1 Te king Joram aga te Jesril hanude bidibo sogo, te Godigo po pusa mabo profet bidi Elisago te gasa ogwa bidi profet bidi me deli i olama, aga pageba asai, tama agabolo e tama tiwai po wai, “Naga name ugwa bugagia gudama, tama nage e dwasianu botol te oliv wel yai nai sao,” wali. “Tama nage hodolama, te Ramot hanuba, te Gileat tǫ, te moni hanuba pao,” wali. 2 “Tama nage te Ramot hanuba sabalobo sogo, tama nage pelama, te Jehu kegegi pao,” wali, “Jehu aga te Jehosafatgo ogwa dao, tama te Jehosafat aga wąį nǫų Nimsigo ogwa da. [a] Tama tialima, aga te aga abagi hasi dali augwali deliba bidibaso da, awe, tama tibaso da, teda nago aga selasa, gasa be habu me deliba aga odasa pao. 3 Awe, tama te botol wel selama, tama te wel aga toboluba geliyu, e tiwai po agabolo wao, ‘Genuai Bidigo aga digi nagebolo te po obaso, aga digi nage te Israel hanigo king bidi bidimainu dąį ilibao,’ tama wao. Tama nago te sę elama silibo si, tama te tų dala salama, nage polo wi pao,” wali.

4 Elisago te po ola silama, tama te ogwa bidi profet bidi hodaluama, te Ramot hanuba pai. 5 Tama te aga sabalobo sogo, agai te tonobadi yaide, te Jehu aga dugulalu, te aga gasa ami ofisa bidi dabe dali po miyu bidibo suali. Tama agai e tama po wali, “Ofisa, eno po me deli elalubo.”

Tama te Jehugo agabolo hanalu wali, “Nago te po de dali wabo elalubowe?”

Tama te profetgo te po wai, “Eno po nage dali wabo elalubao.”

6 Awe, tama tialima, augwali si te be me deli habu tomoba augwali pai, tama te profet bidigo te oliv wel selama, te Jehu toboluba te oliv wel gelaliyu, agabolo e tama po wai, “God, Israel we bidi dena Genuai Bidigo, te po tama wai, ‘Megi eno nage dąį ilibo, te nage Israel we bidigo king bidi nigilibao,’ wali. ‘Tama nago eno te we bidi dabe augwali nago tonaluao. [b] 7 Tama nago te Ahap hani augwali nago elama isilao, te king nage polobadu te nage gavman ofisa bidi bidai dao. Tama tibo kolesagago eno wei ma dolo te kwin we Jesebel agaba wei ma begelaibao. Te wego polobadu agai te eno profet bidi dabe me, tama me te eno te gasa sę ebo bidi dabe me, ela muai dao. 8 Tialima, eno te Ahap aga deli hani me te aga hani tigidali dola silaibao. Mu tamao, eno te tigidali bidi te Ahapgo hani te Israel haniba wadolali bidi me, te eno homugo te tigidali silaibao. Tama augwali te ogomani me, o te genuai bidi me, mu silaibao. 9 Tama eno augwali dali deli kolesaga naga yaibao, tama te polobadu eno te king Jeroboam aga hani dali silali yaligia gagawai yaibao, Jeroboam aga te Nebatgo ogwa da, te king Basago deli hani dao, te Basa aga te Ahiyago ogwa dao. 10 Tama te Jesebel isibo si, te agai tigi selasa pelama, pubaligi pabo bidi menia saibao. Mu meni. Tama agai tigi te yowi dabego tueibao, te Jesril hanu pąde.’ Genuai Bidigo te po wai.” Te profet bidigo te Genuai Bidigo po Jehubolo pusa silama, tama aga te be tų dala sąnama, tama aga wi pai. [c]

11 Jehu ma geasa pelama, te gasa gavman ofisa bidi dabe augwali bidiboba sabalobode, te ofisa dabe augwaligo agabolo e tama po hanalu wai, “Magi nai me deli pedalaliwe, a? Magi baso te e wabo pabo bidigo asama, nage suagasaliwe?” wali.

Tama Jehugo te po wei ponoyu, e tama po wai, “Dagego koneanio, te tama tibo bidi dabego augwaligo kolesaga. Augwaligo te po subigilama po wabo dao,” wali.

