Nongo yayi salamaka ntangu bazuzi vwandaka twadisa yinsi ya Isayeli, kasi ya kele mpasi na kuzaba na wapi mvula ba sonikaka yawu. Lute, kele ndumba yina ba ke na kuzonzila mingi na kati ya dibuku yayi. Yandi vwandaka ndumba ya yinsi yina ba ke bokilaka Mowabe.
Yandi kwelaka muntu ya Isayeli mpe na ntangu yina bakala ya yandi kufwaka, yandi lakisaka bumbote mpe kukwikama ya yandi na sika ya bokilo ya yandi ya kento. Mpe na manima, yandi kwelaka muntu ya dikanda ya bakala ya yandi yina kufwaka mpe yandi butilaka bakala yango mwana ya bakala yina kumaka nkooko ya Davidi, mfumu ya nene ya bantu ya Isayeli. Nkadulu ya Lute, ke na kulakisa beto kukwikama ya kento ya yinsi ya nzenza na sika ya Nzambi ya Isayeli. Samu na mwana yina yandi butaka, Lute kumaka muntu ya dikanda ya Davidi. Na yina, ba sonikaka nkumbu ya yandi na kati ya lutangu ya bankooko ya Yesu[a]. Mosi na kati ya mambu ya mfunu ya dibuku yayi, ni kulakisa beto, wapi mutindu nkento ya yinsi ya nzenza kumaka muntu ya dikanda ya Nzambi ya Isayeli.
Dibuku yayi kele ya kukabuka mutindu yayi:
- Nkwizulu ya Elimeleke na dikanda ya yandi na yinsi ya Mowabe. Lufwa ya Elimeleke, ya bana ya yandi zole ya babakala mpe mvutukulu ya Nawomi mpe Lute na Betelemi (Lut 1).
- Lute me bwabana na Bowaze (Lut 2–3).
- Makwela ya Bowaze na Lute (Lut 4).
1
Bampasi ya dikanda ya Elimeleke
1 Ntangu bikuudi vwandaka twadisa yinsi ya Isayeli, nsatu ya nene kumaka na yinsi yina. Na yina, bakala mosi, ya mbanza Betelemi na kizunga ya Yuda, kwendaka kintwadi na kento ya yandi mpe bana zole ya bawu ya babakala na yinsi yina ba ke bokilaka Mowabe, samu na kuzinga kuna mwa bilumbu. 2 Nkumbu ya bakala yina vwandaka Elimeleke. Nkumbu ya kento ya yandi vwandaka Nawomi mpe bana zole ya bawu: Malone mpe Kilyone. Bawu vwandaka bantu ya dikanda ya Efalata, yina vwandaka zinga na mbanza ya Betelemi, na kizunga ya Yuda. Bawu kumaka na yinsi ya Mowabe mpe bawu zingaka kuna. 3 Na manima, Elimeleke, bakala ya Nawomi, kufwaka. Na yina, Nawomi bikanaka yandi mosi na bana ya yandi zole ya babakala. 4 Bana yango kwelaka ba kento ya yinsi ya Mowabe. Bankumbu ya bawu vwandaka, Olopa mpe Lute. Na manima ya bamvula kumi, 5 Malone na Kilyone kufwaka. Nawomi bikanaka kaka yandi mosi, ata mwana ata bakala.
