1 Nosali bidi mebago Devitba te tiwai po wali, “Te Filistia dabego te Keila taun bulu bidi dabe dali hwįbo sę po wali. Tama augwaligo te Keila dabego wit te Keila dabego te nai sela tuabo madi pesage holali elalubadi, te wi sela pali,” te po wali. 2 Devitgo te po odama, tama agai te Genuai Bidiba hanalu, te tama po wali, “Te ena pelama, te Filistia dabe dali hwįgi pabo te usu yaibawe, me meniwe?” Tama Genuai Bidigo agabolo te po wali, “Te usu dao. Nago augwaliba hwįgi pelama, tama te Keila dabe tau siyu, te augwali dolidali weyu te tama tiao,” wali. 3 Tiali goli, te Devit dali bidali bidi dabego te po Devitbolo wai, “Odao. Megi da te Judade bidiyu, tama da wi ilibo nai hauwa elalubao. Tama magi baso da te Keilaba pelama, te Filistia dabe dali hwįgi paibawe? Da me pogobeo,” wali. 4 Augwaligo te tama po obaso, tialima Devitgo te Genuai Bidiba ma hanalu wali. Tama Genuai Bidigo te tiwai po te Devitbolo wai, “Dage te hogodama, pelama, tama te Filistia dabeba hwįgi pao,” wai. “Magi baso meni, eno dage tau siyu, tama dagego augwali aiyaba elalueibao.” Te po wali. 5 Tialima, Devit aga bidi dabe dali te Keilaba pelama, tama te Filistia dabeba hwįgi pali. Tama augwaligo te Filistia dabe hauwa ela munama, tama augwaligo bulmakau dabe sali. Te hwįanigo te Devitgo te Keila dabe ma dobola selama, tama augwali me dolobeo.

6 Te Devit te Keilaba pisiąbadi, tama Abiatar, te Ahimelekgo ogwa, te king Solde wi peyu, tama te Devitba asali sogo, Abiatargo te prisgo masigi si elalubo ugwa sesali, augwa te Godigo homu konea sabo nai, tama te sela asai. Tama augwali te Keilaba pabo sogo, teda Abiatargo te ugwa pedai augwa dali peyu sela pai dao.

7 Tama bidi mebago Solbolo weyu, te tiwai po wali, “Devit te Keilaba pelama bidibao,” wai. Tialima, Solgo te po wai, “Wiegi yai mu da, megi te Godigo aga te ena nogoba mawaibao. Devit te obo elalubo taun tomoba pali, tama te kolesagade aga digi aga te kalabus tiwai ilali. Tama tiyu, eno aga tuainu ebo te sunumi gegebo sę dene yai dao.” 8 Tialima, nosali Solgo te aga ami bidi tigidali i olama, tama augwali te bulu Keila pelama, te Devit aga bidi dabe dali bidibo teba bagua sigi painu yali.

9 Tiali goli, Devitgo odali, te Solgo agaba dwai sę yabo homu ebo po wai. Tama tibaso, agai te pris Abiatarbolo walali, “Te pris ugwa selama, sesao,” po wali. 10 Agai sela asobo si da, teda Devitgo gedu haluasa po te tiwai wali, “God, da Israelgo Genuai Bidi, ena naga sę ebo bidi da, eno te tiwai po odali, Solgo ena e Keilade bidibo koneanio. Tama aga aselama, te bulu dolagasabo homu ebo dao. 11 Tama eno koneainogo homu yali, te e bulu bidi dabego ena te Solba magowe, ma meniwe? God, da Israelgo Genuai Bidi, eno homugo nago eno te hanalu wali po wei pomainu homu ebao.” Tama Genuai Bidigo agabolo te tiwai po wali, “Sol da te asaibao.”

12 Tama Devitgo Genuai Bidiba ma hanalu wali, “Te Keila bulu bidi dabego ena me, te eno bidi dabe dali, te Solba mawaibawe, ma meniwe?” Tama Genuai Bidigo te po wai, “Augwaligo te tama tiwai yaibao.” 13 Devitgo te po odama, tialima te polo mu tama aga hani bidi dabe selama, te megi da augwali namba te tama 600 bidi elaluali. Tama tigidali hogodama, tama te Keila bulu tagalama palio. Augwali te hauwa pedai badu tedela bilali. Te Solgo te Devit te bulu Keila tagalama wi pali po odobo side, teda Sol te Keila buluba pabo homu me ebeo.

