Sua Turkeŋana 15

Aŋela lamata mi ru titeege pataŋana lamata mi ru

1 To motoŋ isala saamba na, aŋre uraata biibi toro ipet. Uraata tiŋga na, ipa ndel kat. Takam ŋgar pa ma tarao som. Aŋre aŋela lamata mi ru titeege pataŋana lamata mi ru ta sananŋan kat. Ina be ikemer pa, mi iposop Anutu kete malmalŋana kini.[a]

2 Mi aŋre koroŋ kembei ta tai i. Iŋgalaŋ kat. Mi you miaana ikam prikprik lela. Mi zin wal tau timender mbolŋana mi tikis urlaŋana kizin ma tilip pa koroŋ sananŋana raama ruŋguunu, mi tikam kilalan kini som na, aŋre zin timender se tai tina, mi len kombom ma irao zin. Kombom tana, Anutu itunu ikam pizin.[b] 3 Mi timbo mboe ki Mose ta Anutu mbesooŋo kini i, mi Sipsip ki Anutu mboe kini. Tiso:

“O Merere Anutu, nu mburom keskeezeŋom.

Uraata ku biibi kat. Amkam ŋgar pa ma amrao som.

Nu king biibi ŋonoono ta mborro karkari ta boozomen.

Nu kamam peeze mi iseeŋge iseeŋge ma ila.

Mi mbulu ku na, ndeeŋeŋana mi ŋonoono men.[c]

4 O Merere, nu itum tamen ta potomŋom.

Tana tomtom ta munŋaana men ko timoto u, mi tileŋ la kalŋom, mi tipakur nu zom.

Mi zin karkari ta boozomen ko timar, mi tilek kumbun pu, mi tipakuru.

Pa mbulu ku ta urur kadoono ndeeŋeŋana pizin tomtom, ina ta swe ma imbot mat kek.”[d]

5 Kaimer mana motoŋ ila na, aŋre beeze ki Anutu ta imbotmbot saamba a, leleene ta potomŋana kat na ka kataama ikaaga. Beeze tana na, sua ta Anutu iswe pa wal kini bekena ipombol zin ma tito zaala kini na imbotmbot lela.[e] 6 Mi aŋela lamata mi ru tana tiyooto ma tipet pa beeze raama pataŋana lamata mi ru ta sananŋan kat. Aŋela tana timbot la mburu kokouŋan ta ŋgeezeŋan kat. Mi tiur mburu milmilŋan ta imbot se kan mbooro ma iliu zin. 7 To koroŋ matan yaryaaraŋan paŋ na, kizin ta imaŋga, to irai mbooro milmilŋan lamata mi ru ma ikot aŋela lamata mi ru tana. Mbooro lamata mi ru tana na, Anutu ta imbotmbot ma alok i kete malmalŋana kini ila ma bokbok.[f] 8 Mi urum lene ta saamba a, na bok pa you kakoi ta iyooto pa Anutu azuŋka kini mi mburaana na. Tabe ikam ma tomtom sa irao be ilela som ma irao aŋela lamata mi ru tana tiposop uraata kizin ma imap.[g]

<- Sua Turkeŋana 14 Sua Turkeŋana 16 ->