1 Tama Genuai Bidigo po dage wadolama weyu, te po wai, “Tama bidi me deligo te bulmakau, me ma te sipsip me te wi selama ela muyu, me ma agai te gasa bidigo abelemainogo yai baso da, teda dagego te kibu page bidibolo te nai wi sali bidi agai te bulmakau a naga sobadi, te sipsip me si me si sobadi elama, wei ponomainao. 2-4 Tama agai dolo ponomainao. Tiali goli, agai wei ponabo bulmakau me sipsip te meni baso da, te aga dagego te olo sę ebo bidi tiwai te gasa bidigo abelemainogo elama, tama te mone dagego selama, agai te wi sali kibu wei ponao. Tama agai te wi sali bulmakau, me sipsip, ma te bidi duabo donki, te nai dabe te agade elalubaso da, teda agai te nai si te aga te dwai sę yali wei ponao.”

“Tama nai wi sabo bidi me deligo be hulide te be daga aluama, tama gasa bidigo aga dąų olama, tama aga ela mubaso da, teda te nai wi sali bidi ela muani bidi aga te sęgę menio. Tiali goli, agai aga te siade ela muyu da, te agai bidi ela mubo sęgę elalubao.”

5 “Tama bidi me deligo aga bulmakau dabe tedela pelama, tama aga tǫde, ma te aga wain bono du gide nai tumainogo yai, tama augwaligo agai dąį bolama, tama gasa bidigo giba nai tugi pai yai baso da, teda te bulmakau page bidigo te aga gide wiegi yai nai me, te wain bono du me, te gi page bidibolo wei ponao.”

6 “Tama bidigo aga tǫde te kala siago ulai digi, tama te sia genuai pedelama, tama te dąį bolama, gasa bidigo gide elalubo te tubo nai wit, me ma te wit augwaligo togolama tama pesage holai elaluai, tama te siago dobaso da, teda te sia ulali bidigo te siago dali nai tigidali wei ponao.”

7 “Tama bidi me deligo aga doado bage meba, ma aga mone dabe te aga abagibolo menama, tama agai bugagia munalumainogo homu yai. Tama nai wi sabo bidi me deli asiyu, te nai dabe wi sai, tama nosali augwaligo aga gegelama subaso da, te nai wi sali bidigo te nai si si naga tigidali te mone sali wei ponao. 8 Tiali goli, augwaligo te nai wi sali bidi gegabo usu isąbaso da, teda te nai tonaluali bidi dagego selama, te eno geduba te po tų dodolobo bidi dabe bidibo digi pao. Tama agai te po weyu, ‘Mu tama, eno te nai wi me sabeo,’ te po wao. 9 Tama tigidali sogo bidigo po aga abagi dali te nai bulmakau, me te bidi duabo donki, me ma te sipsip, me te ugwa dabe, me gasa nai dabe hagawali po elaluai, tama te bidi augwali sigo te po weyu, ‘Te nai ena naga da,’ obaso da, teda te bidi si eno geduba te po tų dodolobo bidi dabe bidibo digi selasa pao. Tama te tibo po wabo bidi te eno aga sa mubaso da, teda te bidigo te nai si si naga te aga abagibolo wei ponaibao.”

10 “Tama bidi me deligo te bidi duabo donki, me te bulmakau, me ma te sipsip, ma gasa kibu dabe meba te aga abagibolo menama, tama agai tolalumainogo yai, tama te kibu dabe me dolo baso, me ma isiyu, me ma boi bidigo hwįyu selasa peyu da, tama bidigo te nai me susiąyu da, 11 teda te bidi augwali si te po tų dodolobo digi pelama, tama Genuai Bidi eno gedude te abagigo te po wao, ‘Mu tama, eno agai nai doliyu, ma te kibu me te eno wi me sabeo.’ Tama kibu page bidigo agai te po wabo usu da weyu, tama te abagigo agai te hagawali kibu dabe wei ponogobeo. 12 Tiali goli, meba bidigo te abagigo tolalubo nai kibu dabe wi sobaso da, teda te kibu page bidibolo te abagigo te monego wei ponao. 13 Tama te uni hasago elai baso da, teda te abagigo te kibu elama tuali, te me badu dage te aga abagibolo waselainogo sela pao. Tama agai te uni hasago elali bulmakau wei te monego ponogobeo.”

14 “Tama bidi me deligo aga abagigo te sę yabo bulmakau me deli osogo abelama, sę emainogo yai, tama te bulmakau page bidi te sogo tede bidisiąbadi, tama te bulmakau doliyu, ma isiyu me ebaso da, teda te abagigo te kibu page bidi abelao. 15 Tiali goli, te bulmakau page bidi aga te abagi dali bidibadi, tama te bulmakau dolobaso da, teda abagigo te abelegio. Tama abagi agai hasia nagebolo mone menama, tama te bulmakau sę yainogo sai digi, tama te bulmakau dolobaso da, teda agai abelegio, magi basowe, agai te hasia mani mone te usu dao,” wali.

