13
Yave tii wapi ntangu nge ke zimbana munu?
1 Mukunga ya mfumu ya miyimbidi. Mukunga ya Davidi. 2 Yave, tii wapi ntangu nge ke tatamana na kuzimbana munu?
Tii wapi ntangu nge ke bumba munu kizizi ya nge?
3 Tii wapi ntangu mwela ya munu ke vwanda na manyongo
mpe ntima ya munu konso kilumbu na kyadi?
Tii wapi ntangu mbeni ya munu ke tatamana na kutediminaka munu?
4 Yave, Nzambi ya munu tala, pesa munu mvutu!
Kyenzola meso ya munu,
samu ti mu lala ve mpongi ya lufwa.
5 Ya tsyelika, mbeni ya munu lenda tuba ti:
«Beto me nunga yandi!»
Bika ti mitantu ya munu kuyangalala ve kana mu kubwa.
6 Kasi munu, mu me tula kivuvu ya munu na bumbote ya nge,
ntima ya munu kele na nsayi mingi na mpulusu ya nge.