1 Te a naga sogo silama, te Ananaias aga Sisaria be naniba asali. Te bidi Ananaias te pris tobolu bidi da. Aga dali Juda dabego monu dabe me badu me asali. Te bidi me deli agai nogi Tertulus, aga me asali. Te bidi agai po tų ebo sę mu koneai bidi da. Tama augwali tigidali te gavman tobolu bidi Feliks pageba sabolama, tama augwaligo Pol po tų yabo po tigidali agabolo pusa mani.

2 Tama te tobolu gavman bidi Feliks agai te Tertulusbolo “Nago po wabo gagalao,” wali. Tama aga doligiluama, Polgo po tų yabo po gagalama, agai tama po wali, “Dago genuai bidi, hasia eno nagebolo nage usu da po waibao. Magi basowe? Nago dwagi yai kolesaga mu elalubo. Tama tibaso, da bugagia bidibo da. Nago te bomo yai po bugagia dodolama, me badu sę me dago bulu hodolabo sę bugagia dolasa pabo. 3 Tama tigidali sogo dago nage dali moni bugai homu ebo dao. Te tama tibaso, dago homu nagebolo nage usu dao po obao. 4 Tialima, eno nage dali bobobage po pusugomeo, nago sę yaga wali sągą tola sidalio. Tialima, megi eno nago da homu dene elama, da olo tau sabo po hanalu obao, nago dago pęwadage ponu pusubo odao.”

5 “Dago te bidi Pol sulama, koneani, agai da te dwai dwai kolesaga hauwa ebo bidi da. Tama dago koneani, te bidi agai tigidali Juda bidi tomode me, tigidali bulude me, hwįbo po page pabo bidi dao. Tama agai te wado po olama, tama te we bidi hani tomode pedebo bidi. Tama aga te Nasaret dwai bidi hani tobolu bidi dao. 6 Tama odao, agai dwai kolesaga dago Moni Lotu Be tempel tomode gagalama yali, te be meda ilainu, te dago Moni Lotu Be tempel bomo yai po agai bolalio. Tama tibaso, dago aga nogo tuali. [Tama dago homugo te dago bomo yai po bolalide, aga po tų ebao. 7 Tiali goli, te ami hani tobolu bidi nogi Lisias aga dali te enesigi bidi dali aselama, augwaligo te bidi dago nogode bomo mu elama, dobawai dao. 8 Tama nosali te ami tobolu bidi Lisias agai te po wai, ‘Te Pol po tų yai hagede yali bidi augwali aselama, nage gedude te po wagasao,’ wali.] Tama megi nago agai yali sę po page hanalu wabosi, tama aga digi te po page nagebolo pusaibao. Tama nago dago aga po tų yai hagede yali po page gegao,” te po wai. 9 Tama Tertulusgo te po olama, te Juda dabego me aga tau selama, “Te mu po dao, te Polbolo naga,” te po wali.

10 Te genuai gavman bidi Feliks agai nogo sibage elama, “Asao” olama, agai homugo Pol agai po omainu yali. Tama Pol aga dolalu, agai te po tama wali, “Eno nage koneanio, nage e tǫde tobolu bidi nigila bidibadi, kibu be hauwa silalio. Tama tibaso, nago dago ebo kolesaga kone dao. Tama tibaso, eno dwagi yai homu eyu, ena digi tau sabo po nagebolo pusuba. 11 Megi te poluade ena Jerusalemba pelama, Godibolo lotu po wainu yali. Te hauwa sogo silibeo, nogo si olama, sągą badu si wagi solama, sia sali. Tama nago augwalibolo hanalu wabo si, teda nago mu koneaibao, te po mu da. 12 Te sogo augwaligo ena suali, eno gasa bidi dabe dali pogo wąbi hwįyu ebe, te Moni Lotu Be tempel tomode. Tama eno bidi dabe me badu wąbi hwįabo bidi me sisinibe. Eno te tobage kolesaga tigidali bomo yai po ola mabo bede eno me ebe, te Jerusalem tǫde me ebe. 13 Tama augwaligo te po megi ena po tų ela mabo, te po mu po menio. Tama eno te dwai sę yali po page tiwai me augwaligo nagebolo ola magobeo, te po mu da wagobeo.”

