1 Nosali gana dwasianu, Ahitofelgo te tama po Apsalomba wai, “Te nago usu da obaso, te eno te bidi sese hauwa, te 12,000 bidi selama, tama megi hulide te ena dali te bidi dabe dago te Devit pali wali pomainu ilaibao,” te po wai. 2 “Megi da, aga poma peyu, tama haliga sęgę elalubadi, te eno aga dali hwįgi paibao. Te aga dwai noma siyu, tama aga hani bidi dabe wi pabo si da, tama eno te king deli naga ela muaibao,” po wali. 3 “Tama eno agai hani bidi tigidali te eno nageba ma odasa asaibao. Te augwali te we me deli te megi tamadi sai wego tama aga bidide dwai haliga sębę ebaso, te wi pabo tiwai yali, tiali goli nosali te aga bidiba ma asobo tiwai gilama emainu yaibao. Te nago homugo te Devit wali pali we bidi te nageba ma odasa asomainu ebo homu elalubao. Tama tiyu, nago te Devit ela mumainu homu elama, tama te we bidi dabe bugagia bidimainu homu elalubao,” wali. 4 Apsalom dali, te Israel dabego tonalubo bidi dabe daligo te po odama, tama augwa homugo te wiegi yai homu mu da homu yali.

5 Tama Apsalomgo te tama po wai, “Te Husai me i olama, te aga homude elalubo po pusagaselama, te dago odaibao,” wali. Tialima, augwa aga i olama, asali. 6 Husai asobo si da, tama Apsalomgo te Ahitofelgo wali po tigidali te agabolo walali. Apsalomgo agaba te tama po olama da, teda Apsalomgo te Husaiba hanalu wali, “Te homu dago wali pobaso, te usu egowe, ma meniwe? Te meniyu da, teda nago te dabolo te mena sę yabo po te nago dabolo walao,” wali.

7 Husaigo te tama po Apsalomba wei ponani, “Te megi Ahitofelgo nageba te mani homu kolesaga te wiegi yai me ebeo. 8 Nago koneani, naga aya, Devit, te aga ami bidi dabe dali, augwali te hwįbo bomai bidi dabe dao. Augwali te haliga sębę dwai mu elama tama bidibao, te so hasa beago te aga wai dabe tigidali te bidigo wi sela paide te haliga sębę ebo tiwai elalubao. Te nago ayago te hwįbo kolesaga mu koneani, tama tibaso, aga te we bidi dali hulide piainu eyu, te usu me egobeo. 9 Te megi da, aga te bulu du genuai tǫ dedagede, ma gasa pedai badu me, te geme dualalubo homu ebao. Tama te megi dago hwįgi pobaso, tama augwaligo te dago ami bidi meba elibaso da, teda te we bidi dabego te sę yali po odoyu, tama augwa te tama po waibao, ‘Te Apsalomgo hani te dwai sę yabo sogoba mu gegali da,’ po wabuo. 10 Tama nago te gasa ami bidi dabego te tama po odama, tama te wi dwai mu eyu, te augwa digi te hwįbo bomai bidi elalu, tama augwa te laion tiwai gilama te bomai bage dolalu, te tagala weyu godolo meni yani. Te Israel bage tigidaligo koneani, te nago aya te polalubo ami bidi mu, tama agai bidi dabego te bomonama mu hwįbo dao,” wali.

11 “Tialima, eno homu da te tama tiwai, nago te Israel bulu tǫ pedai tigidali badu te tigidali bidi i olama, tama augwali sisinama, tama augwali umabo mu pedelama, te tamu ąį masigi kemi tiwai pedalumainu emainao. Tialima, te naga digi polasa peyu, tama dagego te Devit dali hwįgi piąo,” wai. 12 “Te dago Devit gegi pelama, te dago menade te aga dali deliba gesabidi unulubaso da, teda dago agai haniba te hwįbo sę umabo mu ilaibao. Te augwaligo da palibaso, te usu me egobe, te hulide tǫba dulubo segene wę te bidigo palibo usu isiąbo tiwai gilama yaibao. Tama dago te Devit dali, te aga hani dali tigidali elama, tama me deli te me bidigobeo. 13 Tiali goli, te aga hanu me deli tomoba wi pobaso da, teda da Israel ami bidi dabego te baklain bono selama, tama te bono dabe te hanu bagulali obode gebelama, tama te hanu te odogo buluba kekelama, tama te tigidali dolaibao. Tama te hanu bagulali masigi te dwasianu elalumainu me egobeo. Mu menio.” Husaigo te po wali.

14 Husaigo po ola siminibo si da, teda Apsalom dali, te tigidali Israel dabe daligo te tama po wai, “Te Husaigo homu kolesaga te wiegi yai mu elama, tama te Ahitofelgo homu kolesaga te aiyaba elalualio,” te po wai. Genuai Bidigo te augwaligo homu te Husaigo homu kolesaga wali pomainu ilali, magi baso meni, Genuai Bidigo te Apsalom dolabo homu dola sai elaluai. Te mu tama, te Ahitofelgo homu te wiegi yai po wali, tiali goli Genuai Bidigo augwaligo te homu kolesaga wali pomainu me ilibeo.

15 Te po minama nosali, Husai pelama, te pris Sadok me Abiatar siba te po waligi peyu, te agai Apsalomba me, te Israel dabe tobolu bidi dabeba dali mani po te wagi pali. Tama agai augwali siba te Ahitofelgo yali homu kolesagade po me wai. 16 Tama agai te tama po wali, “Te dage sigo te po asesa, te Devitba ola toliąo. Te tama po agabolo wao, ‘King, megi nage te Jordan wę nogeabo bulu pąde me pigio,’ po wao. ‘Nago te wę asesa nogelama, tama te wę u badu pedaiba polo pao. Tiyu, augwali aselama, te nage me, naga hani dali, tigidali ela muabuo,’ dage sigo te po Devitba ola tolao,” Husaigo te po wali.

