78
Muŋaiŋana ki Merere mi zooroŋana kizin Israel
Mboe ki Asap
1 O niom wal tio, kuŋgun talŋoyom pa sua tabe aŋkam piom i.
Niom ta boozomen keleŋ sua tabe aŋso yom pa i.
2 Pa kwoŋ ko ikaaga mi aŋpit mbol piom.
Ko aŋso pa mbulu ta muŋgu ipet na, mi aŋpeeze ka ŋgar turkeŋana piom.
3 Mbol ta iŋgi be aŋso i, tumbundu bizin tipit piam ma amleŋ,
tanata amute.
4 Muŋgu Yooba izzwe mburaana ma iwedet mat.
Ni itortooro mos mburanŋan boozo, mi ikamam uraata bibip.
Tanata tomtom tipakurkuri.
Mi uraata kini tana, iti irao tawatkaala pa lutundu bizin na pepe. Bela tozzoyaryaara.
Naso popoŋana kiti tabe tipet pa kaimer i tileŋ tomini.
5 Zaala tabe wal kini tito bekena ni ziŋan tiparlup zin ma tiwe tamen na, muŋgu Yooba iswe pa tumbundu bizin, ta popoŋana ki Yakop na.
Ni iso zin Israel pa sua kini.
Mi iur sua pa tumbundu bizin
be zin kadoono tipaute lutun bizin pa sua tana. [~1~]
6 Naso zin tomini tileŋ,
tona zin kadoono tipaute lutun bizin,
mi iseeŋge iseeŋge ma ila.
7 Mi popoŋana kizin ko tipase pa Anutu,
mi matan iŋgalŋgal uraata ta ni ikamam na,
mi titoto tutu kini.
8 Kokena tikam kembei ta tumbun bizin.
Pa tumbun bizin na, wal zorzooroŋan kat.
Titoto Anutu leleene som,
mi tiurur kat lelen pini som,
mi titoto sua ta timbuk pini na som.
9 Zin popoŋana ki Eparaim na, len peene ambaimbaiŋan be tikam malmal pa.
Tamen indeeŋe ta malmal ipet na, zin tiko ma tila len.
10 Mi sua ta ziŋan Anutu timbuk na, titoto som.
Mi tipa pai kizin ma indeeŋe pa tutu kini som.
11 Mi matan mbeleele uraata ta muŋgu Anutu ikamam pizin na.
Mos bibip ta ni ikam la matan ma tire kat na, matan iŋgalŋgal som.
12 Indeeŋe ta tumbun bizin timbotmbot Aikuptu na,
Anutu itooro mos bibip su lele keteeneŋana ki Zoan mi zin tire kat pa matan.
13 Mi ni ikam ma tai imet ma iwe ru.
Ikam ma tai imender kembei ta siiri mbolŋana.
Tabe iur zaala pizin mi tipa ma tilae mbaaga.
14 Aigule na, ni imbotmbot la miiri tieene, mi imuŋmuuŋgu pizin mi izzo zin pa zaala.
Mi mbeŋ na, ni iwe kembei ta you mi imuŋmuuŋgu pizin. [~2~]
15 Indeeŋe ta timbotmbot lele bilimŋana na, ni ipetepaala pat, mi ikam ma yok ipet.
Ikam ma yok tana ireere biibi kat bekena tiwin. [~3~]
16 Ni ikam ma yok boozomen tiwedet pa raŋ,
mi tirereere ma kembei ta yok bibip.
17 Tamen zin tinoknok men mbulu sananŋana ta tikamam pa Anutu na.
Indeeŋe ta timbotmbot lele bilimŋana ta magargaara men na, tizooro Anutu kor kana kat. [~4~]
18 Pa tisu mi tiso titoombo mburaana.
Tiso pini be ikam kan kini ta zitun lelen pa i. [~5~]
19-20 Mi tipasaana sua pini ma tiso:
“Iŋgi tombot lele bilimŋana tiŋgi. Mi ko Anutu mburaana irao be iŋgun mbalia mi ikam kanda kini?
Ŋonoono, ni ipun lae pa pat, mi yok boozomen tirereere kembei ta yok bibip.
Tamen ko irao ikam kanda kini mi buzur?”
21 Anutu ileŋ sua kizin tana na, ipas keteene ma leleene ibayou kat.
To ikam ma you isu mi ikan zin wal kini.
Keteene malmal mi imaŋga pizin Israel.
