Koroŋ Ta Boozomen Un 3

Mooto ipakaam Adam ma Eba

1 Mooto, ni tomini imbotmbot mokleene. Mi ni le ŋgar biibi kat pa pakaamŋana ma ilip pa koroŋ boozomen ta Merere Anutu iur zin na. Aigule ta na, ni imaŋga mi iwi moori. Iso: “Parei, Anutu iŋgalsek pa niomru be kakan ke ŋonoono sa ta imbot mokleene tiŋgi pepe? Ina ŋonoono?”[~1~]

2 Mi moori ipekel sua kini ma iso: “Soom, ke ta boozomen ti, niamru irao amkan ŋonon makiŋ. 3 Tamen ke ta imender la mokleene lukutuunu na, Anutu iso yam pa ta kembei: ‘Kakan pepe, keteege pepe. Kokena kemeete.’ ”

4-5 To mooto iso pa moori mini: “Soom, niomru ko irao kemeete na som. Anutu, ni iute: Sombe kakan, inako motoyom ikam pak, mi ŋgar tiom ipet ma kembei ta ni itunu, mi kikilaala ŋgar ambaiŋana mi ŋgar sananŋana.”

6 Moori ire ke tana ŋonoono na, kembei ambai pa kanŋana. Tabe mata berber pa. Mi isombe ke tana ŋonoono ko ikam le ŋgar. Tana ikam mi ikan. Mi ikam waene ta ziru timbotmbot na kana ma ikan tomini.[~2~] 7 Ziru tikan makiŋ, to matan ikam pak mi tikilaala zitun kembei timbot sorok. Tabe tila ma tikam ke runrun mi timbat, bekena tipakaala zin pa.

8 Rorou, ma lele iluumu, to Merere Anutu isu mi iwwa pa mokleene. Mi ziru tikanamaali, to tiko ma tila tike lela ke lene. 9 To Merere Anutu iboobo tomooto ma iso: “Adam, nu mbot swoi?”

10 Mi ni ipekel sua kini ma iso: “Nu wa pa mokleene mi nio aŋkanamaalu, tabe aŋmoto mi aŋmar aŋke i. Pa iŋgi aŋbot sorok.”

11 To Anutu iwi i ma iso: “Asiŋ iso u ta kembena? Nu tana, ke tau aŋur ŋgalseki pu be kan pepe, ta ko kan sa kek, na?”

12 Tomooto iso: “Nio som. Moori ta nu uri pio ta ikam ma aŋkan.” 13 Tona Merere Anutu iso la pa moori: “Wai, nu kam mbulu taiŋgi paso?” Mi moori iso: “Nio som. Mooto ipakaam yo, tabe aŋkan.”

Merere iur kadoono ise kizin

14 To Merere Anutu iso la pa mooto ta kembei:

“Nu kam mbulu sananŋana kat,

tana kadoono tabe aŋkam pu i ko biibi ma ilip.

Mbotŋana ku ko ipa ndel pa zin mbili ma koroŋ su kan ta boozomen.

Ketem ruunu ko iwe kumbum keteene, mi pa pa.

Mi kom kini na, musmuuzu ki toono.

Mi ko mbotmbot ta kembena ma irao swom.

15 Mi nio ko aŋkam ma niomru moori kaparwe koyom koi.

Mi popoŋana ku mi popoŋana kini ko tiparwe kan koi tomini.

Popoŋana kini sa ko ipapaala utem,

mi nu ŋase pa kumbu dibiini.”[~3~]

16 Mi moori na, Anutu iso pini ta kembei:

“Nu sombe kopom, nako pataŋana ikamu.

Mi sombe kam tomtom, na nio ko aŋkam ma re yoyouŋana biibi kat.

Tamen ŋgar ku ko iko pa waem na som.

Mi nu ko mbot la ni kopo mbarmaana mi ni imboro u.”

17 Mi Adam na, Anutu iso pini ta kembei:

“Nu leŋ la waem kalŋaana,

mi kan ke ŋonoono ta aŋur ŋgalseki pa na.

Uunu ku tana, ta ikam ma iŋgi be aŋpasaana toono i.

Mazwaana ta so nu mbotmbot su toono,

nako kam uraata ma biibi, to ndeeŋe kom kini.

18 Toono ko ipiyotyooto ro sananŋan mi worwooro matanmatanŋan pu.

Mi nu ko kan zeere ma kini ta izze pa toono tana.

19 Tana ko mbel uraata ma kom uze ipet, tona ndeeŋe kom kini.

Mi ko tekteegi ta kembena ma irao meete mi sula mini toono.

Pa nu tina, nio aŋbuuzu u pa toono.

Tana ko miili mini pa toono.

Pa nu sa toono na.”[~4~]

20 Tomooto na, ni ipaata kusiini zaana be Eba. Paso, ni iwe tomtom ta boozomen nan. 21 Mi Merere Anutu iurpe len mburu pa mbili kulin, mi ipakaala zin pa.

Anutu iziiri tomtom pa mokleene Eden

22 To Merere Anutu iso: “Wai! Iŋgi tomtom le ŋgar kembei ta iti. Pa iute ŋgar ambaiŋana mi ŋgar sananŋana kek. Kokena isemboron namaana pa ke ki mbotŋana mata yaryaaraŋana tomini ma ikan sorok, to imbotmbot ta kembei ma alok.”

23 Tana Merere Anutu iziiri zin pa mokleene Eden, bekena tila tikam uraata pa toono ta ni iur zin ma tipet pa na. 24 Iziiri zin ma tipet, to iur aŋela mbolŋan ma timbot la mokleene Eden zilŋaana ta imbot la ki zoŋ uunu na, ramaki buza ta you ikanan la mi itortoori, bekena tipakaala zaala ta ila pa ke ki mbotŋana mata yaryaaraŋana.[~5~]

<- Koroŋ Ta Boozomen Un 2 Koroŋ Ta Boozomen Un 4 ->