17 Jonatan de Ahimas si te Jerusalem obo bogo badu te wę Enrogelde tonalu, bididuali. Augwali si te pris sigo ogwa dao. Te augwali te hanu tomoba soabo te we bidi dabego augwali si suidali homu eyu te hagela yali, tama augwa si te bulu badu geme dualaluali. Tama te sę ebo we me deligo te hanu tomode ebo sę po te augwali siba wagi peyu yali, tama augwali pelama, te po te Devitba wagi peyu yai dao. 18 Tiali goli, te sogo te gesi ogwa bidi me deligo augwali si sulama, tama te Apsalombolo wagi pali. Tama augwali si asesa polo te Bahurim bulu bidi me deligo beba palio. Te bidigo be pąde te wę ulu me deli elaluali, tama Jonatan dali Ahimas si te tǫ dedage tomoba pelama, geme dualaluali. 19 Tama te bidigo wego te name ugwa me deli selama, tama te wę ulu dedage dalalubo te mesegelali. Tama agai te wit meba selama, tama te ugwa daide ugwadu muna muna palio. Te augwali geme dualalubo, te bidi dabego konesiąmainu ebo tiwai ilalio.

20 Nosali, te Apsalomgo bidi mebago te augwali si soali wali aselama, pedalagasu, tama te weba te tama po hanalu wali, “Ahimas me Jonatan si menade bidibawe?”

Tama wego te tama po wali, “Augwali si te wę nogelama, palio.” Tialima, te bidi dabego te Jonatan de Ahimas si gegegi pali, tiali goli augwaligo te augwali si me subeo. Tama tibaso, te Apsalomgo tagala palali bidi dabe augwa te Jerusalemba ma geasa palio. 21 Te ofisa dabe augwa ma geasa pai madigi, Ahimas de Jonatan si te tǫ dedagede dualaluali tagalama, tama buluba teda soalio. Tama augwali si te hogodama, te Devit bidibo madiba palio. Tama augwali sigo agaba te tama po wai, “Nage ede me bidilamuo. Nago te naga hani tigidali selama, tama asesa, tama te wę nogelama, te u badu pedaiba pao,” wali. Tama nosali, augwali sigo te Ahitofelgo aga dolainu wali po tigidali te Devitba walali. 22 Devitgo te po wabo oda selama da, teda polo tama mu te aga hani selama, tama augwa te wę Jordan nogelama, u badu palio. Tama be posobode, tigidali pela silalio. Te me deli tede me bidibeo.

23 Ahitofelgo te Apsalomgo agai po wali pabo susiąbaso da, tama aga donkiba duagi pelama, tama aga hanuba digi ma geasa pai. Tama aga pelama, te aga we waigo tigidali doado bage me, te aga bisnis me, te tigidali dodolama, tama nosali aga digi te aga ba bonoba walama, tama isalio. Tama aga hani sibi dabego te aga tigi selama, tama aga ayago gų pageba pubaligi palio.

24 Tialima, Apsalom dali, te Israel ami bidi dabe dali, te hogodama, Devit pali wali pobeali. Tiali goli, Apsalom te Jordan wę nogebo sogo, Devit te aga hani bidi dabe dali te hanu taun Mahanaimba sabolalio. 25 Apsalomgo te Amasago te Joapgo pesage selama, te aga ami dabego polalubo ofisa bidi nigilali. Amasa te Jetergo ogwa dao. Jeter te Ismael hani bidi me deli, tama agai te we Abigel sali, te Nahasgo wegi da. Tama Seruia, te Joapgo ida, aga te Abigelgo ama dao. 26 Tialima, Apsalom te Israel dabe dali te Gileat bulu tǫ pedaiba sabolama, tama tede te bidabo pesage nigalio.

27 Tama Devit te Mahanaimba sabaligi pabo sogo, te bidi selago agaba gesabidi deliba unulagasali. Te augwa nogi te tama. Sobi, te Nahasgo ogwa. Sobi te Raba hanu bidi, te Amon bulu tǫ pedai bidi dao. Tama Makir, te Amielgo ogwa dao. Makir aga te Lodebar hanu bidi da. Tama Barsilai, te Rogelim hani bidi, te Gileat bulu tǫ pedai bidi dao. 28-29 Augwaligo te plet, me sospen, te tǫgo nigai sene, me te bet dabe, te tama nai meba seselama, te Devitba me te aga hani bidi dabeba mawainu sela asai. Tama augwaligo te nai me meba sesali, te wit me, bali me, plaua me, tama augwa te siade ulai wit me, tama gasa tobage tagabi si me, hani me, te bulmakau ame pę me, tama te bulmakau ame pęgo nigai nai sis me, te tama nai sesela magasalio. Tama augwa te sipsip meba me sesali. Augwa koneani, Devit te aga hani dabe dali te wa pai bulu te bobage sunumidu aselawali homu yali, tama te tialigo te Devitgo hani te nasi ilama, tama dogoni wa palama, tama augwali tigi te bomo kimi mu meni yani homu yai. Tama tibaso, augwaligo te nai dabe augwaliba sesali, augwa te nai tumainu elama, tama bomo ma somainu, tama tiai dao.

<- Profet Samuelgo Po Elalubo Buku Si 16Profet Samuelgo Po Elalubo Buku Si 18 ->