Sua Turkeŋana 11

Anutu kwoono bizin ru

1 Aŋbotmbot mi tikam koroŋ molo kembei ta mbiizi ma imar tio. Koroŋ tana, ina be iwe kin. Imar mi aŋleŋ sua ta kembei:

“La ma kin Urum Merere mi artaal. To nin zin tomtom ta tizuŋzuŋ lela na.” *✡ 2-3 Mi lele ta ipapiliu Urum Merere na, kin pepe. Pa ina Anutu izem ma iwe zin wal ta Yuda somŋan i len ma irao puulu tomtooru mi ru. Tana zin ko tipadagdaaga kar potomŋana ta Yerusalem na ma irao aigule 1,260. Indeeŋe mazwaana tana na, nio ko aŋgo tomtom tio ru be tiwe nio kwoŋ mi tipombolmbol sua tio. Ziru ko tiŋgun muuŋgu mi tiru pa mburu gabgapŋan.” †✡

4 Ziru tiwe kembei ke olib ru mi lam ru ta timender su Merere ki toono ta boozomen kereene uunu na. Pa tikam Anutu ruŋguunu mi tizzwe sua kini pizin tomtom.✡Sek 4:11+ 5 Mi kan koi sa iso ikam be ipasaana zin, to you miaana ko ipet pa wal ru tana kwon mi ikani. Tana tomtom sa isombe ipasaana zin, inako imeete pa zaala ta kembena.✡Mbo 97:3; Yer 5:14 6 Sombe wal ru tina tiso zin tomtom pa Anutu kalŋaana, na Anutu ko ipombol zin ma tirao be tipumun saamba ma yaŋ isu som. Mi ko len mburan be titooro yok ma iwe siŋ tomini. Mi sombe lelen be tipasaana toono pa pataŋana sa, na zin ko tirao. ‡Muŋgu Anutu kwoono Ilia ipumun saamba ma yaŋ isu som. Mi Mose ta itooro yok ma iwe siŋ. Tana wal ru ti uraata kizin ko kembei ta Ilia mi Mose.✡Kam 7:17+; 1Kin 17:1; Yems 5:17

7 Sombe ziru tiposop uraata kizin pa sua soyaaraŋana, tona koroŋ sananŋana ta per ma ise pa naala ta usomŋana na, ko imaŋga ma ilip pizin, mi ipun zin ma timetmeete.✡Dan 7:21; Lu 13:32; Tur 13:1,5+, 17:8 8 Mi tomtom ko tizem uri ru tana ma timbot sorok su kar keteene. Kar biibi tana, ta tipun Merere kizin tomini ma imeete sala ke pambaaraŋana na. Mi titooro sua pa ma tipaata zaana be Sodom mi Aikuptu.✡Yesa 1:9+; Mk 10:33+; Lu 13:34 9 Mi zin tomtom ta kalŋan pareiŋan, mi kulin pareiŋan, mi timar pa karkari ta boozomen, ko timap ma tigedgeede su pa ziru tana pa aigule tel mi suruunu. Mi ko tiyok be titwi ziru som.✡Mbo 79:2+ 10 Pa muŋgu Anutu kwoono bizin ru tana tikamam pataŋana biibi pizin tau. Tana tomtom tau timap timbot su toono ko lelen ambai pa meeteŋana kizin, mi menmeen zin biibi, mi tiparkamam koroŋ pizin.✡Mbo 105:38; Yo 16:20

11 Beso aigule tel mi suruunu tina ilae na, Anutu iwi bubuŋana mata yaryaaraŋana pa wal ru tana, to timaŋga timender. Mi tomtom tire zin, to motoŋana biibi ikam zin.✡Ezek 37:5+ 12 Molo som na, tileŋ kalŋaana biibi imbot saamba mi isu pa ziru. Iso: “Kese tis!” To kan koi bizin tigedgeede zin, mi miiri tieene ikam zin ma tisala pa saamba.✡2Kin 2:1+; Mk 14:62; Ŋgo 1:9; Tur 12:5 13 Indeeŋe kat mazwaana tina na, yeŋyeeŋge biibi kat itok toono, mi kar biibi tana pakaana ta ite ma imap. Mi pakaana lamata mi paŋ na, imbot ambai. Mi tomtom munŋaana lamata mi ru (7,000) timetmeete ma tila len pa yeŋyeeŋge tana. Mi zin ta timbot na, motoŋana biibi kat ikam zin. Pa tikilaala Anutu mburaana tau.

14 Ina pataŋana biibi toro ta iwe ru pa. Mi iwe tel pa na, molo som to ipet.

Twiiri ta iwe lamata mi ru pa i itaŋ

15 Beso aŋela ta iwe lamata mi ru pa i, ila ma iwi twiiri kini na, aŋleŋ iwal biibi ta timbot saamba a kalŋan isala ma tiso ta kembei:

“Buri na, zin peeze kan ki toono mburan imap kat, mi koroŋ ta boozomen imbot la peeze ki Merere tiam mi Mesia kini.

Ni kola ikam peeze ma alok!”✡ 16 To wal tomoota mi paŋ ta zanŋan na, tizem murin peeze kan ta timbot su Anutu kereene uunu na, mi titoptop su ma tiwit uruunu. 17 Tisombe:

“O Merere Anutu, nu biibi mi mburom keskeezeŋom.

Nu mbotmbot ta muŋgu kek. Mi iŋgi koozi tomini mbotmbot.

Mburom biibi mi peeze ku, ta iŋgi swe ma imbot kat mat kek.

Tana niam leleyam ambai pu, mi ampakuru.✡

18 Zin karkari keten malmal ma tisaana kat.

Mi iŋgi mazwaana tabe nu swe ketem malmalŋana ku ma ipet mat.

Iŋgi be tiiri wal meeteŋan, mi kam kadoono ambaiŋana pizin mbesooŋo ku ta tiwe kwom mi tiso kalŋom pizin tomtom na.

Tana wal ku potomŋan ta timototo u mi tileŋleŋ la kalŋom na, nu kola kam len kadoono ambaiŋana.

Zin ta zanŋan na, mi zin sorrokŋan tomini.

Mi zin wal ta tipasansaana mbulu su toono, ta iŋgi be pasaana zin i.”✡

19 Tiso makiŋ, mi Urum Merere ta imbot saamba a ka kataama ikaaga ma Sua Mbukŋana Ka Koror imbot mat. To lele ikimitmit, saamba ikuruŋruŋ, lolo iwenweene, yeŋyeeŋge itok, mi yaŋpat ilup mi isu pa toono.✡Kam 9:24, 19:16; Ibr 9:4; Tur 8:5

<- Sua Turkeŋana 10 Sua Turkeŋana 12 ->