Kaya maa yulapayi nyarruwinti. Yijipimartajilurrjuya kujungkarringu yulapayi. Palunyajanuya Juujapmapulu mitu katingu parna Kayinankarti. Yijipimartajiya maaja laltu kujungkarriraya yanu, Juujapmapungka, warrkamupurlukakajalurrjuya jiimartaji laltu yanu. Kutungkaya nyinangu yulapayi. Kaya pakarnu katingu pirnki palunyakarti. Pirnkingka Makapilangkaya katingu ngarrijunu, ka marlakuya yanu parna Yijipikarti.

Mama Juujapmapuku-janampa jilanya miturringu. Palunyajanuya Juujapmili kurtararranju purtu kulirnu, ka Juujapkuraya ngurlurripayi. Jilanyalu-ngkuya kulilpayi, “Mayiti-lanya puntajilu pungku, Juujapju, jumaji julyjula jalamunu yiyarnu. Mayiti-lampa wirrilyi nyininpa.” Jilanyaya kulirnu kurtararranju. Kurtinguya kurta kuju yankuralu japilkuraku, Juujapja. Jilanyalu japirnu, “Jampa mama kana nyinapayi, palulu-lanyaju wajarnu, jilanyalulajunta japilkura. ‘Julyjulajunta jalamunu yiyarnu. Jiijanun mirtan wirrilyirrira nyinama! Mirta-lanyajun puntajilu puwa!, kawalya-lampaju nyina!’ ”

Juujapju wangka palu kulirnu ka yulangu kara wajarnu, “Mirtarna-nyurranya pungkukijalu kulilpayi. Julyjurna-nyurrampa yilta kawalyarringu.” Ka kurta palulu-jananya yanu jakurljunu, marlajukajangka. Palunyajanuya kurtararranpaya marlaku yanu Juujapkarti. Kaluya pupatingu ka wajarnu Juujapja, “Nyuntuku-lajungku wulu nyinamalpa warrkamupurlukakaja.”

Ka Juujapju-janampa wajarnu, “Ngayukujunyurra mirta ngurlurrimalpa. Mirta warrkamupurlukakajanyurra nyinamalpa, paki, kurta walyjajunyurra nyininpa. Maaja majurna-nyurrampa mirta nyininpa, yumurna-nyurrampa nyininpa. Kuju-lampa maaja ngarnawarrapurluka nyininpa. Julyjurninyurra mitu pungkukijalu kulirnu jalamunu. Mama ngarnawarrapurlukalurni kanyirnu ngampurrju ngaangkarna palya nyinaranpa. Mama ngarnawarrapurlukalu kulirnu, mirrkarna-nyurranya yungkuranpa, martu laltukuyarrakulurrju. Nyuntunjurninyurra jalamunu yiyarnu ngaakarti, palunyangkaya wanka nyininpa, mirrkakurlu martu laltukuyarra. Ngurlurriparnijunyurra nyinamalpa. Ngayulurna-nyurranya ngampurrju kanyilku, jijilurrju, nyamu nyamilurrju.”

Juujapmapuya wulu nyinama, parna Yijipingka. Juujapju julyju nyupa manu, Yijipimartaji. Kaja kujarra manu, yini Yipuramkamu Manaja. Manaja nyinangu jarlurringu nyupa manu. Palujanu Manajalu kaja manu, yini Makira. Juujappa jirlpirringuka nyamupirti nyamipirti-jananya nyakupayi.

Palunyajanu-janampa mirrangu palunyamili kurtararranku. Ka wajarnu-jananya, “Kuwarrirna miturriku. Palunyalu-nyurranya marlalu kanyilku parna ngaangka, Mamalu ngarnawarrapurlukalu, marlajanukajalurrju. Kanyilku-nyurranya ngula marlaku katiku parna Kayinankarti. Julyju-jananya jamartapungu ngurra-nyurranya Kayinanpa yungkukijalu. Yipuramjakamu Yajikjakamu, Jayikapjalurrju jilanya-jananya jamartapungu.”

Yarrarnu-jananya Juujapju kurtararranja wajarnu, “Mamangka, ngarnawarrapurlukangka kurungkarniya wajala!, ngayurninyurra tarrka kanyilku katiku parna Kayinankarti. Jiingkarniya kati tuunyjula!” Yuujunuya. Jilanya Juujappa parna Yijipingka wulu wanka nyinama, wan yantartan tiin yiiyangka, kayilapa miturringu. Yijipimartajiluya murrarnilu mitu karrpira pakujingka ngarrijunkura kanyilpayi. Kujungkarringuya yulapayi jilanyaya Juujappa pakujingka ngarrijunukaya kanyilpayi.

<- Julyjujanu 49