1 Nio ti aŋpase pa Yooba be iwe ur pio mi imenderkaala yo.

Parei ta koso sua kankaanaŋana pio ta kembei:

“Ko ma la lem pa lele abalabalŋana, kembei man ta imoto mi irie ma isala pa abal.

2 Pa re. Zin wal sananŋan tikewe la zugut lene,

mi tiur peene lutuunu ila palam kek.

Mi tizaŋzaaŋa zin wal ta lelen ŋgeezeŋan na.”

3 O yalei, mbulu ma tutu boozomen ta ipombolmbol mbotŋana ambaiŋana, ta iŋgi tomtom tipasaana ma isaana kek.

Kozo ko tomtom ndeeŋeŋana iuri ila parei? [a]

4 Tamen Yooba, ni imbotmbot lela urum kini potomŋana.

Ni imbotmbot se muriini peeze kana ta saamba a,

mi mataana ikam tomtom ta boozomen, mi itirtiiri zin pa mbulu kizin.

5 Yooba itirtiiri zin wal ndeeŋeŋan mi zin sananŋan.

Mi zin ta lelen pa mbulu zigzikŋana mi titekteege zaaba pizin tomtom na, ni leleene pizin risa som kat.

6 Tana ni ko itiyaara you keseene ramaki koroŋ bayouŋana ta kuziini sananŋana kat na ma isu pizin wal sananŋan.

Mi ikam miiri bayouŋana kat ma iseeze matan pa. [b]

7 Pa Yooba, ni ndeeŋeŋana mi leleene pa mbulu ndeeŋeŋana.

Tana zin wal ta mbulu kizin izal men, ta ko timbotmbot su kereene uunu mi tire i. [c]

<- Mboe 10Mboe 12 ->