LUK 19

Sakiyas di diki mawul warapiydil.

1 Jisas Jarikaw tipaar wulakuw, di yabirib yirib yad. 2 Saan samasam tidi duw nak, dikidi si Sakiyas, alim kwaad. Di adiy takis saan kwurdiy duw dayadi yitaypika duw tad. 3 Di ata Jisasaam vikir kwurdil, di maa rav. Samasama duw taakw alim vagaluwdiy. Aw di pakapav tidi duw tikuw, Jisasaam maa vi. 4 Alik tikuw, di tayir gipiyid. Yikuw, mala Jisas yidil yabim tidi miyaar warid Jisasaam vikir. 5 Jisas walibab tikuw, kituw Sakiyasaam vikuw, wadid, “Min yabiyib adiyid. Wun nibwul mina wiyaam kwakinadiwun.” 6 Sakiyas yapwur yapwur dakuw, di rakarak tikuw, Jisasak wayapiy sidid diki wiyaar yidikikik. 7 Ababa duw taakw a jaav vikuw, day yaal girakuw, day dayak wadiy, “Kidi duw a daanada vaal yikwanadi duw wiyaam kwanaad!” 8 Aw Sakiyas dayadiy mwutamaam tikuw, Yitaypika Duw Jisasak ata wadid, “Yitaypika Duw, min awuk! Wunadiy ababa jaav kajakuw, tabik saal yinadiy duw takwak kwiykituwadiy! Aw li wun nuwukadiy duw taakw suwaal kwurtuwa dayadiy sanawa niki jaav niki jaav kwurik yaakiya, wun dayadiy sanawa jaav jaab aliy sibinin kwiy-kituwadiy.” 9 Jisas adiy duw takwak wadidiy adi duwak, “Nibwul God nyigil-dadiy kidi Aparam dikidi gwalugwa duwawa dikidiy wiya kidiy duw taakw. 10 “Wun, duw taakw dayadi Mwaam, kidi kupwaar datuwil kawaam kwanadiy duw taakw sitakirakuw, dayaam nyigilkuw, God dikidi gwalugwur kapirak.”

Yitaypika duw saan dikidiy yawiy duwak kwiykuw, day niki yawiy niki yawiy kwurdiy adiy sanaar.

(Mat 25:14-30)

