1-2 Ndaama ki Sara irao 127, mana imeete su kar Kiriat Arba, ta imbot la lele pakaana ki Kanaan. (Kiriat Arba zaana toro na, Ebron). Abaraam itaŋtaŋ pini ma som, 3 to izemi mi imaŋga ma ila kizin wal ki Et, mi iso pizin ta kembei. Iso: 4 “Nio iŋgi aŋwe leembe pa lele ti, mi leŋ toono sa som. Tana ko parei? Irao kere leŋ toono pakaana sa, be aŋgiimi ma iwe meeteŋan tiam murin, mi aŋur kusiŋ ilela?” [~1~]

5-6 To zin wal ki Et tiso pini. Tiso: “Biibi, leŋ. Nu kolman mi tomtom zomŋom ki Anutu ta mbotmbot raama yam i. Tana itum re lele iŋgoi ta ambai be kusim ilela. Mi kam ŋgar boozo pepe. Tomtom tiam tasa ko iruutu pu na som.”

7-9 Tona Abaraam imaŋga, mi ituundu pizin, mi iso pizin. Iso: “Sombe koyok pio be aŋurpe leyam meeteŋan murin isu lele tiŋgi, na kala ki Zoar lutuunu Epron mi kiwi i pio, be ikam leŋ raŋ sumbuunu ta imbot toono kini Makpela zilŋaana na. Pa lele tana, ta aŋsombe aŋgiimi ma iwe leyam, mi aŋurpe ma iwe meeteŋan tiam murin. Mi kadoono piizi ta ni isombe leleene pa i, inako aŋkam pini.”

10 Abaraam izzo sua tana pizin wal ki Et ta tilup zin su lupŋana muriini na, Epron itunu imbotmbot tomini. Tana imaŋga mi imender la iwal biibi matan, to ipekel Abaraam kalŋaana ta kembei. Iso: 11 “O biibi tio leŋ, nio leleŋ be ŋgiimi toono tio pepe. Nio aŋbuk sua pu ila iwal ti matan ta kembei: Toono tana raama ka raŋ sumbuunu, ina nio aŋkam pu sorok, be iwe meeteŋan ku murin. La ma urpe kusim muriini mi uri lela.” 12 Tona Abaraam ituundu pizin mini, mi iso pa Epron ila iwal ta boozomen matan ma iso: 13 “Ina ambai. Mi tamen nio leleŋ be aŋgiimi kat toono tana. Tana toono kadoono ima muŋgu, tonabe aŋla ma aŋurpe kusiŋ muriini.”

14 Epron ipekel Abaraam kalŋaana ma isombe: 15 “Biibi, leŋ! Toono tana kadoono irao kembei pat milmilŋan munŋaana ta (400). Tamen toŋgo pa. Pa tomtom kembei ta iti na, tere pat tana kembei ta koroŋ sorok. La ma urpe kusim muriini.” 16 Abaraam ileŋ Epron kalŋaana, to inin le pat milmilŋan irao munŋaana ta (400), kembei ta ni iso na.

17-19 Tanata toono ki Epron ta imbot la Makpela mi igarau pa Mamre na, raama ka raŋ sumbuunu mi ke boozomen ta timbot pa toono tana, ina Abaraam iŋgiimi ma iwe lene. Mi wal boozomen ki Et ta timbotmbot pa lupŋana tana na, tileŋ sua tana mi tire kat koroŋ ki matan. To Abaraam ila ma iurpe kusiini Sara mi iuri ilela raŋ sumbuunu ta imbot pa toono Makpela, mi igarau pa kar Mamre na. (Kar Mamre, zaana toro Ebron.) 20 Tana toono pakaana tana raama ka raŋ sumbuunu, ina zin wal ki Et tikam ma iwe Abaraam lene, be iurpe ma iwe meeteŋan kini murin.

<- Koroŋ Ta Boozomen Un 22Koroŋ Ta Boozomen Un 24 ->