1 Te Benhadat, te Siria king bidi, te aga ami bidi soldia dabe tigidali sisinama, te Israel dabeba boi hwįgi painogo sisi ilali. Tama te bidi sese deli olama, nogo si olama si, 32 gasa king bidi te augwa hos hani dabe me, te boi hwįbode kegasa pabo karis me selama, te aga tau sagasainu yalio. Tialima, tigidali pelama, te Samaria taun bagua sigi pelama, te Israel dabeba boi hwįainu elalualio. 2 King Ahap te Samariade bidibadi, te Benhadatgo te bidi dabe tagala palama, 3 te Ahapbolo te tiwai po wagi pomainogo yai, “Nago te tigidali silva me, gol me, te nago wiegi yai we dabe me, wai dabe me, enabolo mao,” te po wai dao. 4 Tama king Ahapgo e tama po te Benhadatbolo ola tolali, “King Benhadat, eno genuai bidi da, te eno nago wali po tiwai gilama yaibao. Ena me, eno doado bage tigidali, te tigidali naga nai naga dao,” te po wai.

5 Nosali Benhadatgo te bidi dabe te Ahapba ma tagala palama, te po agabolo wagi pomainu yali, “Hasia bolo eno nagebolo weyu, te nago silva dabe, me gol, te nago we wai dabe, augwali ena mao po wai dao. 6 Tialima, megi eno homugo te eno ami ofisa dabe nago beba me, te nago ofisa dabego beba tagala palaibao. Tama augwaligo te nago homugo godolo ebo nai dabe gegelama subaso da, bomonama saibao. Do tama augwali nageba asaibao, te megi e sogo tobage side asaibao,” te po ola tolali.

7 King Ahapgo te po odobo si da, teda agai te tigidali Israel tobolu bidi dabe i olama, augwali sisinagasobaso, te agai augwalibolo te tiwai po walio, “Hasia bolo te bidigo enabolo weyu, eno agabolo te eno we dabe sibi me, wai me, te eno silva me, gol dabe, te mao po wai. Tama eno agai te wali pode usu da po wai. Tialima, megi agai po hasegelai, tama te tiwai dabolo ola mawai, te agai da dolaiongo wabo po tiwai yali dao,” wali. 8 Tama te tobolu bidi dabego, me te tigidali we bidigo Ahapbolo te tiwai po walio, “Nago agai te po munu me wali pelamuo. Nago te kolesaga me elamu dao,” wali.

9 Tialima, Ahapgo te Benhadatgo bidi dabebolo te tiwai po wali, “Dage pelama, te king Benhadatbolo te tama po waligi pao, eno agai te hasia wali pode usu da wali, tiali goli agai te namba 2 wali pode eno usu da munu me wagobeo. Mu menio,” wali. 10 Tialima, Benhadatgo augwali ma tagala palama, te gasa po Ahapbolo wagasomainogo yali, “Megi da, eno ami bidi umabo mu seselama, nago te taun dolagasomainu yaibao. Augwaligo te tigidali doado bage dolama, te olo nai pobele bage tiwai mu pedelaibao. Eno te tiwai isąbaso da, teda ena te ena god dabego ela mumainu emainao,” te po ola tolali. 11 Tialima, Ahapgo te bidi dabeba te po ma wai, “Dage pelama, Benhadatba te tama po wagi pao. Ami bidi mugo, agai te genuai po dagą me pemene ebo te bainat hwą aga bede bulalubo sogo me tegobeo. Menio. Agai te boi bidi dali hasia bolo hwįnama, te aiyaba elalubaso, te nosali naga aga pemene ebo usu dao,” Ahapgo te po ola tolali. 12 King Benhadat dali, te gasa king dabe me, augwali te taun Sukotde bidaluyu, te bomai wę tubo sę idu bidali. Tama te Ahapgo po sela asobo bidi agaba asali. Agai te po wali odama, te aga ami soldia bidi dabeba waliyu, te augwali Samariaba pelama, boi hwįgi pao wali. Tialima, augwali te Sukot taun tagalama, palio.