14 “Tiali goli eno homugo dagebolo augwaligo ena po tų ela mani po dagebolo eno bugagia konelaibao. Ena te God wali pabo gesi tų wali pabo da. Ena God mu agabolo lotu po obao, te dago nǫųgo te lotu po wali God da. Tiali goli, bidi me badu augwaligo dago gesi tųdu wali pobaso, augwaligo homugo da Juda hani dolobo dao homu ebo. Tiali goli, eno tigidali Mosesgo asęani po me tagalobeo. Tama eno te polobadu Godigo po bukude asęnama pusa mani po eno konealubo homugo tagalogobeo. 15 Eno konealubo homugo God koneama, nosali we bidi tigidali gų pagede ma hodolaibao, te me badu we bidi dwagi yai kolesaga yali we bidi hani da, te me badu dwai kolesaga yali we bidi hani da. Tama te sę yabo sogo asobo eno tonalubao. Tialima, te Juda hani bidi me augwaligo te sę yabo sogo tonalubao. 16 Tama tigidali sogo eno tigidali we bidibolo dwai kolesaga ebo ena mu hagelabo. Eno Godigo gedude me, we bidi tigidaligo gedude me dwagi yai kolesaga naga yai hagede, eno te sę bomo ebo da,” Pol agai te po wai.

17 Te bidi Pol agai po me tama wali, “Te polobadu ena Jerusalemde bidama, nosali gasa buluba pelama, kibu be me si me si nama silama, ena Jerusalemba tamadi ma pali. Te sogo ena peyu, eno ama dede Jerusalemde bidibo bidi tau sai hagede, mone ge dali selasa pali. Eno homu me eno Godibolo hasa elama, Godibolo nai ula mabo kolesagadu wali pomainu yali. 18 Tama ena te Moni Lotu Be tempel tomode te sę ebadi, augwaligo ena suali. Te God gedude dwagi yai bidabo lotu sę eno ela silama, augwaligo ena suali. Tama bidi dabe me badu sisinama, po dagą olo dali weyu, te ena dali hwįyu yabo bidi hani me sisinai menio. 19 Tiali goli, Juda hani me badu te Esia tǫde bidibo bidi hani aselama, te Moni Lotu Be tempel tomoba asali. Tama augwaligo ena dali te po wabo page bidi dabe da. Tama te Juda dabe augwaligo homu ena po tų ela magi sogo da, teda augwali nago pageba aselama, ena po tų wagasigi da. Augwa po elalubaso da, magi homu elama, augwali magi baso nage pageba te po polo wagasobewe? Magi basowe? Augwaligo po menio. 20 Tiali goli te bidi dabe eba sabolali bidi dabe, augwaligo nagebolo eno dwai kolesaga yali po pusao wao, te eno moni kaunsil bidi gedude dolalubadi yali sę po pusao. 21 Tiali goli, augwaligo eno dwasianu yali sę me delide wado ebao. Eno te moni kaunsil bidi dabe gesabide tomode dolalu, eno te po wai dao, ‘Eno homugo God mu konealubo da, te isali we bidi tigidali Godigo gų pagede ma hodolaibao. Tama tibaso, dagego ena po tų ela mabo,’ eno te po wai,” Polgo te po wai.

22 Te bidi Feliks agai te Genuai Bidi Jisas wali pabo tų po bugagia koneani. Tama agai te Juda bidi hanibolo te po tama ola mani, “Te ami tobolu bidi Lisias asobode, eno dagego te po tų ebo dodolaibao.” Agai te po tama olama, te po tų yali tagalama, nosali po tų ma yainu tonaluali. 23 Tama Feliksgo te ami hani genuai bidibolo te po wai, “Pol kalabusiba muao. Tiali goli, nago Pol kalabus bomonama egio. Pol aga abagi dabe aselama, aga suagaselama, nai dabe me magasomainao,” te po wai.

24 Te nosali hauwa sogonu silama, Feliks dali aga we dali asai, te we nogi Drusila, te Juda hani we da. Augwali si aselama, tama augwaligo Pol i wai. Tama Pol aga pageba asali. Tama Pol agai augwali sibolo te Jisas Krais teba homu mubo po page ola mani, tama augwali sigo odali. 25 Tiali goli, Pol agai te po ola mayu, te po wai, “Tigidali we bidi dwagi yai doloba pai kolesaga mu elama, bugagia tonaluao, dagego dwai kolesaga egio.” Tama agai te po wali, “Godigo we bidi tigidali po tų yaibao,” wali. Tama te sogo Feliks agai te po odama, agai wi mu elama, agai Polbolo te po wali, “Nage megi te kalabus beba ma pao. Tama nosali me sogo eno sę meni baso, nage eno i obaso da, te nage ena pageba asagameo.” 26 Tama Feliks agai homugo Pol agai mone dualama, geme menama, agai kalabus ebo tagalamainu, te homu yali. Tama tibaso, agai Pol hauwa sogo i olama, aga dali po wali.

27 Te Feliks agai homugo te Juda hani bidi dabe dali abagi olama, bugagia bidainu homu yali, tama agai Pol kalabus bidibadi sula tagalali. Tama kibu be si silama, te bidi Porsius, aga nogi me Festus, agai Feliksgo sę hasegelama sali, te moni gavman sę. Tama Feliks gasa buluba sę egi pali.

<- Godigo Sęba Tagala Palai Bidigo Po 23Godigo Sęba Tagala Palai Bidigo Po 25 ->