Link to home pageLanguagesLink to all Bible versions on this site
4
Nyi duwamiy vitiyaam Satan Jisasaam wasapwun vasibariyin kwurdid.
(Mak 1:12-13; Luk 4:1-13)

1 Atawa tikuw, God dikidi Mawul Jisasaam ata kwurin karaydid duw taakw kwu maardaal tamiyaar Satan dikim wasapwun vasibariyik kwurdikik. 2 Alim nyi gaan duwamiy vitiy kwakuw, Jisas kikipaat ki maarkuw, ata kaam yisad. 3 Kaam yisalik, Satan ata yaad dikik. Yakuw, Jisasak ata wadid, “Li min mwiya God dikidi Nyan-adimin wakuw, kidiy kabakik wamin, bret tikwadiy kiminkikik.” 4 Aw Jisas Satanak ata wadid, “Atawa maa. Aw God diki lapa nyig kitawa wana,

‘Duw taakw bret-adikanim akis wapwan tikwanadiy.
Aw God dikidiy ababa wakwadadiy majidanim wapwan tikidiy.’ ”
5 Satan Jisasaam ata kwurin karaykuw Jiruwsalimaar, ap God dikidi gaba maja wiyaam takadid. 6 Di Jisasak ata wadid, “Min mwiya God dikidi Nyan-adimin wakuw, atay vakirmin kiladi kupwaam. Aw God diki maaj wana,
‘God maaj kwiykidadiy dikidiy maaj kardadiy duwak minak.
Aw day minak yarakara van tidaak, min kabakim maan taab viy maa.’ ”
7 Jisas Satanak ata wadid, “Atawa maa. Aw ki maaj ab God diki lapa nyigaam rina:
‘Min kidi Yitaypika Duw God, dim wasupwu-vasibariykin kwur-tikwa.’ ”
8-9 Ata Satan Jisasaam kwurin kawardid nimadi nibwukir. Kawarkuw, kidi kupwaam ridiy ababa jaka tip simakadidiy. Dayadiy ap simakadid. Dayadiy ap Jisasak simakakuw, ata wadid, “Li min wunak vakirkuw, gaba maaj wunak sukwu-kimina, wun kidiy ababa jaka tip minak kwatiya-kituwadiy dayaam min van timinkikik.” 10 Jisas Satanak ata wadid, “Satan, min agwutak! God diki lapa nyig ata wana:
‘Yitaypika Duw Godak gaba maaj asukw!
Dikidanik yawiy akwur!’ ”
11 Jisas ki maaj wadik, Satan ata wapadid. Satan wapakuw yidik, God diki maaj kardadiy duw dakuw, Jisasak sugwiyaan kwurdaad.
Jisas Galiliy tamiyaar sibinin yikuw, alim di bas duw takwak God diki maaj wasapwiy-didiy.
(Mak 1:14-15; Luk 4:14-15)

12 Jon Baptais kwiydi duw Yiratak kipwu mwutaam yikuw wadik, Yirat dim kalabus ir kwusawula maaj Jisas ata wukidil. Wukikuw, Jisas Galiliy tamiyaar ata yad. 13 Di diki tip Nasaritaam maa kwu. Nasarit wapakuw, di Galiliy mala araam ril tip Kapanim, arir yad. Kapanim wadana tip, Sipulanawa Naptaliy, abir tamiyaam ral. 14 Jisas atawa kwurdil tayir God diki maaj wasapwiydi duw, dikidi si Aysaya, diki sukwudil maaj ata mwiya mwiyaba maaj tilikikik. 15 Ki maaj kitawa wana:

“Sipulanawa Naptaliy, abir tamiy mala Galiliy arawa Jawtan bayib, alim rinabir.
Nuwukadiy jaka tipa kidiy duw alim rinadiy.
16 A tamiyaam rinadiy duw taakw dayadiy mawul pakwun tidaak, jawjaay kwanadiy.
Atawa kwadaak, dayak God diki nima lait ata kariyaan tina.”
17 Jisas a tamiyaam kwakuw, ki maaj ata wadil a nyi, “Gwur gwuradiy kupwaraap sapwurapa mawul awap. God diki duw takwaam van tikida nyi aka walibab tina.”
Jisas duw aliy tasakwudidiy dikidiy kaliva-kidadiy duw takakikik.
(Mak 1:16-20; Luk 5:1-11)

18 Jisas Galiliy wadana ar mala araam tiytiyaan tad. Tikuw, ata duw vitiy vidibir, Sayman ginyir wakwadanaad Pita, dikidi nyamwus Adiruwawa. Bir kamiy nagirir kwaan kwurbir araam. Aal biriki yawiyal. 19 Jisas ata wadibir, “Bir wuna kwukib may! Yabir, wun birak kalivaaw. Bir duw kwur-kinabirbir wunadiy tidakikik tayir kamiy kwurbiril pik.” 20 Jaab nak bir birikidiy nagir wapakuw, Jisas diki kwukib yibir. 21 Jisas kwasa yikuw, ata vidibir Sipatiy dikibir nyidiy Jamisawa Jon. Bir birikidi asaay Sipatiyawa jabiraam kwaan dayadiy nagir tap tipadadiy. 22 Jisas birakik wataydik, jaab ni birkidi asaywa jabir wapakuw, Jisas diki kwukib yibir.

Jisas duw takwak kalivaan adiy giviyibak kwadiy duw taakw sipwutiy-didiy.
(Luk 6:17-19)

23 Jisas ata Galiliy miyawa tamiyaam tiytiyaan tad. Tikuw, Juw dayadiy gaba maja wiyaam duw takwak kalivaan wadidiy, “Kitawa God duw takwak van tinaad.” Di adiy niki giviyib niki giviyibak kwadiy duw takwaam sipwutiydidiy. 24 Siriya jaka tipa kidiy duw taakw diki kwurdil yawiy maaj wukikuw, dayadiy giviyibak kwadiy duw taakw ata dikik kwurin karaydadiy sipwutiydikik. Nuwukadiy wudib mawulaar yidadiy, nuwukadiy as yidiy, nuwukadiy ap bwan kiyadiy, abab Jisas sipwutiydidiy. 25 Galiliy tamiya kidiy, Tip Tabatiy tipa kidiy, Jiruwsalim tipa kidiy, ababa Juwtiya tamiya kidiy, Jawtan bayib agika maka gikim ridiy duw taakw, day abab Jisas diki kwukib yidiy.

<- MATIYUW 3MATIYUW 5 ->