12 Tama augwaligo te po wali, “Polo tama, nago da dali wabo po dolo mu wao. Tama nago te ili po olama, te po dualobo tagalao,” wali.

Tama tialima, te Jehugo po dolo mu te ofisa bage dali pusuyu, e tama po wali, “Te bidi asama, enabolo wagasali po e tama po walio, agai ena te Israel hani tonaluabo king bidi dąį ilalio,” wali.

13 Te ofisa bagego te po odobo si, polo tama augwaligo te bobobage bulubo ugwa dia sasa pelama, tama augwaligo te be togobiliba hagalu pai, tama te Jehu te be togobili ugwa badu mu dolalugi ulali. Tama augwaligo te bu wabo nai biugel selama, te bu weyu, te i weyu, te po wai, “Te Jehu te king nigalio,” po wai.

14-15 Jehu te Ramot hanude bidiyu, tama te aga sę ebo gavman ofisa bidi dabe dali po minama, te po dąų walu, te po wai, “King Joram elama, isilaibao,” wali. “Tama te aga bidali pesagede ena king nigilama bidaibao,” wali. Tiali goli, Joram te Jesril hanude me bidali. Magi basowe, aga te Israel hanigo te Siria hanigo king Hasael dali hwįani sogo, Joram aga me tama te ene dolai gasi munalu bidai, tama aga te gasi sana pesiąbadi. Tama tialima, Jehu aga sę ebo gavman ofisa bidi dabe augwali dali e tama po wali, “Tialima, dagego ena dali deli homu eyu da, awe, teda dage bugagia tonaluao, tama bidi me deligo te Ramot hanu tagalama, tama te Jesril hanuba pelama, tama te dena homugo ede yabo sę po te Jesril hanuba pusigi pigio,” wali. 16 Awe, te Jehu te aga hosgo kegebo karis nai ugwa badu daiba hola pali, tama aga dali, te me badu soldia ami bidi dabe dali, te augwali te Ramot hanu tagalama, tama augwali te Jesril hanuba pai. Te king Joramgo gasi usu esiąbadi pai. Tama tibaso, aga bet saiba pigi ulali, te Jesril hanude. Tama te sogo te Juda hanigo king bidi Ahasia aga te Jesril hanuba te king Joram suagasiyu asai. Tama tialima, aga si talua si te Jesril hanude bidibadi.

17 Tama te bidi me deli te Jesril hanu genuai masigi obode nigai bobobage sigi be te be tomoba bula selama bidiyu, te digibulu asobo bidi suainu tonalubo dao. Tama te bidigo tonobadi yaide, te king Jehu aga hani dali asobo suali. Tama agai i olama, tama te taun tomode bidibo bidi dabebolo e tama po pusai, “Eno suali, te geninama bidi mu asobo,” wali. Te bidi dabe augwaligo te Jorambolo te taun tonalubo bidigo wali po agabolo wali. Tama Joramgo augwalibolo e tama po wali, “Te ami soldia me delibolo olama, te aga pelama, te hos kibu me deli sigi pao, tama aga tede dugulama, tama aga udulama peyu, tama augwali asobo tomoba tiąba pelama, tama agai augwalibolo e tama po hanalu omainao, ‘Dage dwagi yai homu eyu asaliwe, ma meniwe?’ te po aga hanalugi pao, “te po wali.

18 Awe, tama tiali, te ami soldia bidi me deli te kibu hosde dugulama, tama aga udada peyu, tama augwaligo te Jehubolo sisinigi pelama, tama agai e tama po wali, “King Joram agai homugo koneaio, dage dwagi yai homu eyu asaliwe, ma meniwe?”

Tama te Jehugo e tama po wei begelali, “Te nago nai menio. Nage da wali naga asao,” wali.

Tialima, Jesrilde bidibo te tonalubo bidigo suali, ma te ami soldia bidi ma begasa asobe, tama tibaso, agai te kingbolo e tama po ola tolali, “Te ami soldia bidi nago tagala palali bidi, te bidi aga te pelama, augwali pageba sabolali. Tiali goli, aga polo ma begasa asobeo,” wali.

