1 “Sombe tomtom sa ikem makau, som sipsip mi ikam mburooŋo pa, som itunu ikan, na bela tomtom tana ipekel makau lamata pa makau ta, mi sipsip paŋ pa sipsip ta, tona ikot sosor kini.[a]

2 “Sombe tomtom kuumbuŋana sa ipetepaala ruumu ma ilela pa mbeŋ, mi sombe ruumu katuunu indeeŋi mi ipuni ma imeete, nako le uunu sa som. 3 Tamen sombe mbulu ta kembei ipet pa aigule, nako ruumu katuunu le uunu pa meeteŋana ki tomtom kuumbuŋana tana.

“Tomtom ta so ikem koroŋ sa, na kozo ipimiili koroŋ tana ma ila ki katuunu mini. Mi sombe ni irao be ipimiili som, nako tiŋgomooni ila kizin wal pakan ma iwe len mbesooŋo, mi tikam ka pat mi tiur la ki koroŋ tana katuunu.[b] 4 Mi sombe tomtom sa ikem doŋki, makau, sipsip, som mbili toro sa, mi tindeeŋe mbili tana imbotmbot men kini, nako ni ipokot pa mbili ru.

5 “Sombe tomtom sa imboro kat mbili kini som, mi tila tikan mokleene ki tomtom toro, na bela mbili katuunu tana ikot pa kini ambaimbaiŋan ta imar pa itunu mokleene kini. 6 Mi sombe tomtom sa itun lele sa, mi you imaŋga ma ikan mokleene ki tomtom toro, som baen lene kini, na bela ikot pa kini ambaimbaiŋan ta imar pa mokleene kini, mi baen ambaimbaiŋan ta imar pa baen lene kini.

7 “Sombe tomtom sa izem pat kini, som koroŋ kini pakan ila waene toro namaana be mataana pa, mi sombe tomtom kuumbuŋana sa ikem koroŋ tana pa ruumu ki waene tana mi kaimer tindeeŋi, na tomtom kuumbuŋana tana ko ikot pa ru. 8 Tamen sombe tindeeŋi som, nako tikam tomtom ta mataana pa koroŋ tana, mi tila tipet Anutu kereene uunu, to tisuŋ Anutu be iswe tomtom tana uunu kini: Ni namaana sosor pa koroŋ ki waene, som som?

9 “Mi sombe wal ru tiparzorzooro pa mbili, mburu, pat, som koroŋ toro sa, mi tiparsuk sua pizin ma tiso: “Nu ta kem koroŋ tio,” na kakam ziru mi kala kepet Anutu kereene uunu, mi kusuŋi be iswe tomtom iŋgoi ta ikam kuumbu na. To tomtom tana ko ikot koroŋ ta ni ikem na pa ru ila ki katuunu.

10-11 “Mi sombe tomtom sa izem doŋki, makau, sipsip, som mbili kini toro sa ila tomtom toro namaana be imboro i, mi mbili tana imeete, som buzur saŋsaŋŋana sa ikani, som wal boozo timar mi tikemi, mi sombe tomtom toro sa ire mbulu tana som, na tomtom ta imboro mbili tana ko ila ipet Yooba kereene uunu mi iso ta kembei: “Ŋonoono kat ta Anutu, nio aŋkem mbili tana som.” Mi sombe ikam ta kembei, na mbili katuunu irao leleene ambai mi sua kini imap. Mi kotŋana sa som.[c] 12 Tamen sombe tomtom ta mbili imbotmbot kini na, imboro kati som, mi wal pakan tikemi, na kozo ikot la ki katuunu. 13 Mi sombe buzur saŋsaŋŋana ikan mbili tana mi iyatututi, na tomtom ta imborro i na, ko ikam mbili pakaana ma ila ki mbili katuunu mi iso i pa. Naso katuunu iute: Buzur saŋsaŋŋana ta ipasaana mbili kini. To kotŋana som. 14 Mi sombe tomtom sa ikam mbili ki tomtom toro be iuuli pa uraata, mi sombe mbili katuunu imbot som, mi koroŋ sa ipasaana mbili tana, som mbili tana imeete, na kozo tomtom ta ikami na ikot mbili tana. 15 Tamen sombe katuunu imbotmbot mi mbulu tana ipet, nako kotŋana som. Mi sombe tomtom ta ikam mbili tana na iŋgiimi uraata ki mbili tana kek, nako kotŋana som.

