Sua Turkeŋana 5

Sipsip ki Anutu ikam ro ta Anutu ŋgar kini imbot se na

1 To motoŋ isala mi aŋre Biibi tau imbotmbot se muriini peeze kana i, iteege ro ta imbot la namaana woono. Ro tana, tilul mi tiparooro bigil lamata mi ru ise ro kwopiriini be isekap ma tuŋ kat. Mi bigil tana na, Anutu itunu musiini imbot se. Mi ro tina, bude ise pakaana toro toro. [a][b] 2 Mi aŋre aŋela mburaanaŋana ta iboobo ma kalŋaana kat. Isombe: “Asiŋ ta ni ndeeŋeŋana, mi irao be ikinke zin bigil mi ipeele ro tiŋga?”

3 Beso titiiri wal saamba kan, mi zin toono kan, mi zin meeteŋan na, tindeeŋe tomtom sa ta ni ndeeŋeŋana mi irao be ipeele ro tana mi ire na som. 4 Tabe nio aŋmaŋga to aŋtaŋ ma biibi. Pa tomtom sa ni ndeeŋeŋana bekena ipeele ro mi ire na som.

5 Aŋtaŋtaŋ ma aŋbotmbot, mi wal zanŋan tomoota mi paŋ, tomtom kizin ta imar to ipeteke yo. Iso: “Ai, taŋ pepe. Re tomtom ta tiŋga. Ni Laion ta iyooto pa Yuda na. Ni popoŋana zaanaŋana ki Dabit, mi iporou ma ilip kek. Tana ni irao ikinke bigil lamata mi ru mi ipeele ro tiŋga.”[c]

6 To aŋre Sipsip ki Anutu ta muŋgu tipuni ma imeete na, imendernder kolouŋana kat pa Biibi muriini. Mi koroŋ matan yaryaaraŋan paŋ ziŋan zin wal tomoota mi paŋ ta zanŋan na tiliu i. Ni ka kandaara lamata mi ru. Pa ni mbura keskeezeŋana. Mi mataana ta kembena, lamata mi ru. Mataana, ina iwe kin pa Anutu bubuŋana lamata mi ru ta ni iŋgo zin ma tila tirao pa toono ta boozomen.[d] 7 Aŋre i imar, to ikam ro ta imbotmbot la Ni tau mbuleene se muriini peeze kana i, namaana woono. 8 Beso ikam na, koroŋ matan yaryaaraŋan paŋ ziŋan zin wal tomoota mi paŋ ta zanŋan na, tila ma titoptop su kereene uunu. Zitun tataŋa len kombom, mi titeege mbooro milmilŋan ma ikot zin. Mbooro tana na, bok pa aigau rukŋana ta kuziini ambaiŋana iwedet pa. Koroŋ kuziiniŋana tina, ina Anutu wal kini potomŋan, suŋŋana kizin.[e]

Mboe popoŋana

9 Mi timbo mboe popoŋana ta kembei:

“Nu na ndeeŋeŋom. Tana rao be kam ro, mi kinke zin bigil, mi peele.

Paso, nu tipunu ma siŋim ireere.

Mi siŋ ku ta iŋgiimi tomtom boozomen ma tiwe Anutu lene.

Zin tau kulin pareiŋan, kalŋan pareiŋan, mi timar pa karkari ta boozomen.[f]

10 Mi nu kam zin ma timap tiwe patoronŋana ka tomtom bizin, be timbot la peeze ambaiŋana ki Anutu tiam mi timbeeze pini.

Mi ina zin ta ko tikam peeze pa toono.”[g]

11 To motoŋ ila na, aŋre aŋela ta munŋaana ma munŋaana ka tieene, mi aŋleŋ kalŋan. Tinin zin na tarao som. Timbot papiliu Biibi muriini tau koroŋ matan yaryaaraŋan paŋ mi zin wal tomoota mi paŋ ta zanŋan na timbotmbot pa.[h] 12 Mi kalŋan izalla ma tizzo ta kembei:

“Sipsip ki Anutu ta tipuni ma imeete na, iti sombe tapakuri, na indeeŋe men.

Pa ŋgar kini biibi, mi ni mbura keskeezeŋana.

Mburaana ilip pa koroŋ ta munŋaana men.

Mi ni irao kat pa koroŋ ta boozomen.

Mi zaana mi uruunu ta kembena, biibi kat.”

13 Mana aŋbotmbot mi aŋleŋ koroŋ ta munŋaana men tau Anutu iur zin na. Timbot saamba, timbot toono, timbot toono leleene, mi timbot tai. Timaŋga mi tilup kwon ma tiso ta kembei:

“Biibi tau mbuleene se muriini peeze kana, mi Sipsip kini na, niam ko ampakurkur zin pa kampeŋana kizin mi amwidit urun, mi iseeŋge iseeŋge ma ila.

Pa zan mi mburan na, biibi kat.

Mi peeze kizin na, mbolŋana.”[i]

14 To koroŋ matan yaryaaraŋan paŋ tilup kwon mi tiso: “Ŋonoono.” Mana wal tomoota mi paŋ ta zanŋan na, titoptop su mi tipakur Anutu mi Sipsip kini.

<- Sua Turkeŋana 4 Sua Turkeŋana 6 ->