19 Tialima, kingo te gasa ami soldia bidi me tagala palali, tama te ami soldia bidi augwali pageba pedalobo sogo, te ami soldia bidi agai me te king Jehubolo e tama po wali, “King Joram agai homugo koneaio, dage dwagi yai homu eyu asaliwe, ma meniwe?” wali.

Tama Jehu agai te po wei ponoyu, e tama po wai, “Te nago sę menio. Nage da wali asao,” wali.

20 Te taun tonalubo bidigo te tagala palali ami soldia bidi ma geasa asobo subeo, tama agai te king bidibolo e tama po ola tolali, “Te nago te tagala palali gasa ami soldia bidi, te ami bidi aga me asobeo. Tama eno suali, ma te bidi te karis naide bidibo suali, tama agai te wabo pabo kolesaga homu mu ebao, te Jehu te Nimsigo hani, augwaligo koneama te tiwai kolesaga ebo da, augwaligo te hos kibu augwali bomonama mu udayu, tama te karis gegasa asobao,” wali.

21 Tama tialima, te king Joramgo te po wali, “Eno karis dodolao,” wali. Awe, tama augwaligo te Joramgo karis dodolama, tama te Joram aga te karisba hola solama, dugawai, tama te king Ahasia aga me te gasa karis meba hola solama dugayali, tama augwali si udulama peyu, te Jehu asobo tomoba tiąba pali. Tama augwali sigo te Jehu te Jesril bidi Nabotgo tǫ pąde asobadi, teba tiąba pai. 22 Tama te Joramgo Jehu suali, agai te Jehubolo e tama po hanalu wali, “Te dage dwagi yai homu dali asaliwe, ma meniwe?”

Tama te Jehugo te po wei ponoyu, e tama po wali, “Magi yaliwe usu elalubao,” wali, “tialima, naga ida Jesebel, agai te tibo god wali pabo sę eyu, tama te dwai kolesaga eyu, tama te bidi isibo pobi enebo sę ebo dao,” wali. “Naga idago te tama tibo dwai kolesaga ebo sęgę te genuai mu pedalobao,” wali.

23 Jehugo te wali po te Joramgo odama, tama aga te karis begelama, tama polo wi pai. Tama agai te king Ahasia i weyu, e tama i wali, “Ahasia, te asali bidigo ena aiyaba elaluainu ebao,” wali.

24 Tialima, te Jehugo aga enesigi polo bomonama kegelama, tama te ene toga peyu, te Joram tudide dolali. Tama te enego aga hobolu dude dolali. Tama te Joram aga te karis daide tulaluama, tama te Joram aga isali. 25 Tama te Jehugo te Bitkarbolo te po walali, te aga dali bidiyu sę yali gavman ofisa bidi, e tama, “Te Joramgo tigi sagaselama, tama te bidi Nabotgo tǫba sągi pao,” wali, “te Jesril bidi. Te Genuai Bidigo te polobadu king Ahapbolo pusa mani po nago me konealubawe, Joram aga aya? Dadi si te Ahap wali pobao, te dadi sigo karis me tama te Genuai Bidigo te Ahapbolo e tama po wali, 26 ‘Tialima, te do tama eno suali, ma te bidi dabe augwaligo te nago homugo ebo kolesaga tų wali peyu, tama augwali te Nabot aga wai buluba dali te augwaligo elama isilalio, tama teyu, te ena Genuai Bidi dao, te eno mu po tama obao, tama te nago te Nabot tǫde yali dwai kolesaga te eno nagebolo dolo mu wei begelaibao.’ ” Tama te Jehugo te Bitkarbolo e tama po ma wali, “Te Joramgo tigi selama, tama te Nabotgo tǫ naga tama sągi pao, te Genuai Bidigo poba usu nigi peyu, tama tiao,” wali. [d]