14 Devit pelama, te bulu meba wiegi yai madi te Sif bulu pąde, te bulu du dabede geme dualaluali. Te bulu pedai te bidi meniama, olo elalubo bulu tama. Tama Solgo Devit sesemane sogo gegabo sę yali, tiali goli Godigo te Solgo aga somainu me ilibeo. 15 Solgo te Devit ela muabo homu ebaso, tama tiyu Devit wi yai. Tama te sogo Devit pelama, te Sif bulu pąde te Hores bulude bidai. 16 Tama Jonatango aga sugi pelama, tama wiegi yai po agaba weyu, te Devitgo konealubo po Godiba bomo elaluabo po wai. 17 Jonatango agabolo te tiwai po wali, “Nage wi munu me igio. Eno ayago nage me dologobeo. Nosali nage te Israel king pedalubo side, tama ena te nage tudi badu bidi nigilama bidaibao. Tama eno ayago me te sę yabo koneai dao,” wali. 18 Tama Genuai Bidigo gedude, augwa si te abagi mu olama, sesemane sogo bidabo te bomai dąų walubo po ma wali. Tama nosali Jonatan aga buluba ma begasa peyu, tama Devit te bulu Horesde me bididuai. [a]

19 Tialima, te Sif bulu bidi mebago te Sol Gibeade sulama, tama agabolo te tiwai po wali, “King, odao. Devit te da bidibo pedai badu, te Hakila bulu du pedai badu, te Juda dabego bulu tǫ wa pai te saut badu geme dualalubao. Augwali te hwįbo pesage me badu te geme dualalubao, te Hores bulu pąde dao. [b] 20 Dago koneani, nago homugo te bidi tolasabo homu mu elalubao, tama tiyu te nage aselama, aga sagasao. Tama dena digi te aga nage nogoba mawaibao,” te po wai. 21 Tama Solgo augwaliba te po wai, “Dagego wiegi yai kolesaga eyu, te ena tau sobao. Tama tiyu, eno homugo te Genuai Bidigo dage wiegi yai bugagia ilimainu yaibao. 22 Tiali goli, te bidi dabego te po wali, Devit te geme dualubo sę mu konea pai bidi, tama agai da tibo po me ola mawaibao. Tama tiyu, eno homugo dage te deli sogo ma pelama, te aga bidibo pesage sugi pelama, tama aga suali bidi dabe te nogi koneyu yao,” te po wali. 23 “Dagego te aga geme dualubo pesage tigidali te bugagia koneama, tama polo aselama, enabolo wagasao. Tama ena dage dali pelama, tama aga tede me bididubaso da, teda eno aga bugagia gegegi paibao. Tama eno aga pobeasa peyu, te tigidali Juda pedai badu pobaso da, teda te eno aga sigi pabo si mu te usu naibao.”

24 Solgo po ola silibo si da, te Sif dabego aga taga peyu, tama aga asomainu elama, tama augwa buluba polasa pai. Tama augwa te tama tiwai koneani, Devit dali, te aga dali bidibo bidi dabe dali, augwali te Maon wa pai bulude bidaluali, te Juda pedai genuai bulu te saut badu bidalio. 25 Solgo odama da, teda aga dali, te aga bidi hani dali, augwali hogodama, teba pelama, te Devit gegegi pali. Tiali goli, te bidi mebago Devitba wagi pali. Tama tibaso, aga pelama, te masigi hauwa elalubo bulu dwai me deliba pelama bidigi pali, te gasa pedai badu, te Maon wa pai bulu pedai badu bidigi pai. Te Solgo Devit te badu pali po odobo si da, teda Solgo aga wali pai dao.

26 Tama Sol aga hani bidi dabe dali te bulu du pado me deli pedai badu bidali, tama Devit dali, aga hani bidi dali, te augwali Solde wi pelama, tama te bulu du gasa pedai badu bidigi pai. Tama Sol aga hani bidi dali te pąba mu aselama, tama augwaligo te Devit dali te aga hani bidi dali tola sainu yali. 27 Tialima, bidi me deli aselama, te Solbolo wagasiyu te po wai, “Odao. Te Filistia dabego dago bulu tǫ pedaiba hwįagasobao. Nage asesa polo ma geasa asao,” te po wagasali. 28 Tialima, Solgo te po odama, tama aga me, te aga hani bidi dabe dali te Devit taga soyu, tama te Filistia dabe dali hwįgi soai. Tama tialima, augwaligo te bulu nogi polali, Te Wąbi Hwįbo Togolali Masigi Hauwa Elalubo Bulu Da po wai. 29 Tama Devitgo te pesagede bidali te tagalama, tama pelama, te wiegi yai geme dualaluabo pesage te Engedi dabego tǫba bidigi palio.

<- Profet Samuelgo Po Elalubo Buku Deli 22Profet Samuelgo Po Elalubo Buku Deli 24 ->