13 Te sogode te profet me deli te king Ahapba pelama, agabolo te tama po walali, “Genuai Bidi Godigo te tiwai po wai, ‘Te Benhadatgo genuai ami soldia hani suao. Megi da, eno te nago augwali aiyaba elalumainu sula tagalaibao. Te nago koneama, ena digi ena Genuai Bidi da wao.’ Genuai Bidigo te po wai,” te profet bidigo wali. 14 Tialima, Ahapgo profetba te tiwai hanalu wali, “Dego augwaliba hwįnama, te augwali aiyaba elalueibawe?” Tama profetgo Ahapbolo te tiwai po wali, “Genuai Bidigo te po wai, te gesi ogwa bidi ami soldia dabe, te tǫ pedai distrikde bidibo tobolu bidi dabe bidibo, te hani dabe augwaligo te augwali aiyaba elalueibao,” wali. Te king agaba ma hanalu wali, “Te dego mu augwalibolo hwįgi pao obaso, te augwaligo hwįgi paibawe?” Te profetgo tama po wali, “Nage tama dao.”

15 Tialima, kingo te gesi ogwa bidi ami soldia i olama, sisinagasomainogo yali. Te augwaligo namba te 232 usu da. Tama nosali agai te gasa Israel ami tigidali sisinagasomainu i wai. Te augwaligo namba te bidi sese umabo mu, te 7,000 bidi dabe dao. 16 Te giliga tomo yagasu, te belo wabo side, augwa te taun tagalama, te boi hwįainu pali. Te sogo Benhadat dali, te gasa 32 king dabe dali, te Sukotde bidaluyu, te bomai wain ąį tulama, te gęǫ page sę ebo gagalalio. 17 Benhadatgo te aga ami soldia dabe tagala palama, te Israel ami dabe asobo tonalugi pomainu yali, tama augwaligo te Israel ami bidi dabe aselabo suai. Te augwali ma pelama, te tiwai po te Benhadatbolo wagi pali, “Bidi meba te Samaria tagalama, asobao,” po wali. 18 Tialima, Benhadatgo aga ami bidi dabeba te tiwai po wai, “Dage pelama, augwali pageabi igi pao, te augwali boi hwįainu asai baso, ma te boi hwįbo hagela ebo po wagasai baso me, te tagalao. Tialima, dagego augwali me ela munamo dao,” wali.

19 Te Israel gesi ogwa bidi ami bidi dabe polasa pobadi, te tigidali gasa ami soldia bidi dabe augwali wali pali, tama augwa te Siria dabe dali hwįgi pai dao. 20 Te hwįbo gagalali sogo, te Israel ami dabego bugagia mu hwįnama, tama augwaliba boi hwįagasali Siria dabe tigidali ela silali. Tialima, te gasa Siria dabe wi pobaso, te Israel dabego augwali pobeali. Tiali goli, Benhadat te hosde dugulama wi peyu, tama te hosde dugulasa boi hwįani ami bidi dabe dali wi palio. 21 Te king Ahap dali, te meba ami dabe dali, augwa te Samaria tagalama, te Siria ami dabe te hosde me karisde dualasa wi pali ami dabe dali hwįgi pali. Tama augwaligo te Siria dabe hauwa mu ela munama, augwali aiyaba mu elaluai dao. 22 Te nosali te profet bidi te king Ahapba pelama, agabolo te po ma wali, “Nage ma begasa solama, te naga ami bidi dabe ma dąų walama, te nago mena kolesagago te Siria ami dabe dali hwįabo te bugagia homu kone palao. Magi baso meni, te Siria kingo dageba te nosali kibu bede ma hwįagasaibao,” te po wai dao.

23 Te hasia hwįani side nosali badu, te king Benhadatgo ami ofisa dabego agabolo te tiwai po wai, “Te Israel dabego god te bulu dude bidibo god da, tialima dago te bulu dude hwįani sogo, te god dabego Israel dabe tau selama, te augwaligo da aiyaba elaluai. Tialima, dago augwali dali te odogo bulude hwįbaso da, teda dago augwali aiyaba elalueibao,” wai dao. 24 “Tama me nago te king dabe sela sąwaibao, te augwaligo nago ami bidi dabe munu ma tonalugobeo, te nago te ami bidi soldia dabe tonalumainu yabo ofisa bidi dabe muagameo. 25 Te me nago ami soldia pedelabo bidi hauwa sao, te nago ami bidi hani te genuai pedelama, te polobadu tiwai yaibao. Te me nago te hwįabo hos, me karis hauwa sao, te dolali hos me karis dabe augwaligo pesage hasegelaibao. Tama dago te Israel dabe dali te doloba pai odogo bulude hwįgi pelama, te dago augwali aiyaba elalueibao,” augwaligo te po wai.