27 Te Juda king Ahasiago te Joram isibo suali, tama aga te aga karisde bidibadi yaide, tama tibaso, aga te Bethagan hanu pedai badu wi pai. Tama te Jehu aga ami soldia bidi dabe daligo te Juda king Ahasia pobeai, tama te Jehugo te aga ami soldia bidi dabebolo e tama po wali, “Te king aga me enao,” wali. Awe, tama tialima, te king aga karisde dugula selama, te Gur bulu duba ugwaba udada holobadi yaide, tama augwaligo aga enani, te Ipleam hanu pąde. Tiali goli, te king Ahasia aga wi peyu, te Megido hanu pedai badu wi pai, tama nosali aga isali. 28 Tama te aga sę ebo gavman ofisa bidi dabe augwaligo te aga tigi sagaselama, tama te karis me deliba munama, tama te Jerusalem buluba selasa pali. Tama augwaligo te augwa wąį nǫų pubalobo gų pageba pubaligi pai, te Devitgo hanude elalubo madigi pubulali. 29 Joram aga te Israel dabego king bidi bidiyu, tama te nogo si olama, te sągą badu deli wagi soabo kibu be silali sogo, te sogo te king bidi Ahasia aga te Juda hanigo king bidi nigilama, pedelali.

30 Tama te Jehu aga hani dali augwaligo te king Ahasia pobeasa pelama, tagaligi pai, tama augwali ma te Jesril hanu tųdu ma begasa asai. Tama te kwin we Jesebel te bulu pedai badu bidibo da, tama agai po odali, e tama po wai, Joram isai dao wali. Tama tialima, te kwin we Jesebel aga te gedude me, te aga tobolude me au yai, tama tilama, te kingo sigi be te dwasianu windo tųde dolaluyu, te tųba aiyaba tonaluai. 31 Tama te Jehu aga te taun te moni tų badu te taun tomoba asai, tama te kwin we Jesebelgo aga dolo i weyu, e tama i wai, “Simri, nage naga genuai bidi ela mubo bidi dao, nage bugagia bidibawe, a?” [e]

32 Jehu agai te po wabo odama, tama agai te beba te dwasianu windo tų elalubo madigi te agai ugwaba tonani, tama agai e tama i wali, “De nage eno haniba asaibawe?” Tama te me badu sę ebo bidi dabe augwali te kingo te bede bidali bidi dabego te Jehugo wabo po odama, tama augwali te bede te dwasianu windo tų badu dolagaselama, tama augwaligo te Jehu agaba aiyaba tonani. 33 Tama Jehugo augwalibolo e tama po wali, “Te we eba eda sąyao,” wali. Tama augwaligo te Jesebel selama, tama te we aga aba sąwai. Tama agai kanemego dobola sąyu, tama te kanemego tama te bede me te kaneme dagana sali, tama te Jehugo hos kibude me te kaneme dagana sali. Tama Jehugo te hos kibugo me te karisgo me te Jesebel tigidu agaga pali.

34 Nosali te Jehu aga te kingo be tomoba pelama, te nai tuai. Tama aga nai tuyu, tama te wę tuyu elama, tama agai te bidi dabebolo e tama po augwalibolo wali, “Godigo te po wai dao, te dwai we dolao, wai dao. Tiali goli, te we aga aya te king me deligo wegi dao, tama tialima, dagego te we agai tigi selasa pelama, pubaligi pao,” wali. 35 Tama augwaligo buluba pelama, tama te wego tigi siyu, pubulainu yali. Tiali goli, augwaligo te wego tigi munalubo sube, menio. Augwaligo te suali, te tobolu dili dali, te nogo sawali dili badi, te sągą sawale dili badi elama munalubo suali. 36 Tama augwali ma begasa pelama, te Jehubolo te sę yali po pusugi pali, tama agai e tama po pusali, “Te sę te Genuai Bidi God aga sę ebo bidigo pedauwalidu wali podu dolo mu pedalali, te Elaija aga te Tisbe hanude bidali bidi dao. Genuai Bidigo e tama po wai dao, ‘Te kwin we Jesebel isibo sogo, te yowigo agai tigi tueibao,’ wali, ‘te Jesril hanu tǫde tiaibao. [f] 37 Tama te agai tigi pebeda pai mu, te yowi di gagawai mu te tǫde munalua pabo sueibao, tama tiwai munalua pabo te bidi dabego sueibao, te augwaligo te Jesebel tigi te yaba wabo augwaligo munu me konebe,’ Genuai Bidigo te po polobadu wai dao,” Jehugo te po wai.

<- Te Israel me Juda Hani Sigo Tuni Bidigo Po Elalubo Buku Si 8Te Israel me Juda Hani Sigo Tuni Bidigo Po Elalubo Buku Si 10 ->