11 Jisas Jiruwsalimaar warik. Alik tikuw, duw taakw wukidiy God dayaam van tikidadi nyi ada walibab tad. Alik tikuw, day Jisas wadil maaj wukitaay tidaak, di ki waya maaj kitika maaj dayak ata wadil. 12 Aw di dayak wadidiy, “Sapakwa duw nak sikaam tidi jaka tipaar yad day dim yitaypika duw tasakwudaak, diki tipaar sibinin yadikikik. 13 “Taay di yikir tikuw, dikidiy tabatiy yawiy duwak wadik, yadaak, di ata K20 dayak nakanak nakanak kwiydidiy. Kwiykuw, di ata wadidiy, ‘Gwur kidiy sanaar yawiy kwurkuw, nuwukadiy saan akwur.’ 14 “Adi duw diki tipa kidiy duw taakw day maa wadiy dikik. Alik tikuw, day duw wayakidadiy dikidi yididi jaka tipaar wadakikik, ‘Nyan kwasik yinadiyan kidi duw nyanadi van tikinadi duw titak nyanak.’ 15 “Aw adi sapakwa duw yitaypika duw tikuw, sibinin yakuw, adiy saan kwiydidiy yawiy duwak gaam sididiy day yadakikik dikik. Aw di lakwuk adiy kwiydidiy sanaar kwurdadiy yawiyik. 16 “Taay yawiy duw yakuw, wadid, ‘Yitaypika duw, min wunak K20 kwiy-minidiy. Aw wunadiy sanaar yawiy kwurkuw, nuwukadiy saan kwurtuwdiy. Alik min kidiy K200 kidiyay rinadiy.’ 17 “Dikidi yitaypika duw wukikuw, dikik ata wadid, ‘Min viyakita yawiy kwurnadimin. Min kwasa javik yarakara van tidimin. Alik wun tasakwu-tuwadimin tip tabatiyak van timinkikik.’ 18 “Nikidi yawiy duw yakuw, wadid, ‘Yitaypika duw, min wunak K20 kwiy-minidiy. Aw wun adiy sanaar yawiy kwurkuw, nuwukadiy saan kwurtuwdiy. Alik min kidiy K100 kidiyay rinadiy.’ 19 “Dikidi yitaypika duw ata wadid, ‘Wun tasakwu-tuwadimin tip tababak van timinkikik.’ 20-21 “Aw nikidi yawiy duw yakuw, wadid, ‘Yitaypika duw, min minadiy K20 kidiyay rinadiy. Wun adiy saan wapwiyim yipakwu-tuwik, ridiy. Wun bwutaay lakwutuwa min wasap wasap tikwanadi duw-adimin. Min nuwukadiy duw taakw dayadiy jaav kip kwur-kwanadimin. Aw nuwukadiy duw taakw kadiy mayim sidaak, min dayadiy mwiy kwur-kwaminadiy. Alik wun yagadiwun minak.’ 22-23 “Adi yitaypika duw dikik ata wadid, ‘Min kupwarapa yawiy duw-adimin! Wun min minadiy waminadiy majir kotiy-kituwadimin. Min lakwumina wun wasap wasap tikwanadi duw-adiwun titaay, nuwukadiy duw taakw dayadiy jaav kip kwur-kwatuwadiy, aw nuwukadiy duw taakw mayim sikwadanadiy taba jaav kip kwur-kwatuwadiy. Agwa javik tikuw, min atawa lakwun tikuw, wunadiy saan beng taka maarminidiy? Aw li min wunadiy saan beng takak-mina, aw kita nuwukadiy saan ab kwurik-tuwadiy.’ 24 “Walibab tidiy duwak ata wadidiy, ‘Kidi duw kariyadadiy K20 kwurkuw, adi K200 kariyanadi yawiy duwak akwiy.’ 25 “Aw day dikik ata wadaad, ‘Yitaypika duw, kidi duw di K200 bwutaay kwurdadiy!’ 26-27 “ ‘Adiy duw taakw day samasama jaav rikuw, adiy javir viyakita yawiy kwurkuw, ginyir nuwukadiy kwurkidanadiy. Mwiya samasam kwurkidanadiy. Aw adiy saal yinadiy duw taakw, day viyakita yawiy kwar maarkuw dayadiy kwasadiy javir, ginyir dayadiy kwasadiy jaav miyawa kwurkituwadiy. Aw adiy duw day kwasik yinadiy wun dayaam van tituwkikik, wunak akaray. Kariyakuw, wuna mwutamaam viyasipagwur, kiyakidiy.’ ”

Jisas Jiruwsalimaar wulakuw, samasama duw taakw wayapiy sidaad.

(Mat 21:1-11; Mak 11:1-11; Jon 12:12-19)

28 Jisas ki maaj waan napakuw, di ata yad dikidiy kalivadidiy duw daya tayir Jiruwsalimaar. 29 Di Bitpasawa Bitaniy abir Aliv wadana nibwukawa ribir tip walibab yikuw, di dikibir kalivadibir duw vitiy wayakidibir. 30 Di birakik ata wadibir, “Alaay tipaar maay! Yikuw, tipaar wulakuw, donki alim sitakira-kibiraad. Yaav tuwtakada miyaam tinaad. Badiy donki-ad. Dim duw maa ri nibway. Raliykuw, kiril kwurin akaray. 31 “Aw li duw taakw birak bas sikidiy, ‘Agwa javik adi donki raliy-biraad?’ wakuw, bir dayak aw, ‘Nyanadi Yitaypika Duw di yawiy kwurik dim.’ ” 32 Wayakidibir duw yikuw, adi donki vibirid Jisas wadil pik. 33 Adi donki dikidi yaav raliytaay tibirik, donki asaay duw atawa vikuw, wadabir, “Agwa javik wadi donki raliy-biraad?” 34 Aw bir ata wabiridiy, “Nyanadiy Yitaypika Duw yawiy kwurik dim wadalik.” 35 Adiy donki asaay duw yaakiya wadaak, bir adi donki Jisasak karaykuw, birikidiy wapwiy donki bwunim takakuw, Jisas apiy wapwiyim takabirid. 36 Di apiy donki saay yidik, duw taakw day dayadiy wapwiy yabim takadadiy gilabadiy kaytik di dayadiy apiyir yidikikik. 37 Jisas di Jiruwsalimawa walibab tikuw, Aliv nibwukir yaab dadidi tamiyaam, dikidiy samasama kalivadidiy duw taakw ata rakarak tikuw, day nimadib wayapiy sidiy Godak vidadiy nimadiy yawiyik. 38 Day wadiy,

