Te Israel me Juda Hani Sigo Tuni Bidigo Po Elalubo Buku Si 14

Te bidi Amasia aga te Juda hanigo king bidi nigilali

(2 Sto 25:1-24)

1 Jehoas agai te kibu be si pali, aga te Joahasgo ogwa da, aga te Israel hanigo king bidi bidali, Amasia, aga te Joasgo ogwa da, tama aga Juda hanigo king bidi nigilama bidali. 2 Agai kibu be te 25 kibu be elalubadi, te aga king bidi pedelali, tama aga te king bidi nigilama, te Jerusalemde bidali kibu be e tama da, te 29 kibu beba usu nigi pai da. Aga ida, aga nogi Jehoadin, te we te aga bulu te Jerusalem moni taun bage we dao. 3 Te king Amasia agai te Genuai Bidigo gedude dwagi yai kolesaga yali, tama tialima aga aya Joas agai tama sę yali, tiali goli agai aga wąį nǫųgo te king Devitgo yali gilama te dwagi yai kolesaga gagawai me ebe, Devit agai yali gilama. 4 Magi baso meni, te king Amasia agai te augwaligo te tibo godiba lotu po wabo pesage te king Amasiago me dolobeo. Tama tibaso, te tigidali we bidi dabego me sę eyu bidali, te augwaligo te lotu po wabo bulu du pesageba pelama, tama augwaligo te tibo godiba te denami yai ofa nai ula mayu, tama me te wiegi yai hano holama denami ilibo pauda ulubo sę iduali.

5 Tama te sogo king Amasiago te Juda hanigo bulu bomo mu elama tonaluali, agai tama po wali, “Te eno aya elali gavman ofisa bidi elama, isilao,” wali, tama augwaligo augwali elama, isilali. 6 Tiali goli, agai te gavman ofisa bidigo wai dabe da me elebe. Menio, tama agai te bidimainu sulama tagalali. Agai Genuai Bidigo bomai po te Mosesgo te polobadu Israel we bidibolo mawai, te bomai po elalubo bukude sulama, wali pali. Te Genuai Bidigo po e tama tiwai, “Tialima, bidi me deligo waigo kolesaga geda mugi sobaso da, teda dagego te wei begelama, te aga ida aya ela mugio. Tama tialima, aga ida ayago kolesaga geda muai baso da, teda dagego te ida aya naga dagego ela muao. Dagego te kolesaga wei ponoyu, te augwaligo wai puluba ela mugio. Bidigo kolesaga dwai ebaso da, te aga deli naga ela muao,” te asęani po te Amasiago wali peyu yali. [a]

7 Tama me sogo deli te king Amasia dali, te aga ami soldia bidi dabe dali, augwaligo te Idom hani te 10,000 ami bidi dabe dali boi hwįgi pali, te Idom bulu odogo malu te umabo tamu elalubo madi hwįani. Tama augwaligo te Idom hani aiyaba elaluama, tama augwaligo te taun Sela sali. Tama te king Amasiago te taun nogi poali, te taun nogi Joktel. Tama te megi tama e po asębo sogo me, te augwaligo te king Amasiago te gesi nogi poali te nogi naga wabo dao.

8 Tama te king Amasiago te me badu bidi dabe te king Jehoas pageba tagala palali, te bidi te Israel bagego king bidi da. Te king Jehoas te aga aya te Joahas, te Joahas aga wąį nǫų te king Jehu dao. Tama te tagala palali bidi dabe augwali pelama, te king Jehoas pageba sabolama, tama augwaligo agabolo e tama po ola mani, “Te king Amasiago te agai homugo te Israel bage dage dali hwįaibao walio,” wali.

9 Tialima, te king Jehoas te po wei ponoyu, Amasiabolo e tama po page po digi po begelama pusali, “Te Lebanon bulude, te sesane yai nosaigo te po ola tolali, te moni ni me delibolo, te ni nogi bǫ, tama agabolo e tama po wali, ‘Eno homugo nago te wegi te eno ogwa me magameo, ma aga si selama, tama bidimaio,’ wali. Tiali goli, nosai te bulu uni hasa me deli te pedai badu biliyu, tama te nosai te uni hasago agayali, tama te nosai agalama dolali.” 10 Te king Jehoasgo te po digi po begelama pusali, tama agai king Amasiabolo e tama po wadolama pusali, “Eno koneanio, nago te Idom hani augwali dali tama te nago boi hwįnama, tama augwali aiyaba elaluai dao. Tama tialima, te nago bugai homu pemene mu gana peyu, tama nago naga digi naga nogi ugwaba siyu, te wabao,” wali. “Nage genuai nogi sali, te nago te boi hwįanide saliąo,” wali, “tama tialima, megi te nage naga bulude bugagia bidiyu, tama nage bugai homu pemene yao. Tiali goli, te nago da dali boi hwįainogo ebadi, te menio. Naga digi dolabuo, nago tama teyu, te Juda hani augwali me dolabuo,” tama wali.

