Revelesen 21

Kait muturta ayow og muturta inaq gwahtim

1 Ari nagah na abeb og muturta teq kait muturta inaq ussa ya gibiy. Kait og inaq kwaziqmo gwahtiqim usiyta na tihiqiy bug. Sa kamis a ta hi usmo. 2 Ad God ago uliq tawonta Heven-ib usim gewoqsa ya ahol waymo. Na Jerusalem muturta. Uliq na ago balaw dimun diqta, bilaqne aw mat waqnan haqad balaw dimunta aholib giqemim ahol wastitayim ago mat waqnan tonaq nazaq nog. 3 Sa God ago ban tawonta nab mat araq aqez gwahtiqim atoranmo lileysa ya kazaq hurit. In bilam, Ne gidek emiy ham. Muran God in ago on mataw nenaq tuqosdaq ham. Ossa on mataw na in God-mo ago on matawmo diq tiqiy daqay ham. Helmo ham, God inmo on mataw na nenaq tuqosdaq ham. 4 Osad in mataw gaqsa gimeqil gimeb usaqta na tisuholdaq ham. Teq mataw na a ta hi moq daqay ham. Ad in gaq a ta hi waz daqaymo ham. In a ta hi gaqad teq in gihol a ta hi titiydaq ham. Daq kwaziqmo usta nagan tihiqiy bugdaq ham.

5 Sa Mat ban tawontab osaqta na bilam, Ahol waqiy ham. Ya nagah bunmo giqeman muturta tiqiyiy ham. Haqad teq in bilam, Nan ka mar tonid usan ham. Nan ka in hel diqta teq in kazaqmo diq tugwahtiqdaqta ham. 6 Haqad in ya ibilenim bilam, Nawaqmo tihiqiy ham. Nagah bunmo gilulin na yaqmo ham. Ad nagah hiqiydaqta akaman na yaqmo wazaiqta ham. Ya nagah bunmo wolnet bugim osaiqta ham. Mat anat ziziqsa ya yuw yayibta mataw uluwim kayeqmo osayta na samanmo ugid in tuquluwdaq ham. 7 Mat aw nog in zaway meqinta bunmo giquriyam bugeq in yaqgo nagah dimdimunta na tuwaq daqay ham. Sa ya in gigo God ossa in yaqgo onmin os daqay ham. 8 Ari mataw zaway meqinta nagan rabunad hureq hasayta na teq in ya inan helmo a hi haqayta na teq in daq meqinta amo amo emayta na teq in mataw ginol emayta na teq in danatab on nenaq luwayta na teq in tagum liqiy emayta na teq in god katiyta muzayta na teq in katiyayta na mataw na bunmo in gigo uliq faq ayahta yuw akurorqan nogta gig salfa oyad usaqta nab in tuqos daqayta ham. Daq naway na anan moq gigerta haqayta ham.

Jon uliq Jerusalem muturta ahol wam

9 Ari angelo araq yaqgo hib tubol. Na in angelo 7 nagah meqinta on mataw gimeqin tonaqta na adegnaq ame gwalim ussa in waziyta na gigo araq in yaqgo hib bolta. Bolim in ya ibilan, Ni bolid ya Sipsip Amidon awe tiniqisihunnan ham. Muran Sipsip Amidon in aw na tuwaqdaqta ham. 10 Samo God ago Bugaw Dimunta ya iholib ayahmo bolanmo angelo na ya isorim iqad garah sisaqta ulilibmo gwalahta nab in ya iqad tugwalah. Gwalehim in God ago uliq tawonta Jerusalem Heven hulosim gewoqsa tiqiqisihun. 11 Sa God ahol anuwan ayahmo uliq nab oysa ya ahol way. Uliq na ya ahol waqsa in hikliyan nog iyyaqta, bilaqne gig dimunta hikliyanaqta anawun ayahmota na nog. Teq uliq na anuwan bilaqne gig jaspa anuwan nog teq in awaqan dimun diq galas hikliyan nog iyaqta. 12 Sa uliq na ago gel in sisaqta teq in ulilibmo gwalahta. Gel na ago dan ez 12 nazaq ussa teq dan ez nab angelo amulik-mulikmo nazaq turim lehiy. Teq Isrel gisesan 12 na giholnan dan ez nagab giqusim lahmo. 13 Gel asor ger zeq gwalaqta ban nab dan ez ezeqmanmo us. Teq asor ger ban dan ez ezeqmanmo usmo. Teq na agerab gel asor ger zeq wolehaqta ban nab dan ez ezeqmanmo usmo. Teq ta na agerab asor ger ban dan ez ezeqmanmo usmo. 14 Sa gel na asenab gig aseseqta 12 nazaq gel zaway ugim usiy. Gig nab Sipsip Amidon ago Aposel 12 na giholnan mar tonan giqus.