16 “Tama bidi me deligo te gesi wegi te bidibolo noma po wasiąwai wegi, tama te bidi dali pisąbadi, tama bidigo te wegi nogo tubaso da, teda agai te we abeleyu, aga ayabolo mone menama, tama agai te we sao. 17 Tama te we aga ayago te bidigo te we sabo hagela homu ebaso da, te usu dao. Tiali goli, agai te we aga aya te augwaligo bidi dali pisąwai we abelebo mone usugo abelao.” *Bom 22:28-29

18 “Dagego te pobi nigibo we dabe ela muao.” *Bom 18:10-11

19 “Dagego te bulmakau so kibu tąbo bidi ela mubadi, tama omai kibugo te we aga tąmainogo ebo te we ela muao.” *Prs 18:23; 20:15-16; Bom 27:21

20 “Tama te we bidi augwaligo ena Genuai Bidiba naga ofa yao. Tama me deligo te tibo godiba ofa ebaso da, te dagego aga ela muao.” *Bom 17:2-7

21 “Dagego te gasa bulu tǫ bidi aselama, dage dali bidibo bidi aga dali haniani dwai kolesaga eyu, ma te sęgę agaba mugimio. Magi basowe, polobadu dage te aga tiwai te Isip tǫde bidai dao.”

22 “Dagego te aga bidi isai we dali te dwai kolesaga eyu, ma te wai puluba, augwa aya ida isai tiana wai dabe dali me te kolesaga igio. *Sai 23:9; Prs 19:33-34; Bom 24:17-18; 27:19 23 Tama dagego augwali dolobaso, tama eno augwali tau somainogo tama augwaligo gela enabolo obaso da, te eno augwaligo gela wabo mu odaibao. 24 Tama eno sębę eyu, tama te boi bidi dabego dage dali hwįmainogo ilama, tama dage elemainogo yaibao. Tama dagego we dabe te bidi meni eyu, tama te dagego wai dabe augwaligo aya meni yaibao.”

25 “Tama eno we bidi augwali mone mu menia sobaso, tama augwaligo dage dali negeli sobaso da, teda dagego te mone sabo bisnis sę ebo bidigo negeli mabo tiwai igio. Tama augwaligo te negeli sali wei ponobo sogo, te dagego gasa mone dali daganama, sigio. Mu menio. *Prs 25:35-38; Bom 15:7-11; 23:19-20 26 Tama dage dali te negeli sabo bidigo agai te negeli sali wei begelainogo te agai holobo ugwa te sa mubo tiwai eyu, dagebolo mubaso da, teda dagego te sia ge dega sisąbadi, te sogo naga te ugwa agabolo ma mao. 27 Magi basowe, agai te ugwa deli naga elaluali, te aga hulide kedau idali weyu, tigi bea sabo ugwa dao. Te ugwa nago tolalubaso da, te aga tigi magi naigo halua selama pigowe? Te eno aga tau somainogo, agai gedu haluasa po enabolo obaso da, te eno agai gedu haluasa po wabo odaibao, magi basowe, eno tigidali we bidi olo tau sabo homu kolesaga mabo dao.” *Bom 24:10-13

28 “Tama dagego dwai po God enabolo me wasiąma, tama dagego te dwai po te we bidi augwaligo tobolu bidibolo dagego te Godigo aga dolomainogo, te dwai po me wagio.” *Tpi 23:5

29 “Tama hasia dagego te gide pedalobo te wit, me bono du wain, me tubo wel, me te oliv ni du dabe me, te selama, enabolo te ofa tiwai mabo te hagela igio.”

“Tama dagego gomunai wai te ogwa te dagego enabolo mao. 30 Tama dagego te bulmakau de sipsip sigo gomunai wai te enabolo ofa yao. Tama te bulmakaugo wai, me te sipsipgo wai ame nenama, te nogo a naga olama me badu si sogo te aga ida dali hasia bidimainogo elama, tama te nogo a naga olama me badu sela wali, te me deli sogode dagego te kibu wai elama, enabolo ofa ilao.”

31 “Dage te eno tedali gasagi yai we bidi hani dao, tama tibaso, dagego te uni hasa dabe augwaligo te bulude ela muai kibu te nai mi dagego me tugio. Dagego te nai te yowi dabego naga tumainogo mao,” te po wai. *Prs 17:15

<- Godigo Aga We Bidi Dabe Boi Bidi Nogode Ma Dobola Sali 21Godigo Aga We Bidi Dabe Boi Bidi Nogode Ma Dobola Sali 23 ->