11 Tiali goli, te king Amasiago homugo te king Jehoasgo wali po odobe. Tama tibaso, te king Jehoas dali, te Israelgo ami soldia bidi dabe dali, augwali pelama, te moni hanu Betsemesba pai, te Juda hanigo taunba, tama augwaligo te king Amasia dali, te aga ami bidi dabe dali, hwįgi pali. 12 Tama augwaligo boi hwį hwį pelama, tama te Israel hani ami soldia bidi dagego te Juda ami soldia bidi dabe augwali aiyaba elaluali, tama te Juda dabego ami bidi dabe augwali augwa buluba wi pela silali. 13 Tama te king Jehoasgo te king Amasia nogo tulama, tama aga hadabu ilali. Tama nosali, te king Jehoas dali, te aga te Israel ami bidi dabe dali, augwaligo te Betsemes hanu tagalama, tama augwali te Jerusalem taunba pali. Tama augwaligo te taun bologobea sali moni masigi obo banis aluali, tama augwaligo te Efraim Pabo Tų badu gagalama, agalu pelama, te tų me nogi te Kona, te tųba usu nigi pali. Tama augwaligo te obo banis aluali bobobage dąį usu, te 200 mita dąį usu tama aluali. 14 Tama te king Jehoas aga te Jerusalem taun tomoba pelama, tama agai te taun tomode muani gol me, te silva me tigidali sali. Tama te agai te pou dis me, tama me te dwasianu plet pou me, te me badu te Genuai Bidigo tempel bede muani doado bage me, tama me te tigidali doado bage me, te kingo mone mubo madigi te habu badu muani doado bage me, tigidali te agai naga sali. Tama me te Juda hanigo genuai bidi dabe hadabu ilama, tama te Jehoasgo te king Amasiabolo e tama po wali, “Amasia, nago da Israel hani dali ma boi hwįainu homu kone paligio. Tialima, nago tama ma teyu da, teda te eno nago e genuai bidi dabe ela muaibao.” Agai te po tama ola silali, tama agai te genuai bidi dabe dali, te tigidali sali doado bage dali selama, tama te Samaria buluba ma geasa pali.

Te king Jehoas isali po

15 Te king Jehoasgo agai te gasa tigidali sę yali po dao, te gasa bukude elalubo, augwaligo te buku e tama nogi wabo da, Te Israel King Bidi Dabe Augwaligo Yali Sę Po Buku. Tama te bukude po tigidali te bomai sę agai yali po dao, tama agai te boi hwįani, te Israel hani dabe augwaligo te Juda dabego king bidi Amasia dali hwįani po. 16 Tama nosali te king Jehoas isali, tama augwali aga tigi te Israelgo king bidi pubalubo gų pageba te augwali Samaria buluba pubaligi pali. Tama aga ogwago nogi Jeroboam, tama agai te aga ayago yali sę selama, tama aga king nigilama, te bulude bidali.

Te king Amasia isali po

(2 Sto 25:25-28)

17 Te Israel hanigo te king Jehoas isali, tiali te Juda hanigo king bidi te Amasia aga te 15 yia bidama, tama aga me isali. 18 Te king Amasiago agai te tigidali gasa sę yali po, te po dabe te gasa bukude elalubo. Augwaligo te buku nogi weyu, e tama wabo da, te Juda Dabego King Bidi Dabego Yali Sę Po Elalubo Buku dao, wabo dao. 19 Te king Amasia aga te Jerusalemde bidibadi yaide, tama te me badu bidi dabego augwaligo te king Amasia aga ela muabo po minama, dąų wali. Augwaligo te tama tiabo po wali te agai odali, tama tibaso, aga te Lakis hanuba wi pai. Tiali goli, aga te boi bidi dabe augwaligo te me badu bidi dabe tagala palama, tama augwali aga wali pelama, te Lakis taunba sabolama, tama augwaligo te king Amasia ela muani. 20 Tama augwaligo aga tigi selama, te kibu hosba munama, tama augwaligo te Jerusalem taunba ma selasa asali. Tama augwaligo aga te aga wąį nǫų pubalubo gų pagede augwaligo aga tede pubulai, aga wąį nǫų Devitgo taunde. 21 Tama te nosali Juda hani augwaligo te gasa bidi me sali, te bidi nogi Usia, agai nogi me te Asaria, tama augwaligo te bidi aga dąį ilama, tama te king bidi nigilali. Te bidigo aga aya Amasiago sę yali pesagede bidiyu, sę yali. Usia agai kibu be te nogo si olama, te sągą a olama, te me badu sągągo kibisa deli wagi solama, te 16 kibu bede aga king bidi nigai. 22 Tama nosali me badu sogo te aga tudi badu te king bidi nigilali, tama agai boi hwįgi pelama, tama te Elat taun te boi bidi dabego nogode elalubadi ma sali. Tama te taun te me badu pedai badu dolali, te agai me dodolali.

