno nai naga dao, te tama homu naga yao. 38 Ma, bidi me deli aga homugo naga agai te denami ebo nai sanda tiwai me deli odainogo nigali da, teda te bidi aga te eno we bidi hani tomode me bidigobeo,” wali. *

<- Godigo Aga We Bidi Dabe Boi Bidi Nogode Ma Dobola Sali 29 Godigo Aga We Bidi Dabe Boi Bidi Nogode Ma Dobola Sali 31 ->