1 Ata tong avukat ti Leeme Silok, atla neni i lox avukat; kopmen tekavaxap at labalamu ren. 2 Ata tong avukat ti ne Moroa mo i silok ti leven moroa axap; kopmen tekavaxap at labalamu ren. 3 Ata tong avukat ti Lanaraavuk i lolos silok polo nedi lavaeme silok axap; kopmen tekavaxap at labalamu ren.

4 Neni xusuk mun ik lok lempanga sangsangu i silok aleng; kopmen tekavaxap at labalamu ren. 5 Neni ga rudum li laxalibet mi mo lakleklen teren; kopmen tekavaxap at labalamu ren. 6 Neni ga vaxaxis li laxangka to mavana at laras; kopmen tekavaxap at labalamu ren. 7 Neni ga rudum laxangking mi lagaaling; kopmen tekavaxap at labalamu ren. 8 La mo laxangking ti lok tatao levenaleng kangking; kopmen tekavaxap at labalamu ren. 9 La lagaaling mi laxam penti rik lok tatao levenaleng kanimin; kopmen tekavaxap at labalamu ren.

10 Neni ga sev amet laxamdak temes avot at leme Isip; kopmen tekavaxap at labalamu ren. 11 Neni ga lam asu limixin me Israel basinge lenep silok Isip; kopmen tekavaxap at labalamu ren. 12 Neni ga lox i mo mi lolos silok teren atla lekngen i lolos aleng; kopmen tekavaxap at labalamu ren. 13 Neni ga lok langas to xantubu at loxontas memele; kopmen tekavaxap at labalamu ren. 14 Neni ga lam avolo limixin teren go xantubu at laras; kopmen tekavaxap at labalamu ren. 15 Ketla ni gak mit axong loorong mi luvuttadi esep me Isip; kopmen tekavaxap at labalamu ren.

16 Neni ga lam avolo limixin teren to at lamatbin; kopmen tekavaxap at labalamu ren. 17 Neni ga sev amet lavaorong mi levenasen silok atdi; kopmen tekavaxap at labalamu ren. 18 Neni ga sev amet bok mo lavaorong mi levenasen silok; kopmen tekavaxap at labalamu ren. 19 Sion loorong at leme Amor ga met at lekngen Leeme Silok; kopmen tekavaxap at labalamu ren. 20 Ok loorong me Basan ga met at lekngen Leeme Silok; kopmen tekavaxap at labalamu ren. 21 Neni ga raba limixin akmokso ren mi levennep kangka atnedi na lavaorong; kopmen tekavaxap at labalamu ren. 22 Neni ga raba levennep kangka ri limixin me Israel, nedi lavaanat saxaruki ren; kopmen tekavaxap at labalamu ren.

23 Neni goxo domampe nedik at levenaleng limixin munepen diga sak tup midik; kopmen tekavaxap at labalamu ren. 24 Neni ga lox asepmus dik basinge limixin munepen minama; kopmen tekavaxap at labalamu ren. 25 Im taba luxa lempanga axap di rooro; kopmen tekavaxap at labalamu ren.

26 Ata tong avukat amisik ti ne Moroa boro vana at laxalibet; kopmen tekavaxap at labalamu ren.

<- Sam 135Sam 137 ->