Mvutukulu ya Nawomi na mbanza Betelemi
6 Kuna na yinsi ya Mowabe, Nawomi kuwaka ti Yave lakisaka bumbote ya yandi na bantu ya Isayeli mpe bilanga butaka mbote. Na yina, yandi kubamaka na kubika yinsi ya Mowabe kintwadi na babokilo ya yandi zole[b]. 7 Bawu bakaka nzila samu na kuvutuka na kizunga ya Yuda, kasi na nzila, 8 Nawomi tubaka na bawu: «Ntangu yayi, konso muntu na kati ya beno vutuka na sika ya dikanda ya mama ya yandi. Bika ti Yave lakisa beno bumbote ya yandi mutindu beno lakisaka yawu na bana ya munu yina manisaka na kufwa mpe na munu mosi. 9 Yave sala ti konso muntu na beno kuzwa dikwela ya mbote.» Na manima ya kutuba mutindu yina, Nawomi bumbasanaka na babokilo ya yandi samu na kukabuka na bawu. Na yina, babokilo yango dilaka mingi, 10 mpe bawu tubaka: «Ve, beto ke kwenda na nge na sika ya dikanda ya nge.» 11 Kasi Nawomi vutulaka: «Aa bana ya munu! Beno vutuka, samu na yinki beno zola kukwenda na munu? Mu lenda dyaka ve kubuta bana yina ke kwela beno. 12 Bana ya munu, beno vutuka ya beno. Mu me kuma kiboba, mu lenda kukwela dyaka ve. Ata mu tuba ti mu ke ntete na kivuvu mpe na mpimpa yayi mu ke vukisa mfulu na bakala yina ke pesa munu bana, 13 beno ke vingila tii bawu ke kula? Beno ke manga na kukwela babakala ya nkaka? Ve, bana ya munu! Mu ke na kati ya kyadi ya kulutila samu na beno. Ni na munu Yave me talisa mpasi yayi.»
14 Babokilo nyonso zole bandaka dyaka na kudila mingi. Na manima, Olopa bumbasanaka na Nawomi samu na kubika yandi, kasi Lute mangaka na kukabuka na bokilo ya yandi. 15 Nawomi tubaka na Lute: «Tala mbanda ya nge me vutuka na sika ya banzambi ya yandi mpe na sika ya dikanda ya yandi. Nge mpe, sala mutindu yandi, vutuka na sika ya dikanda ya nge.» 16 Kasi Lute vutulaka: «Kutatamana ve na kutumisa munu na kubika nge mpe mu vutuka na sika ya dikanda ya munu. Kisika yina nge ke kwenda, ni kuna munu mpe ke kwenda. Kisika yina nge ke vwanda, ni kuna mpe mu ke vwanda. Dikanda ya nge ke vwanda dikanda ya munu, mpe Nzambi ya nge ke vwanda Nzambi ya munu. 17 Kisika yina nge ke kufwa, ni kisika yina mpe mu ke kufwa, mpe ni kuna ba ke zika munu. Kana kaka ni lufwa ve ke kabula nge na munu, bika ti Yave pesa munu kitumbu ya ngolo».
18 Ntangu Nawomi talaka ti Lute vwandaka bika ve na kulanda yandi, yandi bikaka na kutatamana na kuvutula yandi. 19 Bawu zole kwendaka tii na Betelemi.
Ntangu bawu kumaka na Betelemi, bantu nyonso vwandaka yituka samu na bawu. Bakento ya mbanza vwandaka tuba: «Yayi ni Nawomi ve?» 20 Kasi Nawomi tubaka: «Beno bokila dyaka munu ve na nkumbu ya Nawomi[c]. Beno bokila munu na nkumbu ya Mala[d], samu ti, Nzambi-Mpungu, me sala ti luzingu ya munu kuma ya kyadi mingi. 21 Mu katukaka awa na maboko ya kufuluka, mpe Yave me vutula munu awa maboko mpamba. Na yina, beno bokila dyaka munu ve na nkumbu ya Nawomi, samu ti, Nzambi-Mpungu, me sala munu yimbi mingi, mpe me sala ti luzingu ya munu vwanda luzingu ya mpasi.»
22 Ni mutindu yayi Nawomi bikaka yinsi ya Mowabe, kintwadi na bokilo ya yandi Lute yina vwandaka muntu ya yinsi ya Mowabe. Bawu kumaka na Betelemi na ntangu yina ba vwandaka me banda na kuyonzika bambuma ya oloze[e].