22 Paso, zin tiurla kini som,
mi tipase pini be iuulu zin som. [~6~]
23 To ni iur sua pa kataama ki saamba ma ikaaga.
24 Mi ikam ma kini manna isu pizin be tikan.
Ikam kan kini saamba kana. [~7~]
25 Zin tikan kini ta kizin aŋela i.
Anutu ikam kan kini biibi kat.
26 To ipei miiri biibi ma imar pa zoŋ uunu.
Itunu mburaana ikam ma re ipol.
27 Mi ikam zin man uunuŋan ma dudut ma timar baram su pizin wal kini.
Man ta tirie ma timar na, munŋaana ka tieene, kembei magargaara ki sosou. [~8~]
28 Anutu ikam zin ma titoptop su lele ta wal kini timbotmbot pa na,
mi tipapiliu beeze kizin.
29 Tana zin Israel tikan tikan ma kopon isaana.
Pa Anutu ikam kan koroŋ ta zin basmai zin pa i.
30-31 Mi zin basmai zin kat. Tana timbel kanŋana.
Tikanan buzur tana ma timbotmbot, mi Anutu kete malmalŋana kini isu,
mi ikas zin wal kizin ta mburanŋan na ma timetmeete.
Ni ikas zin naŋgaŋ karwaŋga kizin Israel.
32 Zin Israel tire katmbulu boozomen tana. Tamen tinoknok men sanaana kamŋana.
Timbel mos reŋana. Tamen lelen be tipase pa Anutu som.
33 Tana ni iyembut swon ma imap karau men.
Mbotŋana kizin kembei miiri ta ipet pa kwondo, mi imbiriizi ma imap.
Paso, tipiyooto ŋonoono ambaiŋana sa som.
34 Ŋonoono, indeeŋe ta ni ikazas tomtom kizin pakan na, karau men mi zin pakan tikilaala, mi titooro lelen ma tiru zaala be tila kini mini.
Tana tisuŋi be iuulu zin.
35 Mi matan iŋgal Anutu mini ta kembei: Ni ta tun ŋonoono. Pa ipombolmbol zin mi ipakalkaala zin pa koroŋ sananŋan kembei ta raŋ sumbuunu.
Anutu kor kana kat, ta itatkewe zin pa pataŋana kizin.
36 Mi ina tikam pakaamŋana pini. Pa sua tiso.
Mi ka mbulu na, tikam som.
37 Zin tiso tiur kat lelen ila ki Anutu.
Mi sua ta ziŋan Anutu timbuk na, titoto som. [~9~]
38 Tamen Anutu, ni imuŋaiŋai zin, mi irekreege sanaana kizin. Tana ipasaana kat zin som, mi iyaramraama kete malmalŋana kini.
Leleene bayouŋana kini na, ni izzwe ma iwedet kat mat som. [~10~]
39 Paso, ni mataana iŋgalŋgal ta kembei: Zin na, koroŋ ki toono men.
Timbot rimen mi timap, kembei miiri ta itoogo ma imar, mi imbiriizi ma ila ne.
40 Indeeŋe ta timbotmbot lele bilimŋana na, tikam zooroŋana pa piizi sa?
Gorgori ta tiwwa pa lele ta magargaara men na, tipasansaana Anutu leleene.
41 Ni Anutu Potomŋana kizin Israel.
Tamen zin tinoknok toomboŋana pini, mi tipazas keteene. [~11~]
42 Zin matan iŋgalŋgal mburaana som.
Mi mazwaana ta ni ikamke zin pa kan koi bizin naman na, tikam ŋgar pa som.
43 Pa muŋgu, ni itortooro mos mburanŋan isu Aikuptu.
Ikamam uraata bibip isu lele keteeneŋana ki Zoan. [~12~]
44 Ni itooro yok kizin Aikuptu ma tiwe siŋ lup.
Tabe zin Aikuptu kan yok sa be tiwin som. [~13~]
45 Mi iŋgo mberommberom ma tila tilol lele kizin, mi tikan zin ma tisaana.
Mi iŋgo ŋgeu ma tila tipasaana zin. [~14~]
46 Mi iŋgo siizi ma tila tikan kini kizin
mi tipasaana mokleene kizin. [~15~]
47 Mi ikam ma yaŋpat isu mi ipasaana ke baen kizin,
mi yaŋ mosoolo ipasaana ke fik kizin. [~16~]
48 Mi ikam ma yaŋpat isu mi ipun makau kizin.
Mi ikam ma lolo iwenweene sipsip kizin.
49-50 Imbotmbot ma kaimer to irao iyaraama kete malmalŋana kini mini som. Leleene ibayou ma isaana kat.