King Benhadatgo augwaligo te wabo po odama, tama agai augwaligo wali po tiwai gilama yai dao. 26 Te nosali kibu bede agai te aga ami bidi dabe selama, augwali te Afek taunba pelama, te Israel dabe augwali dali hwįgi pai. 27 Tialima, te Israel kingo aga ami bidi dabe sisinagasomainu i olama, te augwa hwįabo doado bage sisi ilali. Tama augwali pelama, te Siria dabe bidibo pesage pąba pali, te Israel dabego bidabo pesage si badu nigai. Te Israel hani dabe dwasianu mu elaluali, te meme hani si tiwai elaluai. Tiali goli, te Siria ami te umabo mu, te tigidali pedai badu usu nama bidada pai dao.

28 Tialima, te profet te king Ahap bidibo madiba ma pelama, agabolo te tiwai po wai, “Genuai Bidigo te tama po walio, ‘Te Siria dabego ena te bulu dude bidibo God da tiwai po obao, tama ena te odogo bulude God meni da po wai. Tama tialima, eno dagego te augwaligo genuai ami bidi dabe aiyaba elalubo si da, teda dage Israelgo koneagameo, ena digi ena Genuai Bidi dao, dagego te tama po waibao,’ God Genuai Bidigo te po wai,” profet bidigo te po wali.

29 Te Siria dabe me Israel dabe augwali te augwa kem nigali pesagede naga te a naga me deli wabo si usu bidali, tama te a naga si wabo side augwa te hwįbo gagalali. Te side digi tama te Israel dabego te Siria ami bidi dabe te bidi sese umabo mu, te 100,000 bidi ela muai dao. 30 Tama te Siria gasa ami bidi dabe te taun Afek tomoba wi pai. Tama te taun bagulali genuai masigigo nigali obo aluasa dulu, te augwali mesega sigulama, te bidi sese umabo bidi, te 27,000 bidi te tiwai isai dao.

Benhadat me wi pali, te taun tomoba pelama, te be me deli dąį habuba geme duala sigi pali. 31 Tama aga ami polalubo tobolu bidi ofisa dabego aga sugi pelama, agaba te tiwai po walio, “Dago odali, te Israel king dabego te olo mu tau sabo kolesaga ebo bidi dabe dao wali. Tama tialima, dago homugo te homu dene ebo ola mabo ugwa gudulama, te dago magede baklain bono bagulama, te Israel kingba paibao. Dago te tama tebo usu egowe, ma meniwe? Dago te tiwai ebaso da, te agai nageba te olo tau sabo homu kolesaga elama, te nage sula gogola tagalu, te nage me ela mugobe, te homu ebo dao,” augwaligo te po wai. 32 Benhadatgo te augwaligo hanalu wali pode usu da obaso, tama augwaligo te homu dene ebo ola mabo ugwa gudama, te bono baklain augwa magede bagulai. Tama augwali te Ahapba pelama, te agabolo te tama po wai, “Te nago sę bidi Benhadatgo homugo te nago aga homu dene elama, te nago aga munu me ela mugio,” wali. Te Ahapgo augwaliba te tiwai po wai, “Aga bidiba, agawe? Wiegi yai dao. Aga eno ama tiwai dao,” wali.

