1 Genuai Bidigo po ma wadolama weyu, e tiwai po wai, “Moses, nosali nage ma peyu, nago naga ama Aron aga ogwa dabe dali augwali i wao, Nadap, me Abihu, me Eleasar, me Itamar, augwali asomainao. Tama nago augwali te Israel bage tomode selama, tama augwali eno pris bidi pedalomainogo yao. 2 Tama Aron prisgo gudabo ugwa wiegi yai tedali nigibadi, tama aga au ilama, tama gasagi yai pedelama, tama aga nogi te Israel we bidi gedude elalumainao. 3 Tama eno homu kolesaga menama, te ugwa me gasa haniani nai nigao wali, te bidi augwali i olama, tama augwalibolo po olama, tama augwaligo te Aron pris pedalobo sogo muabo ugwa nigimainao. Tama agai enade pris sę yaibao. 4 Tama augwalibolo olama, te Arongo hagawiade muabo dwasianu ugwa dage deli au ilama, hobolao po wao. Tama augwaligo au yai ugwa me deli hobolobadi, me bobage ugwa deli badi, me te au ilai holobo ugwa, me tobolude bagulabo ugwa badi, me kukulu deli tama hobolao. Augwaligo te tedali gasagi yai ugwa dabe te Aron pris dali, te aga ogwa dabe, augwaligo me te ena tiwai pris sę emainogo yabo ugwa dabe nigao. 5 Te sę bidi dabe augwaligo te husugu hobi, me mama yai hobi, augwaligo te kibu sipsip nisigo nigai, tama gol hobi me, tama wiegi yai name ugwago te ugwa dabe nigimainogo yao.”

6 “Tama augwaligo te husugu hobi, me mama hobi te augwaligo sipsip nisigo nigali, me te gol hobi selama, tama wiegi yai ugwago hobolama, bugagia au ilao. Te tobage sę ebo mu koneai bidigo naga te sę yao. 7 Tama augwaligo te ugwa daide ugwadu te ugwa dąų olaluabo kukulu si hobolao, tama kukulu te nagiba bolama, tama te tudiba abebolabo usu nama hobolao. 8 Tama augwaligo te sisi hobi, me mama hobi selama, augwaligo te sipsip nisigo nigai, tama wiegi yai ugwa dage sobadi elama, te mǫ tiwai kukulu nigao. Tama augwaligo te kukulu te ugwa sesegede kęnama, tama te ugwa dage aga tiwai elaluaibao. 9 Tama augwaligo nogi ebo wiegi yai masigi konilian si selama, te Jekopgo ogwa dabe nogo si olama sągągo si nogi mumainogo yao. 10 Tama gomunai ogwade hasia gagalama, tama te nogo si olama sągą si te sabi ogwaba te nogi mubo siminigi pao. Augwaligo te 6 nogi te me masigide mubadi, te 6 nogi te gasa masigi mede mubadi yao. 11 Nago te masigide asębo po togobo koneai bidi me delibolo te sę menama, tama agai Jekopgo ogwa dabe nogi te masigi side asęmainao. Tama dagego te gol selama, te masigi si dąų olama tolaluabo au ilabo dwasianu nai si nigao. 12 Tama te masigi si te nagide bolai elalubo kukulu siba kęnama, tama te Israel hani augwali dąį yai tiwai elaluaibao. Tama Arongo augwali nogi te aga nagide tolasa bilibaso, tama Genuai Bidi eno sulama, tama eno bidi hani te eno homugo augwali sesemane sogo kone palaibao. 13-14 Augwaligo te au yai nai dwasianu si te golgo nigibadi, tama te haliga si me golgo nigao. Augwaligo gol te dwasianu waia tiwai nigilama, tama te haliga nigibo kolesaga tiwaigo nigilama, tama te haliga si te au ilali golba kęnao.”

15 “Dagego te het prisgo hagawiade muabo dwasianu ugwa me deli nigao. Te nai da, te Godigo homu kolesaga koneainogo tiaibao. Tama dagego te tiwai nai naga augwaligo te het prisgo dwasianu ugwa dagede au ilali tiwai selama, nigao. 16 Tama dagego te dwasianu ugwa bobage ilibo usu sabo te 44 sentamita, tama aga genuai usu sabo te 22 sentamita dao. Tama bugagia tomode pobelama, te genuai agebele tiwai pobelama, tama tigidali badu me te tiwai dąį naga elaluaibao. 17-20 Tama dagego te me si me si nama hani bomai wiegi yai masigi te ugwade wasilama, kęnao. Tama hasia polalubo hani masigi augwaligo nogi wabo te rubi, me topas, me ganet, tama kęnao. Tama te hani side te masigi emeral, me sapaia, me daimon, te tama kęnao. Tama te kęnabo hani sela masigi tekois, me aget, me ametis dao. Tama te kęnabo masigi hani me si me si te beril, me konilian, me jaspa dao. Tama dagego tigidali deli deli masigide te golgo au tiwai dwasianu ilama, tama nosali te masigi dabe ugwago kęnao. 21 Tama te nogo si olama sągągo si wali te tigidali masigi deli delide dagego te Jekopgo ogwa nogi deli deli te duga Israel hani tigidali dąį ela siyu, nogi asęsę pao.”