16 “Sombe tomooto sa iyaaru moori metet sa mi imbuuli, nako iŋgiimi moori tana mi iwooli. 17 Mi sombe moori tana tamaana iyok pa tomooto tana som, nako iwooli som. Tamen ko iŋgiimi kat moori tana raraate kembei ta ŋgomo ula kana i, tona sua imap.

18 “Sombe moori sa ileŋ yaamba, na kupuni ma imeete. [d]

19 “Sombe tomtom sa ziru mbili sa tikeene, na kozo kupuni ma imeete.

20 “Mi sombe tomtom sa ipatoron merere toro sa, na kupuni ma imeete.

21 “Zin wal ta so tiwe leembe pa lele tiom, na kakam bakai pizin pepe, mi keseeze matan pepe. Kakampe zin. Pa motoyom iŋgal. Muŋgu niom tomini kewe leembe su Aikuptu. 22 Mi zin noroŋa mi monmoondo ta kembena. Kakam bakai pizin pepe.[e] 23-24 Pa sombe kakam bakai pizin mi titaŋroro yo be aŋuulu zin, nako aŋleŋ tiŋiizi kizin, to keteŋ malmal kat mi ituŋ aŋteege zaaba piom. Tona ituyom kusiyom bizin ko tiwe noroŋa, mi lutuyom bizin ko tiwe monmoondo lup.[f]

25 “Wal tio ta timbot ŋoobo mi niomŋan kombotmbot na, sombe tikam mbun pu mi kaimer lelen be tikot, na boobo pa pat pakan ma isala ki pepe. So pizin be tikot men pat ta tikam na. 26 Mi sombe kam mburu kizin mbeŋ kana ta tikototo zin pa na ma imbot ku, bekena matan iŋgalŋgal mbun kizin, na aigule ta boozomen nu kozo pimilmiili pizin, mana zoŋ isula. Beso mankwoono, to tiur ma nomom mini. 27 Kokena kiskis mburu kizin pa mbeŋ, to nin tekteege mi tikeene kat som. Paso, mburu kizin ta tikenne pa i, ta nu kiskis ma imbotmbot. Tana sombe kam ta kembei, nako kam pataŋana pizin. To zin ko titaŋroro yo. Mi nio kola aŋleŋ tiŋiizi kizin mi aŋuulu zin. Pa zin wal ta timbot ŋoobo na, nio leleŋ izanzaana pizin.[g]

28 “Motoyom pasom Anutu pepe, mi kigiibi sua sananŋana pizin peeze kan tiom pepe.[h] 29 Mi kini, baen, mi olib tiom mataana kana na, motoyom kon pa pepe. Kakam imar pio. Mi lutuyom bizin tomooto ta muŋgamuŋga na tomini, kuur zin ma tiwe leŋ.[i] 30 Mi mbili tiom lutun bizin muŋgamuŋga ta tomooto na, ta kembena. Kezem zin ma ziŋan nan bizin timbot ma irao aigule lamata mi ru. Beso aigule iwe lamata mi tel, to kakam zin ma kapatoron yo pa. 31 Niom wal potomŋoyom. Pa kewe leŋ kek. Tana koroŋ saŋsaŋŋana sa isombe ipun mbili, som buzur toro sa ma imeete, na kakan pepe. Kigiibi su pizin me ma tikan.

<- Anutu Ikamke Zin Israel 21Anutu Ikamke Zin Israel 23 ->