Te gasa Jeroboam te bidi te Israel hanigo king bidi nigilali

23 Te king Amasia te Joasgo ogwa da, tama agai kibu be te 15 kibu be yai, te Juda hanigo king bidi tama kibu be bidali, Jeroboam, Jehoasgo ogwa, aga te Israel hanigo king bidi nigilama, pedelali. Tama aga te Samaria bulude te king bidi nigilama bidiyu, tama te kibu be te bidi sese si olama, te deli, te 41 kibu beba usu nama bidai dao. 24 Tama agai kolesaga te aga sabi bidi Jeroboamgo yali dwai kolesaga tiwai agai me te Genuai Bidi gedude te dwai kolesaga yali. Polobadu te king Jeroboam te aga sabi bidigo te Israel hani kegelama, tama augwaligo te dwai sęgę sabo kolesaga te Genuai Bidigo gedude dwai mu yali. Tama megi te king nigali sabi bidi te Jeroboamgo me, te hasia king Jeroboamgo yali deli kolesaga tiwai naga te sęgę sabo kolesaga eyu, tama bidali. 25 Te Jeroboam aga king bidi nigisąbadi, te sogo te boi bidi dabe augwaligo te Israel hanigo umabo tǫ mu te boi bidi dabego sai. Tialima, megi te king nigali Jeroboam agai boi hwįnama, tama te tǫ dabe tigidali ma sali, te tǫ sabo gagalali te not badu te taun Hamat pabo tųdu gagalama, sesa pabogo te saut badu te sigi ąį ge elalubo pesageba usu nigi pali, te ąį nogi Detsi wabo da. Tama te king Jeroboamgo agai te tǫ ma sabo yali kolesagago te Genuai Bidi Godigo wali poba usu nigi pali, Israel hanigo Genuai Bidi. Te tama tiali sę te profet bidi Jonago pedauwalidu wali poba usu nigi pai, te Jona aga aya te Amitaigo ogwa dao. Te profet bidi Jona aga te taun Gathefer bulu bidi deli dao. [b]

26 Genuai Bidigo suali, ma te Israel hani augwa boi bidi dabego te augwali tigiba genuai sęgę mu mabo sę eyu, tama augwali mu silibo homu ebo koneani. Tama tialima, te deli deli bidi naga bidada pali. Tama me te augwali tau sabo bidi me deli meni. 27 Tama te Genuai Bidigo te Israel hani augwali mu silaibao po me wai menio, tama augwaligo nogi me tigidali silaibao po me wai menio. Tama teyu, agai te king Jeroboam dąį ilali, Jeroboam aga te Jehoasgo ogwa da, te bidigo bomo elama, te Israel hani te boi bidigo nogode augwali ma somainogo dąį ilai.

28 Te po te king Jeroboamgo te gasa tigidali haniani sę yali po dao, te po te gasa bukude te elalubao. Te buku augwaligo e tama nogi wabo da, Te Israel Hanigo King Bidi Dabego Yali Sę Po Elalubo Buku dao wabo dao. Te e bukugo te king Jeroboam agai te bomai sę yali po me, me te boi hwįnama te taun Damaskus dali, te taun Hamat dali si ma sali po elalubo buku dao. Polobadu te Juda hani augwaligo te Hamat taun tonaluai dao. 29 Tama nosali te king Jeroboam isalio, tama aga ogwa te Sekaraiago aga ayago yali sę agai selama, tama aga king nigilama bidai dao.

<- Te Israel me Juda Hani Sigo Tuni Bidigo Po Elalubo Buku Si 13 Te Israel me Juda Hani Sigo Tuni Bidigo Po Elalubo Buku Si 15 ->