1 E da te Arongo ogwa dabe hani sibi dabe da. Arongo ogwa dabe nogi da e tiwai elalubao, Nadap, me Abihu, me Eleasar, me Itamar dao. 2 Tialima Nadap me Abihu sigo wai me ame nisiąbadi te augwali si isali, te augwa si aya bidibadi da. Tialima Eleasar me Itamar si naga te pris pedelalio. *Prs 10:1-2 3 Tama Devit te king bidali sogo, agai homugo te pris dabego sę bugagia emainu homu elama, tama agai te pris hani dabe deli deliba te sę sabo dąį ilali. Tama Sadok de Ahimelek sigo te agai te pris dabeba sę dobabo tau salio. Sadok te Eleasargo hani wai da, tama Ahimelek te Itamar hanigo wai dao. 4 Augwaligo suali, te Eleasargo hanide tobolu bidi hauwa elaluali, tibaso augwaligo te 16 te tama hani augwali dobayalio. Tialima te Itamargo hani tobolu bidi hauwa meni baso, tama augwali hani te a naga me sela hani naga dobayalio. 5 Devitgo te pris sę yabo bidi dabe augwali dąį ilainu yali sogo, agai te Eleasargo hanide naga, ma te Itamargo hanide naga te dąį ebaso usu me egobeo. Menio. Agai te bidi hani dabe talua side naga dąį ilaibao, magi baso meni, te hani side te Godigo sę ebo usu yabo bidi dabe naga bidali, tama te Genuai Bidigo bede sę ebo usu yabo bidi dabe bidali. Tama tialima augwa te satu gagali elama, te bidi dabe dąį ilali.

6 Te Eleasar me Itamar sigo hani ogwa dabe te satu gagalide hasesegele pelama te pris dabe dąį ilali. Augwaligo dąį ilama te kuskus Semaia, te Livai hani te Netanelgo ogwa, agai augwaligo nogi asęani. Tama king Devit aga ofisa dabe dali, me te pris Sadok, me pris Ahimelek, te Abiatargo ogwa, tama te pris me Livai dabe augwali hani tobolu bidi dabe, tigidaligo te Semaiago te nogi asębo sualio.

7 Te augwaligo hasia sogo te satu gagali yalima, augwaligo te Jehoiaripgo hani dabe dąį ilali. Tama namba 2 te Jedaia hani dąį yali, 8 tama namba 3 te Harimgo hani, te namba 4 te Seorim hani dąį ilali. 9 Te namba 5 te Malkia hani da, te namba 6 te Mijamingo hani, 10 te namba 7 te Hakosgo hani, te namba 8 Abiyago hani dao. 11 Te namba 9 Jesuago hani da, te namba 10 te Sekanaiago hani dąį ilali, 12 te namba 11 te Eliasipgo hani, me namba 12 te Jakimgo hani dabe dąį ilali. 13 Te namba 13 te Hupgo hani da, te namba 14 te Jesebeapgo hani dąį ilali, 14 te namba 15 te Bilga hani, me te namba 16 te Imergo hani dąį ilali. 15 Te namba 17 te Hesirgo hani, me namba 18 te Hapisesgo hani dąį ilali, 16 te namba 19 te Petahiago hani dąį ilali, me te namba 20 te Jeheskelgo hani dąį ilali. 17 Namba 21 te Jakingo hani, me te namba 22 te Gamulgo hani dąį yali, 18 te namba 23 te Delaiago hani, me te namba 24 te Masia hani dąį ilai dao.

19 Augwaligo te dąį ilali pris hani dabe te Genuai Bidigo beba pelama, te augwa wąį nǫų dabe te Arongo yali kolesaga tiwai sę tobage yaibao wali. Polobadu God, te Israel dabe augwa Genuai Bidigo, te po Aronba walama te sę yalio.

20 Te e da te Livai sibigo bidi meba dao. Sebuel, aga me nogi Subael, te Amramgo hani ogwa dabe, te Jedea te Sebuelgo hani ogwa dabe dao. 21 Tama Isia te Rehabiago ogwa dabego polalubo bidi bidali. 22 Tama Selomit te Ishar hanigo wai dabe da, tama Jahat te Selomitgo hani dabe augwaligo ogwa dao. 23 Tama Hebron *Te nogi Hebron te Hibru pode te ves 23 tede elalubeo. Tialima te ves tiwai si pąde te 1 Sto 23:19 tede te po elalubao, te nogi Hebron te Dąį 23:19 tede elalubo suao. agai ogwa me si me si nama bidali. Gomunai ogwa Jeria, tomo ogwa Amaria, te sela ogwa Jahasiel, te ene nanobo ogwa Jekameam dao. 24 Maika te Usiel hani dabego ogwa, te Samir te Maikago hani dabego ogwa da. 25 Isia te Maikago ama, tama Sekaraia te Isiago hani ogwa dabe dao. 26-27 Te Merarigo ogwa dabe nogi e tama elalubao, Mali me Musi. Te Jasiago ogwa si, te Merarigo ogwa da. Te Merarigo gasa ogwa dabego nogi e tama elalubao, Soham me Sakur me Ipri. dao. 28-29 Te Maligo ogwa dabe nogi te tiwai elalubao, Eleasar me Kis. Eleasargo ogwa me ame nabeo. Tama Jeramel te Kisgo hani ogwa dao 30 Te Musigo ogwa nogi dabe e tiwai da, Mali, me Eder, me Jeremot. Te tama nogi yali bidi dabe, augwali tigidali te Livai hani sibi dabe dao.

31 Te Livai hani sibi tobolu bidi me te tobolu bidi dabego augwa dwasianu ama dede dabego te satu gagali elama, te Livai hani dabego mena sę yabo te dąį ilimainu yali. Augwaligo te augwa hani te ama dabego yali kolesaga tiwai si yainu yali, te augwali Arongo hani pris dabe da. Tama king Devit, me Sadok, me Ahimelek, me te pris hani sibi dabede tobolu bidi badi te Livai dabego me, augwali tigidaligo augwaligo te satu gagali ebo dąį ilibo sę ebo sualio.

<- Tuni Bidi Dabego Po Elalubo Buku Deli 23Tuni Bidi Dabego Po Elalubo Buku Deli 25 ->