Lisilimet
Lisilimet At Ne Jon
Levelinga Loklox Axasep
Lumaares 95–96 A.D.
Melemu at lanmet at ne Iesu la luruturut teren uto vana at laxalibet lavanna sangaun kopla lavanna sangaun mi lavalimo lenmaares ga men pe i la ne Jon ga malagan i na lovoang ti lotu. Jon ga vara i do mo lotu na lolos tinotno, mila limixin munepen diga lox asongot limixin at ne Moroa mumu levereven kisip atdi ri ne Iesu Karisito i ngan Leeme Silok. I se ne Jon ga nemen at loogu xokoxo to at losoxan Patimos, Moroa ga lox i xusu na ven lisilimet la ga lox ase i mi lempanga salai naba vot melemu. Keneng ap mo lisilimet Iesu ga vas asi lolos at ne Satan mi mo lentaba lavamunepen bok min, la ga lox ase ne Jon do nedik ua ata nunu at ne Iesu ataba nemen to vana at laxalibet.
Lengkot silok keneng at na lubuk
1:1-8 Jon ga lox aonon lavapaase momo ren ti limixin.
1:9–3:22 Jon ga ven Leeme Silok keneng at lisilimet.
4:1–8:1 Jon ga ven levenmumuat mo naba vot.
8:2–11:19 Jon ga ven lavanuti levenangelo.
12:1–13:18 Satan la luradi vapaase ren diga ravasu.
14:1-20 Lanasip naba sele utut kepe limixin kakapmek.
15:1–16:21 Lavanuti levesongsongot silok.
17:1–20:10 Moroa naba lok li ne Satan at laxao.
20:11-15 Laaleng ete.
21:1–22:21 Laxalibet maxat mi lavatbung menemen maxat.

Lavapaase Axasep

1 *Anaa lovoang, ni lisilimet boro at ne Iesu Karisito, ne Moroa ga raba i min, kusu na lox ase lavasaxaruki ren mi lempanga salai mo naba vot soso mun. La ne Iesu ga riki laangelo ren kusu na vaase axasev i ri ne Jon, lasaxaruki ren, 2 la neni naba tong asu mo lempanga axap ni ga ven i. La anai, ni levelinga boro at ne Moroa, la mumu bok mo levelinga ruturun ne Iesu Karisito ga vaase i. 3 *Luvukat ti mo laradi do na us na levempapaase ali, la luvukat bok tinedi di ronga na levelinga, la di mu asu levelinga ik lok keneng at na lovoang. Mila levenaleng ira auret pam ti na lempanga naba vot.

Lavapaase Momo

4 *Nenia ne Jon, a malagan na levelinga tinemi lavanuti leventaogu lotu mik lok at lenep silok Asia.

Letaba nabalamu la lenmila at ne Moroa nak lok eburu minimi. Neni ga nemen gano, i nemen lingina la naba vot bok melemu. La lavapaase momo bok tinemi boro at lavanuti leventoonan, mo di tu ro melamgo at loxonin orong at ne Moroa. 5 *La lavapaase momo bok boro at ne Iesu Karisito, neni laradi ruturun at lavapaase ruturun la neni lara avot mo ne Moroa ga lox axatu kaxat amlong i basinge lanmet. La ni Lamgomgo at lavaorong at na lavatbung menemen.

Ne Iesu ga balamu nedik la ga lox asepmus dik basinge laxakapmek mi mo lada ren. 6 *La ga lok li nedik ngan lavamaasa at Linintoo ren, kusu dik tana lok lugugu at ne Moroa, ne Temen. Ata emi asu mi ne Iesu, lisisixam mi lolos axap teren. Neni naba nemen amisik. I ruturun. 7 *Mina reven avukat tin. Neni mo naba vot eburu mi loxontakabu, la larabung mixin axap eburu minedi diga vaxarem i at laxaba, dinaba ven lovotpot teren. La limixin axap at na lavatbung menemen dinabang teng mumu i. La nai naba ravasu ruturun kuren. I ruturun.