“God sukwasukw kwurkwaad kidi dikidi saam yanadi Yitaypika Duwak!

Adawur tipaam kwakwanadi God diki nyanak wariyak wardil mawul aka bwu kwusina.

Alik tikuw, nyan dikik nimadib wayapiy sinaak!”

39 Nuwukadiy Parasiy a jaav vikuw, day Jisasak ata wadaad, “Kaliva-kwanadi duw, min minadiy kaliva-minadiy duw takwak wamin, kawrakwu-kwadiy!” 40 Jisas dayak ata wadidiy, “Wun gwurak watuwadiygwurik, aw li day kawrakwu-kidana, yaakiya, kidiy kabaak adiy gaam sikidiy ki javik.”

Jisas diki mawul samasam wukikuw Jiruwsalimaam kwadiy duw takwak, di ata giraad.

41-42 Jisas Jiruwsalimaar walibab yitaay, tip vikuw, a tipa kidiy duw takwak samasam wukikuw, ata giraad. Di ata waad, “Aw li gwur kitaan ab lakwuk-gwura mawul nak Godawa kwakwak! Aw adiy gwuraam pakwun tinadiy jaav gwur maa rav lakwu-lakwuk. 43-44 “Gwur maa laakw God gwurak yadi nyi gwuraam sugwiyaan kwurik. Alik tikuw, ginyir nyi yakinadiy gwuradiy mama nib gwurak yakuw, day kabir-kidanadiygwurik. Gwuraam kabirkuw, nimadi yanawa kupwa yaripaar gwuradi tip miyawa takatipi-kidanaad. Atawa kwurkuw, ginyir tip wulakuw, day miyawa tip, nyanugw, taakw, duw, miyawa sipakwutaka-kidanadiy. Sipakwutakakuw, miyawa yaripawa wiyaam tinadiy kabaak kapakap kapakap tikidiy.”

Jisas adiy God dikidi wiya tamiyaam yapiydiy duw takwak watipisakwu-didiy.

(Mat 21:12-17; Mak 11:15-19; Jon 2:13-22)

45 Jisas Jiruwsalimaar wuladik, God dikidi wiya tamiyaar ata wulaad. Adiy ababa yapiydiy duw takwak Jisas watipasakwu-didiy. 46 Di dayak ata wadidiy, “God diki lapa nyigaam kitawa wanaad, ‘Ababa tipa kidiy duw taakw varakwadiy wunadi wiyaar wunak maaj bwuladakik.’ Aw gwur gwura mwugiy-gwuril luwkuw kwurdiy duw daya tamiy tilikikik!” 47 Ababa nyi God dikidi wiyaam Jisas duw takwak kalivadidiy. Aw adiy sapakwa nyanugw pris awa God diki lo kalivadiy duwawa duw taakw dayadiy sapakwa nyanugw day Jisasaam viyasipak. 48 Ababa duw taakw day diki maaj wukik. Alik tikuw, adiy sapakwa nyanugw day Jisasaam viyasipak maa rav.

<- LUK 18 LUK 20 ->