108
Tomtom ta isuŋ Anutu be iuuli pa ka koi bizin
Mboe ki Dabit
1 O Anutu, iŋgi leleŋ iwe ru som. Ŋgar tio imbol be aŋpase pu mi aŋto zaala ku.
Tana nio ko aŋbo mboe mi aŋpakuru.
2 Ko aŋmaŋga mi aŋkam kombom tio,
mi aŋzze ma irao zoŋ pok ma ise.
3 Yooba, nio ko aŋpakuru ila karkari mazwan, mi aŋso zin ta kembei: Nio leleŋ ambai pa kampeŋana ku.
Ko aŋbombo mboe mi aŋwidit urum isala kor irao toono ta boozomen.
4 Pa muŋaiŋana mi kampeŋana ta nu zzwe pa wal ku, ina biibi kat. Isala ma ilip pa saamba a.
Mi mbulu ku ta toto sua ku mbukŋana na, ta kembena. Isala ta kor a. [~1~]
5 O Anutu, maŋga mi swe azuŋka ku mi mburom ta zom biibi pa i, sala saamba.
Mi swe ma irao toono ta boozomen tomini.
6 Leŋ suŋŋana tiam ti, mi swooro nomom woono ma uulu yam.
Pa niam wal ku ta nu lelem piam ilip. Tana kamke yam lak!
7 Muŋgu Anutu imbot lela urum kini potomŋana mi iso ta kembei:
“Nio niŋ se paso, aŋporou ma aŋlip kek.
Tana ko aŋpeete toono Sekem mi lele ŋgolooboŋana ki Sukot,
mi aŋur ma iwe leyom leyom.
8 Toono pakaana ki Gileat, ina nio tio.
Mi toono kizin Manase tomini, ina nio tio men.
Eparaim ta iwe kembei koroŋ ta ipakaala uteŋ.
Mi lele pakaana ki Yudea, ina kembei tete ta iwe kilalan pa peeze ta aŋkamam i.
9 Mi lele pakaana ki Moap, ina iwe kembei timbiiri ta aŋwwe pa i.
Mi lele pakaana ki Edom, ina lele ta aŋpiri kumbuŋ keteene pa.
Mi zin Pilistia kan na, nio aŋlip pizin kek. Tana niŋ ise mi kalŋoŋ izalla!”
10 Asiŋ ta irao be ikam yo ma aŋlip pa koŋ koi bizin, mi aŋlela kar kizin ta ka siiri mbolŋana na?
Asiŋ ko imuuŋgu pio, mi iyaaru yo ma aŋla aŋpet lele pakaana ki Edom?
11 Asiŋ toro? Anutu, nu tau!
Tamen iŋgi nu pizil ndemem piam,
mi gabgaaba zin malmal kan tiam mini som.
12 O Anutu, uulu yam be amlip pa koyam koi bizin.
Pa ulaaŋa ta amkamam la kizin tomtom, ina koroŋ sorok.
13 Sombe Anutu igaaba iti, nako tilip.