8 *Li 1:4; 15:3; 21:6; 22:13Moroa, Leeme Silok ga lok keretna, “Nenia mun Lurutu Kaxat la Lumumupit at lempanga axap. Nia aga nemen gano, a nemen lingina, la anaba vot bok melemu. Nenia Lanaraavuk.”

Levelinga Ri Ne Jon

9 *Nenia ne Jon, neton nemi limixin mi nunu at ne Iesu. La nenia na ap kip levesongsongot eburu minimi. Nedik eburu lavaanat at Linintoo ren. Ata tu tuxuruxun at lununu atdik, do nedik ata ekip tangarang mi levesongsongot.

Nenia agak lok at losoxan to Patimos, nia aga nemen go ngan laradi xokoxo mila nia aga tong asu Lagale Lavavang at ne Moroa mi levelinga ruturun at ne Iesu. 10 At lara laaleng, ni laaleng at Leeme Silok, Loroonan at ne Moroa ga suxuna ia, la aga silimet tang ka ne Iesu. La keneng at na lisilimet, aga ronga laxaka linga silok to melemu rak, gang teng ngan luru. 11 La mo laxaka linga ga lok, “Una lok kaka lugun la una malagan asu na lempanga nenu unaba ven i. La una lox aonon i uto at lavanuti leventaogu lotu, tara uto Epesas, la tara uto Smena, la tara uto Pegamam, la tara uto Taiataira, la tara uto Sadis, la tara uto Piladelpia, la tara bok uto Lodisia.”

12 Aga rem gili kusu ana ven i do nege mo laradi ga paase ria, la aga ven lavanuti levenbabao gol gak lok. 13 *Dan 7:13; 10:5La kantubu at nom levenbabao lara laradi ga tu go, neni ga lok ngan Laradi Mevana, ga sigaara mi lavanga singsiga baalom, la loxontamon tantanan ga is korop lobongobong teren min. 14 *Dan 7:9; 10:6; Li 2:18; 19:12La lavatlak teren eburu mi levengkabinim teren gan bun aleng tinotno, ga ngan lovopaxanao i sovosok. La luxatli ren ga babao ngan laxao bokbolot. 15 La luxangkedek teren ga ngangao ngan loxonuat, no laxao i an amemeles i. La laxaka linga ren ga reng ngan lenaonkaka at lavatdan silok it los ukopok. 16 *Ib 4:12; Li 1:20; 2:12,16; 19:15,21At lekngen tino, neni gam tebeng lavanuti larapenti, la to at lungusno lavarise sepsep ga anan evan gak lok teren. La lemeren ga lok ngan laxangking i soosoo bobonot mi lolos teren.

17 Se nia aga ven i, aga subu midi saparap luxangkedek teren la nia aga met aroo. Ketla ni ga sogo tu rak mi lekngen tino, la ga lok tia, “Nemen gat uta marat. Nenia mun Lurutu Kaxat la Lumumupit. 18 *Ais 44:6; 48:12; Li 2:8; 22:13Nenia mun Luntoo Avolo. Aga met pam, ketla nanga a ruuna ka lorooro kopmen taxavaxap teren. La a ruuna bok lolos mavana at lanmet kusu ana suang lumusmaragu at lanmet, la a ruuna lolos mavana at lanmet la a lok tatao lumusmaragu ro Edesa.

19 *Li 1:1Kuren la una malagan asu lempanga salai u ven pam i la lempanga salai mo naba vot melemu. 20 *Li 1:16; 2:1; 3:1Levelinga alipe at lavasuun at lavanuti larapenti nenu u ven i de saparap lakngak tino, di lok katling lavanuti nedi lubung angelo dik lok tatao mo lavanuti leventaogu lotu. La lavanuti levenbabao gol, di ru katling nom lavanuti leventaogu lotu.”

Lisilimet 2 ->