22 “Tama dagego wiegi yai gol selama, tama haliga si te hagawiade ugwa tolaluabo haliga si nigao. 23 Tama te ring gol si nigilama, tama te habu si badu te hagawiade muani ugwa daide ugwadu muao, 24 tama te haliga si te ring side kęnao. 25 Tama dagego gasa te haliga gol si sesegede kęnama, te au ilali gol side tama gol au ilali te kukulugo te het prisgo ugwa tolalumainogo kęnao. 26 Tialima, tama dagego te ring gol me si ma nigilama, tama aiyadu habadu te ugwa elalubo madi hagawia badu te ugwa tudi pąbadu kęnao. 27 Tama dagego te ring gol me si ma nigilama, tama te si te kukulugo te ugwa tolalubo madi kęnao, te gasa wiegi yai kukulu te tabi mǫgo bagulali madi pąde, te nai kęnao. 28 Tama sisi yai string hobi selama, te hagawiade elalubo genuai ugwade ring kęnama, tama tiyu da, te hagawiade elalubo ugwa te mǫ tiwai kukulude dąų ola somainogo elama, tama te hagawiade muani ugwa te munu me peda pogobeo.”

29 “Tama Aron te Tedali Gasagi Yai Be Habuba pabo sogo, agai te Israel hani tigidali nogi elalubo te dwasianu ugwa te aga hagawiade munama, sela pomainao. Tama ena Genuai Bidi, eno te ena hani bidi dabe augwali sulama, tama eno augwali sesemane sogo homugo kone palaibao. 30 Tama te masigi si te Godigo homu kolesaga somainogo te hagawia badu muani ugwa agebele tomode munama, tama Aron te Tedali Gasagi Yai Be Habu tomoba pabo sogo, ena Genuai Bidi ena agade bidibao, aga te masigi si dali tolasa pomainogo yaibao. Sesemane sogo agai te hagawiade te muani ugwa sela asomainao, te agai eno Genuai Bidigo magi sę te Israel dabe dali yainogo ebo te agai konemai hagede yaibao,” wali. *Nam 27:21; Esr 2:63; Neh 7:65

31 “Te bobage ugwa te name ugwa dali kęnama, te dagego sisi hobi augwaligo te sipsip nisigo nigai naga selama, te ugwa nigao. 32 Dagego te tobolu muabo madi dedage nigilama, tama dwasianu ugwa dage me deligo te dedage bagulama, tama te sesegede te dedage bomo yai pedelama, tama dedage genuai peda pabuo. 33-34 Tama sisi hobi, me haniani mama yai hobi te augwaligo sipsip nisigo nigai, tama nai mebago te ni pomigranet wai tiwai nigao. Te ni wai du dabe te prisgo ugwa sese aiyadu hobolama, tama golgo nigai belo deli deli te ni pomigranet du dabe tomo tomode hobolama walalumainogo yao. 35 Tama Arongo te bobage ugwa munama, te pris sę emainao. Tama aga ena te bidibo pąba te Tedali Gasagi Yai Be Habuba aselama, tama te buluba ma teda pabo sogo, te we bidigo te belo gela wabo odomainao. Ma, agai te bobobage ugwa gudasiąbaso da, teda eno aga ela muidalio.”

36 “Tama dagego te wiegi yai gol me deli selama, te ula ilibo nai medal me deli nigilama, tama e tiwai po te naide asęao, ‘Te Genuai Bidigo Tedali Gasagi Yai Nai da,’ te po asęao. 37 Tama sisi hobi selama, tama te gol nai tobolude muani ugwade kęnama, tama te het prisgo gesabidide ugwadu munalumainogo yao. 38 Sesemane sogo Arongo te medal tobolude elalubo ugwa muao. Tama tibaso da, ena Genuai Bidi eno te Israel dabego enabolo mabo ofa ebo nai te eno saibao. Ma, augwaligo te ofa ebo kolesaga mebago geda mubaso da, teda, Arongo te tebo augwaligo dwai sę sęgę tolomainogo yaibao.”

39 “Dagego wiegi yai hobi selama, te holobo ugwa hobolao. Tama Arongo tobolude muabo ugwa wiegi yai nigilama, tama ugwa dage selama, tama mǫ tiwai kukulu nigilama, tama tede wiegi yai au ilama hobolao.”

40 “Tama dagego te holobo ugwa dabe, me te kukulu te mǫ tiwai, tama te tobolude muabo ugwa me, te Arongo ogwa dabe tigi munama, tama wiegi yai au mu ilama, tama te we bidi augwaligo gedude te Arongo ogwa dabe te nogi elaluyu, tama gasagi yai pedalomainogo tama tiao. 41 Tama Moses, nago te ugwa dabe te naga ama Aron dali, aga ogomani dali, augwalibolo muao. Tama te ni oliv wel augwaliba gelama, te augwali pris dabe da olama, sa munama, tama te pris sę enabolo augwaligo emainao.”

42 “Tama augwaligo gudabo pęwadage ugwa belibo trausis te wiegi yai ugwago hobolama mao, te augwali tigi hale te bulu ulaba hania gagolama pedabuo. 43 Tama Aron aga ogomani dali augwaligo te tiwai belibo trausis munama, te augwali alta pąba te Tedali Gasagi Yai Be Habu tomoba pelama, te pris sę ebo sogo, ma gasa sogo te augwali eno ugwa be tomoba painogo te ugwa belibo trausis munama, asomainao. Ma, te tobage sę augwaligo me isąma, te augwali tigi olo eno bidibo madi asobaso da, teda augwali dwai sę yali homu eyu, te eno augwali ela muaibao. Sesemane bidada pabo sogo Aron me, aga wąį dabe nosali pedalobo bage, augwaligo te bomo yai po wali pao,” Genuai Bidigo te po wai.