Tana ileele zin Aikuptu kan mini som, mi iliŋ kete malmalŋana kini ma isu ikam kat zin.
Pa iŋgo zin aŋela ma tila, mi tipasaana zin pa mete sananŋana ma timetmeete lup. [~17~]
51 Tana ni ikasgeege zin pikin muŋgamuŋga ta boozomen kizin Aikuptu kan ma timetmeete ma timap.
Zin Aikuptu kan, ula kizin ka ŋonoono mataana kana, ta tisu lup. [~18~]
52 To ikam zin wal kini ma tizem Aikuptu.
Imuŋmuuŋgu pizin kembei ta mboroŋan kizin sipsip, ma ziŋan tiwwa pa lele bilimŋana.
53 Ni imuŋmuuŋgu pizin mi iporoukalkaala zin, tana timbot ambai men, mi timoto kosa sa som.
Mi kan koi bizin na, tai ilol zin ma timon lup. [~19~]
54 Mi ni iyaaru zin ma timar tipet toono kini potomŋana ka kambasa.
Tipet abal ta itunu mburaana ikam ma iwe lene na. [~20~]
55 Mi ni iziiri toono tana ka tomtom bizin ma tiko papirik, mi wal kini tila tikam toono kizin.
To ipeete toono tana ma ikot urum urum kizin Israel ma iwe len be timbot pa. [~21~]
56-57 Tamen zin tisu mi titoombo Anutu kor kana kat mini.
Tikam mbulu raraate kembei ta taman bizin. Pa tizorzoori, mi matan iŋgal tutu kini som.
Mi tipizil ndemen pini, mi timolo sua ta timbuk pini na.
Tana ni irao ipase pizin som.
Zin kembei peene ta palam imet pa ma le uraata sa mini som.
58 Pa tiurpewe patoronŋana murin pizin merere pakaamŋan sala lele mbukunbukun.
Tana tipas kat Anutu keteene.
Mi tiurpe merere pakaamŋan kunun.
Tabe tikam ma Anutu mata mburmbur.
59 Ni ire mbulu kizin tana, to keteene ibeleu
mi ipizil kat ndemeene pizin.
60 Tana izem beeze kini potomŋana ta imbot kar Silo na, ma imborene.
Itunu muriini ta imbotmbot la wal kini mazwan na, leleene be imbot pa mini som.
61 Mi Sua Mbukŋana Ka Koror ta iwe kin pa mburaana mi azuŋka kini, ina ni izem ila kan koi bizin naman. [~22~]
62 Zin Israel na, wal kini ŋonoono. Tamen ni keteene ibeleu kat pizin.
Tana izem zin mi kan koi bizin tikas zin pa buza.
63 Kete malmalŋana kini ikan zin naŋgaŋ kaibiim kizin kembei ta you ma timetmeete pa malmal ma timap.
Tabe tamuriŋ kizin kan tomooto sa be tiwoolo zin som, mi timbombooren sorok.
64 Mi wal patoronŋana kan na, tiŋgal zin pa buza ma timetmeete.
Mi nora kizin titaŋ pizin som.
65 To Anutu imaŋga, kembei tomtom ta ikeene ma imaŋga mi mataana iyaara.
Ikam kembei tomtom mbolŋana ki malmal ta iwin ma ikeene, to imaŋga ma mataana ikam pak.
66 Pa imaŋga pa ka koi bizin, mi iketo zin ma timiili ma tila len raama kan miaŋ.
Mi kan miaŋ tana ko imbotmbot ma alok.
67 To Anutu ipizil ndemeene pa wal ki Eparaim, ta popoŋana ki Yosep na.
Kaimer ipeikat zin pa uraata kini biibi sa mini som.
68 Mi ipeikat popoŋana ta ki Yuda i, mi ikam abal Sion ma iwe lene.
Abal tana, ni leleene pa ilip.
69 Mi ipo urum kini potomŋana isala be iwe itunu muriini. Urum tana imbot sala kor kat.
Mi uunu ko imbol ma imbotmbot ma alok, kembei ta toono ta ni iur na.
70 Mi ipeikat mbesooŋo kini Dabit.
Indeeŋe Dabit imbotmbot siiri kizin sipsip mi imborro zin na, Anutu ikami pa uraata kini. [~23~]
71 Tana Dabit izem zin sipsip lutuntun raama nan bizin ma timbotmbot,
mi iwe king pizin Israel bekena imboro Yakop popoŋana kini.