15 Sa angelo gamuk ibilenyaqta na in aytan gol-ibta araq waz, aytan na amalib in uliq na atowun waqad teq in ago dan ez teq ago gel inaqmo gitowun waqdaq haqad. 16 Uliq ayahta na ago azizinan aweweqmo araqibmo usiy. Sa ago sisaq ulil ban gwalahta na teq ago sisaq og muzim lahta na bunmo in araqib usiymo. Angelo na ago aytan amalib uliq ayahta na atowun waqan in atowun 2,200 kilomita nazaqmo iy. Teq ago azizinan teq ago sisaq gwalahta na bunmo in araqibmo 2,200 kilomita nazaqmo diq iyim usmo. 17 Sa angelo na in uliq ayahta na ago gel atowun tuwammo. An gel ago sisaq ulilib gwalahta na atowun in 65 mita nazaqmo iy. Angelo na in matawmo gigo mita in wazayta naqmo amalib nagah na gitowun wamta.

18 Uliq ayahta na ago gel in gig anan jaspa haqayta na amalib emiyta. Teq uliq na aduganib bit ban bunmo in gol-ibmo emiyta. Nazaq iyan in awaqan bilaqne galas nog hikliyanyaqta. 19 Teq uliq na ago gel asenab gig aseseqta zaway ugad usiyta na awaqan dimun diqta teq in gig dimdimunta anawun ayahmota amalib gig aseseqta na gibalaw toniyta.

Gig amebta na anan jaspa haqayta.

Sa gig gigerta rawezta na anan sapaya haqayta.

Sa gig ezeqmanta husta na anan aget haqayta.

Sa gig aweweqta kuletta na anan emerald haqayta.

20 Sa gig abaynaginta na anan sadonikis haqayta. Gig na kakaqta husta inaqmo ahulib usaqta.

Sa gig 6-ta kakaqta na anan koniliyan haqayta.

Sa gig 7-ta maliyta na anan krisolait haqayta.

Sa gig 8-ta kuletta nog na anan beril haqayta.

Sa gig 9-ta maliyta nog na anan topas haqayta.

Sa gig 10-ta na anan krisopres haqayta. Na ahulib maliyta teq kuletta usaqta.

Sa gig 11-ta dubta na anan hayasin haqayta.

Sa gig 12-ta kakaqta na anan ametis haqayta.

21 Gel na ago dan ez 12 nab bokbok aseseqta husta 12 nazaq in dan ez nog iyim giqus. Dan ez amulikmo nab bokbok amulikmo husta us. Sa uliq aduganib dan lahta na in gol-ibmo emiyta. Ad dan na anuwan diq iyad in bilaqne galas nogmo hikliyanyaqta.

22 Ari uliq nab Tempel araq tursa ya ahol a hi way. Na ezaqgo Iyahta God Zaway Bunmo Wazaqta na ayow Sipsip Amidon inaq in Tempel os nog iysa ya gibiy. 23 Sa uliq ayahta nab zeq ayow kalam inaq gigo kabiy haiq tiqiyiymo. Na ezaqgo God-mo ahol anuwan uliq ayahta na anuwan ugaqta. Sa Sipsip Amidon anuwan bilaqne lam oy nog iyad in uliq na anuwan ugaqtamo. 24 Anuwan ugsa on mataw en bunmo in uliq ayahta nab boleq anuwan nab tiluw daqayta. Sa ogib king bunmo in gigo balaw es dimdimun diqta anawun ayahmota giwaqeq giqad uliq nab a tubol daqaytamo. 25 Uliq nab tarom a hi iyaqta. Saw anuwan naqmo tutimmo usaqta. Nazaq iyan in uliq na ago dan ez 12 na a hi otayta. 26 Sa ogib on mataw en bunmo in gigo nagah dimdimunta giqussa amalib gihol abin dimunta waqayta na in giwaqeq giqad boleq uliq ayahta nab giqemid ussa mataw bunmo uliq na tuwazin daqayta. 27 Sa nagah anumlan inaqta teq mataw daq meqmeqinta amo amo emayta teq mataw nan katiyta bilaqayta nagan in le uliq ayahta na amuganib a hikidik gwahtiq daqayta. Haiqmo diq. On mataw giholnan Sipsip Amidon ago buk os kayeqmo kuluwa-kuluwmo os daqayta nab usaqta naqmo in le uliq ayahta nab tugwahtiq daqayta.

<- Revelesen 20 Revelesen 22 ->