Yaatamupula Yiipi wulu nyinapayi, ngarripayipula. Palujanuyila Yiipilu kaja yutimanu. Manuyila ka wajarnu, “Mama ngarnawarrapurlukalurni kaja ngaanya yungu.” Kaja palunyanga Yiipilu yinijunu, ‘Kayinpa’. Kayilapa palujanunga kaja kujupa yutimanu. Yini palunyanga ‘Yayipulpa’. Palulunga majurringu warrkamurripayi ka jiipukaja ngampurrmalpayi. Kayilapa palumili kurta majurringu warrkamurripayi kaatanmayangka. Mirrkakaja majurringu, kayilapa mankura-jananya kanyilpayi, ngalkuraku. Karlkinpa mirrkakaja manu ka kangkura mirtayirtiyuru junkupayi, Mama ngarnawarrapurluka marninypungkuraku. Kayilapa Yayipulju yanu kuju japuwarta jiipu manu kayilapa mitu pungu. Jiipu palunyanga murrkangunyawanpa nyinapayi. Palujanuyila warlangkura kangkupayi kunyjunyukaja kara Mamaku kangkura junkupayi, mirtayirtiyuru Mamaku marninypungkuraku. Kayilapa Mamalu nyangu kuka palu mirtayirtiyuru kara Yayipulku pukurlarringu. Kayilapara mirta Kayinku pukurlarringu, palumiliku mirtayirtiyuruku. Palujanura Kayinpa Mama ngarnawarrapurlukaku wirrilyirringu.

Palujanura karrpu kujupangka Kayinju wajarnu Yayipulku, “Yankurali yarrkalpa.” Kayilapa kujungkapula yanu ka Kayinju kutungka mitu pungu, wirrilyiwintilu. Palujanuyila junu kayilapa ngurratu marlaku yanu.

Kayilapara Mama ngarnawarrapurlukalu japirnu, “Wanyjalarringu nyuntumili marlaju?” Kayilapa Kayinjura paki wajarnu, “Ngurrparna. Mirtarna jijiyuru ngampurrju kanyilkura, palunga majurringu.” Ka Mamalura japirnu, “Nganakun nyuntumili marlaju mitu pungu?, pungkuparnilun junkungara. Palumili miji parnangka ngarrira wilturrini. Ngayulurna miji palu nyangu karnanta kuwarrilu puntajilu putamanku.”

Mama ngarnawarrapurlukalura yarrarnu Kayinku wajarnu jilanya, “Nyuntukurnu marlajumili mijikaja parnangka yintingu wilturringu. Palujanun nyuntumili mirrkakaja parnangka wituka purtu kuruwumunku, paki. Mirtan nyuntu ngaangka ngurra walyjangka wulu nyinaku, paki, kayilapan purtu mirrkakaja kuruwumunku. Palujanuyilan ngurra kujupa kujupakajangka purtu nyinaku jirlpirriku kayilapan miturriku.” Kayilapa Mamangkalu Kayinju wajarnu, “Ngayurnin kurtingkuni nyuntungkamarra, mirtarnanta nyinaku. Ka purturna kulini ngurra kujupangka nyinaraku, mirtarnin ngampurrju kanyilku. Mayiti kujupalurni nyakuka mitu pungku.”

Mama ngarnawarrapurlukalura wajarnu, “Paki. Walkajunkurnanta martu kujupakajaluntaya nyakuraka kulilkura jilanya, ‘Martu ngaanga walkawinti parra yaninpa. Mama ngarnawarrapurlukalu ngampurrju kanyini. Mirtala mitu pungkuraku, Mamalu-lanya puntajilu mitu pungkujaku, ngayurtinmili walyjakajalurrju.’ ” Jilanyalu Mamalu Kayinja walkajunu ka kurtingu, martu kujupakajaluya mitu pungkujaku. Palujanuyila Kayinpa ngurra wirrirlikarti kakarra yanu, ka ngurra Yiitanpa junu yanu.

<- Julyjujanu 3Julyjujanu 5 ->