33 Te Benhadatgo ofisa dabego Ahapgo te po wabo sogo olo mubadi, tama augwaligo te tiwai po odali sogo, “ama da,” obaso da, teda augwaligo koneai, augwaligo yainu homu yali sę te pedalubo usu yaibao wali. Tama tialima, polo tama te “ama dao” wabo po selama, te augwaligo te tama po wali, “Mu tamao, Benhadat te nago ama da.” Te Ahapgo augwaliba te po walali, “Aga enaba odasa asao.” Tialima, augwali pelama, Benhadatbolo wagi pobaso aga te Ahapba palio. Tama Ahapgo Benhadatbolo waliyu, te nage aga karisba duagulao po wai dao. 34 Te Benhadatgo Ahapbolo te tama po wali, “Te polobadu eno ayago nago aya dali boi hwįnama, te sali taun tigidali nagebolo eno wei ponaibao. Te me te tobage bisnis dabe nago te Damaskusde yagameo, te polobadu eno ayago te Samaria taunde yali tiwai,” wali. Te Ahapgo agabolo te tama po wali, “Te nago tama tiabo homu ebaso da, teda eno nage pomainogo sula tagalaibao,” wali. Tama Ahapgo te Benhadat dali te bomai po kontrak me deli dąų walama, tama Benhadat pomainogo yai dao.

35 Benhadat pai digi da, teda Genuai Bidigo te profet hani dabede te profet me deli homu hodolali, tama te profetgo gasa profetba te tiwai po walali, “Eno homugo nago ena ela homu ebao.” Tiali goli, te gasa profetgo hagela homu yalio. 36 Tama te profetgo gasa profetba te tiwai po wali, “Eno nageba te mani po, te Genuai Bidigo digi wali po. Tialima, nago te Genuai Bidigo po sela sąwai, te nago ena tagalama pabo sogo da, teda te bomai hasa laion me deligo nage ela mueibao,” wali. Tama te gasa profet pabo si da, te laion me deli pedelama, te aga ela muai dao.

37 Tialima, nosali te profet te gasa bidiba pelama, agabolo te tiwai po wali, “Eno homugo nago ena elimainu homu ebao.” Tialima, te bidigo te profet bomonama umagia mu elalima, te profet bidigo tigi selali. 38 Te profet aga digi aga gesabidi te name ugwago halua sali, te bidi dabego aga te profet da waidali weyu, te tama tiali. Tama aga pelama, te sunumi pąde dolalu, te king Ahap asobo tonaluai dao. 39 Te king sabalubo si da, profetgo te tiwai i wali, “King, odao. Ena te boi hwįbode bidai, tama dago ami bidi me deligo te boi bidi me deli enaba odasa aselama, tagalagasu, agai te tiwai po ena dali wali, ‘Te bidi bugagia tonaluao,’ po wai. ‘Te aga wi pali da, teda eno nage ela mueibao. Ma nage elisąyu da, teda nago mone bidi sese umabo mu, te 30,000 kina silvago te kot abelaibao.’ Te ami bidigo te tama po ena dali olama, aga palio. 40 Tialima, king, eno te gasa sę hauwa eyu, eno te boi bidi bugagia tonalusiąwai, te aga wi palio,” wali.

Tialima, kingo agabolo te tama po wai, “Naga digi naga po tų ilalio. Tama te nageba magi sę pedelaibao, te nage koneani dao.” 41 Kingo po ola silibo si da, te polo mu tama, te profetgo aga gesabidi halualuali nami ugwa pedai dagala sąnama, te aga gesabidi sumainu ilali, tama kingo sulama koneai, aga te profet bidi gesabidi suai dao. 42 Tama profetgo kingba te tiwai po wai, “Genuai Bidigo te tama po walio, ‘Ena Genuai Bidi, eno te po wai dao, te dage boi hwįbo sogo, dagego te boi bidi tigidali mu ela muao. Tiali goli, nago te Benhadat sula tagalama pomainu yali, tama nago aga ami bidi dabe wi pomainu sula tagalai. Tama tibaso, nage isibogo te Benhadatgo pesage nago hasegelaibao, te nago ami bidi dabe me isibogo te agai ami bidi dabego pesage hasegelaibao,’ ” te po wai dao. 43 Kingo te po oda silama da, teda aga wado homu elama, te haliga sębę dwai mu elama, tama ma aga begasa peyu, te aga bulu Samariaba pai dao.

<- Te Israel me Juda Hani Sigo Tuni Bidigo Po Elalubo Buku Deli 19Te Israel me Juda Hani Sigo Tuni Bidigo Po Elalubo Buku Deli 21 ->