Jayikapju-jananya wirrirlijanulu nyangu tawukurlu warnmarla, Yiijumapu. Palujanu Jayikapju-jananya wajanu Liiyamapuya kurranyi yikikura, jijikurlujarra. Ka-janampa wajanu ngamuyuruya Riijilmapu marlakarti Liiyamapungka yikikura. Palunyajanu Jayikappa-jananya marlakartijanu yanurranpa nyarratu warnmalakarti. Nyangu warnmarlakajangka kurranyi palumili kurta, Yiiju ngaranyjanpa. Jayikappa yanurnikalu kutungka pupara pakalkatipayi, japan tayimu. Maajangkaluya ngaranyjanja murrarnilu pakara pupatini. Palunyajanu Yiijulunga nyangu kayilapa Jayikappa yikurntanu. Ka pinirringu yampurnu. Yampurnungkupula nyunyjulpayi yulanyjanju. Kayilapara Yiijulu japirnu, “Nganakuparaya martu jiinpa?” Palungkayilapara wajarnu, “Ngaakajangarni yungu Mamalu, ngarnawarrapurlukalu.”

Palunyangka Yiijulu wajarnu, “Katikulaju-nyurranya ngurra walyjakutu.” Ka Jayikapju marrkurnu, “Paki, kurranyiya yanama!, ngayunpalaju purrka marlakarti yankumalpa.” Palunyajanu-jananyaya Yiijumapulu junu yanu, kayilapaya ngurra walyjakarti yanu. Mirtaluya yanu nyinangu, palunyakurnu mayangka Yiijukurnungka, paki, yanuya kujupangka ngurrangka paljurnu, ngurra Jakujja. Palujanuyilapaya ngurra jii junu yanu, kalyu kujupakarti, yini Jikimkutu.

<- Julyjujanu 32Julyjujanu 34 ->