1 Dagego te enabolo asęna tolali pode, tede dagego e po me ena hanalu wali, “Te gasa we bidi augwaligo hasa ela munama, tama te tibo godibolo te ofa tiwai eyu, te hasa mi meba te tibo god pageba mubo dao. Tama da Godigo po wali pabo we bidi dago te tobage mi tubo te usu dawe, ma meniwe?” te po dagego enabolo asęna tolali. Te kolesaga ebode eno wabo po elalubao.

Dage mebago e po wabo dao, “Da tigidaligo koneani, te tibo god te olo nai dao.” Awe, te mu po dao. Tiali goli te olo konebo kolesagago te hagoma ebo kolesaga ebo homu hodolaibao. Tiali goli dago dena hasi te gasa we bidi dali wiegi yai homu eyu godolo ebo kolesaga selama, tama tebogo te da Godigo po wali pabo bomai we bidi pedalaibao. 2 Te bidi me deligo agai te nai me deli mu koneani homu ebaso da, teda te bidigo koneani kolesaga sǫą pali, te usu yabo me elalubao. 3 Tiali goli, te bidi me deligo aga God dali dwagi yai homu eyu godolo ebaso da, teda Godigo koneama, te bidi te Godigo bidi dao.

4 Te gasa we bidi augwaligo te tibo godiba ofa elama te mi dabe tubo kolesagade eno po megi obao. Dage mebago te tobage mi tuaio homu eyu tama dagego e po wabo dao, “Te tibo god te mu bidibo nai menio. Te olo piksa noma naga dao,” te po wabo. Awe, dago te po page koneani. Tama dage mebago e po me wabo dao, “Te god hauwa me elalubeo. Menio. Te God deli naga aga bidibao,” te wabo. Awe, te me dago koneani. 5 Mu tama, te gasa we bidi augwaligo te nogi “god” nogi ebo nai hauwa elalubao, tama te augwaligo hauwa naide nogi ilama, te “genuai bidi da” wai. Tama mu tama te “god” dabe, te dagalude, ma te tǫde bidigi sogo da, 6 tagalao, te dade dago God deli naga te elalubao, te God Aya dao. Aga te tigidali nai page bidi. Tama dago agai sę emainogo eyu da aga wai mu bidibao. Tama te Genuai Bidi deli naga elalubao, te Jisas Krais da. Agai te tigidali nai nigali. Tama dago bidibo ula te agadu sai dao.

7 Tiali goli dage tomode te we bidi mebago te tibo godide te kolesaga kuna konebeo. Te mebago te polobadu te tibo godibolo mi ofa yali kolesaga hauwa sogo wali pedu geani. Tama megi me augwaligo homugo te gasa we bidigo te mi te tibo godiba ofa mu yali homu me ebo dao. Tama te homu ebadi augwaligo te tobage mi tubaso da, teda augwaligo homu tede sęgę sobao. 8 Tiali goli dagego te kolesagade e po wei ponobo dao, “Te nai tubo kolesagago da te God pąba odasa me pogobeo. Te dago nai tusiąbaso, teda da te God gedude me sǫą pogobeo. Me ma, te dago tubaso da, teda da te God gedude wiegi yai me pedalugobeo.”

9 Awe, te mu dao. Tiali goli dage mi tubo bage dage dua dao. Tiyu tama te tibo godibolo mani mi tubo sę duga digi elama, tama te bomo meni yai bidi dabego sulama, tede sągąde dolama, tama augwali te dwai sęgęba tula muabuo. 10 Nage bidi te koneani kolesaga elalubao wida, te nage te tibo godigo lotu beba pelama, tama nage tede dulalu nai tueibao, tama bidi me deli te aga Kraisde konealubo po dąų wabo kolesaga bomo meni yai bidi te agai nage subaso, te tebode te aga homu hodolama tama aga homu te mi tubo te dwai kolesaga da homu yali goli, te tibo godiba ofa yali nai tuabo homu yaibao, tama agai te mi tueibao. 11 Tama tibaso, te nago koneani kolesagago te bomo isąwani bidi dolali, te amade te Krais aga isama tama aga ma sai dao. 12 Te ama mebago te Kraisde konealubo po dąų wabo kolesaga te bomo me ebeo. Tama dagego te dwai sę augwaliba elama, tama augwaligo te augwa gedude sę ebo dwai ilibaso da, te kolesagade te dagego dwai sę te Kraisba digi yaibao. 13 Tama tibaso, te nai tubogo eno ama te dwai sęba tulalumainogo ilibaso da, teda eno te mi munu ma tugobeo. Tiyu eno te eno ama te dwai sęba tulalubo sę ilidalio.

<- Polgo Hasia Pas Deli Korin Dabeba Asęani 7Polgo Hasia Pas Deli Korin Dabeba Asęani 9 ->