13 Bho, nde nane joanaampotika mwenga, ngati ananjomalaki mu kuhenga ghambone? 14 Nambu hata ngati anaimpaliki kung'ahika kwa ndandi ja kuhenga ghaghapalika kwaka Chapanga, bhela, mpengalike. Ngamwanjoghopa mundu jokapi jola, wala ngamwijetakela kujeghaleka mu choghoi. 15 Nambu muntopila Kristo Bambo mu mitima jino. Mbya tayali kumuyanga mundu jokapi joanaandalukya panani ja mahobhalelu ghaghabhi mkati jino, nambu muhenga bhenibhela kwa upole na utopelu. 16 Mkubhaje na zamili jamboni, nahuli pamtonduleka, bhala bhabhapwagha mahakau panani ja luhomu lwinu lyamboni ngati Bhakristo, bhabhona iyone. 17 Kwa ndandi nde mbanga kung'ahakika kwa ndandi ja kuhenga ghambone, anangati kung'ahakika hoku nde mapalu ghaka Chapanga, kuliku kung'ahakika kwa kuhenga mahakau. 18 Kwa ndandi Kristo mweni akang'ahakiki kwa ndandi ja mahoku, akapotili punkamu pena na ikayaghanile, mundu jwanga mahoku kwa ndandi ja bhana mahoku, nahuli ampelakaje mwanganya kwaka Chapanga. Akakomakiki kihyegha nambu akatendakiki mwomi kwa uwezu waka Roho Mhuhu, 19 na kwa matamu ghaki gha kiroho akapiti kubhatangazila roho yela yeikabhi muchifungo. 20 Bhanihabha nde bhala bhabhakaniki kumtii Chapanga paakabhalendalili kwa uhinakalilu wamaheli chikahi Nuhu paakabhi alenganake safina. Nkati ja safina jela nde bhandu bhachokopi pela, yani bhandu nane pela, bhabhakengaliki mu machi, 21 na machi ghanihagha ghakabhi ulenganesu wa ubatizo ghounkengele mwanganya sajeno. Ubatizo nga kwa kugholola chihiku chechibhili muhyegha, nambu nde chilanga kwaka Chapanga chechihengakeka mu zamili jinyahi. Unkengalela kwa indela ja kuhyoka kwaka Yesu Kristo, 22 ambaju akapiti kunani kumahunde na sajenu atami upambala wa kumalelelu wa chiwoku chaka Chapanga, atawala panani ja bhatumika bha kunani kumahunde, na bhabhabhi na lujiniku, na bhabhabhi na makile.