1 O Leeme Silok. Loorong i lok momo, atla nenu ugam taba i mi lolos. I sosoro atla nenu ugam taba i mi lolos tik sak tup mi limixin munepen min. 2 Uga raba vam i mi levempanga axap lebelen ga tu i. Uga raba box i mi mo lavanga neni ga ngising tin.

3 Uga raba i mi leveloklox anarong silok, la ugara vaxasiga i mi lavatbungorong gol at lavatlak teren. 4 Ni ga sing u ri lorooro, la nu ga raba vam i min, lorooro abao naba baalom aleng. 5 Lisisilok teren i volo, atla nenu uk lok tooro i. Laasen silok mi lisisinang teren, nenu xa uga raba i min. 6 Um taba amisix i mi leveloklox anarong, la ik lok momo atla ut kis esogo amisik min.

7 Loorong i nunu saga at Leeme Silok, ni Lanaraavuk. Nom labalamu lexen at Leeme Silok naba tu amisik, kuren la lixitkis orong teren nabak lox amisik. 8 Loorong naba xoxo alis ka limixin axap di munepen min, la ni naba xoxo alis axap nedi di belengatngas tin. 9 La ni naba sele utut kepe axap di ngan laxao, imsum at laxairing, dola ni na ru asuvos.

Leeme Silok naba lox asi axap di mi lebelemamao ren, la laxao naba rin asonao di. 10 La kopmen tara at livipisik li atnedi noxo sepsu at lanmet. Loorong naba sep kepe axap di.

11 Di epaase li la di sevut li leventaangas kusu dinaba lok kapmek loorong, ketla di noxo lox epovo i. 12 Ni naba xala di mi levesoso ren, la dinaba repukus la dinaba sixiro.

13 Leeme Silok, ma emi asu minu, ti mo langsangan lolos taram! Manabak pixan la mana emi asu mi leveloklok taram i lolos aleng.

<- Sam 20Sam 22 ->