1 Yave ke na kutuba: «Na ntangu yina, ba ke basisa mikwa ya bantinu mpe ya bamfumu ya Yuda na bandyamu ya bawu. Ba ke basisa mpe mikwa ya banganga-Nzambi, mikwa ya mimbikudi mpe mikwa ya bantu yina ke zingaka na Yelusalemi. 2 Ba ke tanda yawu na ntwala ya ntangu, ya ngonda mpe ya bambwetete, mpe binwani nyonso ya mazulu. Ni bima yina bawu vwandaka zola, bawu vwandaka sambila, bawu vwandaka landa, bawu vwandaka sosa. Ni na mantwala ya bima yina bawu vwandaka kwenda fukama. Mikwa yango, ba ke lokota dyaka yawu ve, ba ke tula dyaka yawu ve na ndyamu. Yawu ke kuma mboloso na ntoto. 3 Bayina nyonso ke bikana moyo na kati ya dikanda yayi ya yimbi, bawu ke tala ti lufwa me lutila mbote na luzingu, bisika nyonso yina mu ke mwangisa bawu. Ni Yave, Nzambi ya Binwani me tuba yawu.»
Bantu ya Yelusalemi zola ve kuvutuka na Yave
4 Nge ke zabisa bawu ti Yave ke na kutuba:
«Ntangu muntu ke kubwaka,
yandi ke telamaka dyaka ve?
Ntangu muntu ke zimbanaka nzila,
yandi ke vutukaka ve?
5 Kasi samu na yinki bantu yayi ya Yelusalemi
yina bakaka nzila ya yimbi,
ke na kutatamana na yimbi ya bawu?
Bawu me kangama na banzambi ya bawu
ya luvunu mpe bawu ke na kumanga
na kuvutuka na sika ya munu.
6 Mu me kuwa mbote mambu nyonso
yina ba ke na kuzonzaka:
ba ke na kuzonzaka na mutindu yina me fwanana ve.
Ata mosi na bawu ke na kunyonga na yimbi ya yandi.
Ata mosi ke na kuyufula:
“Yayi yinki mu me sala?”
Konso muntu ke na kutatamana ya yandi na kukima
mutindu mpunda ke kimaka
na ntangu ya mvita ya nene.
7 Ata ndeke yina ba ke bokilaka singonye
ke zabaka ntangu ya nzyetolo ya yandi.
Kiduka na bandeke ya nkaka mpe ke zabaka
ntangu ya mvutukulu ya bawu.
Kasi bantu ya munu, bawu zaba ve bansalulu ya Yave.»
Bantu ya ndwenga ya luvunu
8 Wapi mutindu beno lenda kutuba ti:
«Beto kele bantu ya ndwenga,
ni beto kele na Musiku ya Yave!»
Ya tsyelika, bisoniki ya Musiku
ke bakaka bisonokono ya bawu
samu na kusonika Musiku ya kutengama.
9 Bantu ya ndwenga me kufwa nsoni.
Bawu zaba dyaka ve yinki ya kusala.
Bawu me kangama na mutambu.
Mutindu bawu me losa mambu ya Yave,
wapi ndwenga yina bawu kele na yawu?
Bantu nyonso ke na kusadila luvunu
10 «Ni yawu yina, mu ke pesa bankento ya bawu na bantu ya nkaka.
Mu ke pesa mpe bilanga ya bawu
na bantu yina ke botola bawu yawu.
Samu ti kubanda na bakuluntu
tii na bana ya fyoti,
bawu nyonso ke na kusosa
kaka ndandu ya bawu mosi.
Kubanda na mimbikudi tii na banganga-Nzambi,
bawu nyonso ke na kusadila luvunu.
11 Bawu ke na kutala mpasi ya bantu
ya munu mutindu kima ya mpamba
mpe bawu ke na kutuba:
“nyonso kele mbote, nyonso kele mbote”,
kasi, na kutala mbote, nyonso kele ve mbote!
12 Bawu me kufwa nsoni
samu na mambu ya nganzi yina bawu me sala.
Kasi ya tsyelika nsoni ke simbaka bawu ve.
Bawu zaba dyaka ve kutala nsoni na bantima ya bawu.
Ni yawu yina Yave ke na kutuba ti
bawu ke kubwa kintwadi na bayina ke kubwa.
Bawu nyonso ke lala na ntoto
ntangu mu ke kwiza semba bawu!»
Kivuvu ke dyaka ve
Yave
13 Yave ke na kutuba:
«Ya tsyelika mu ke sukisa bawu.
Bambuma ya vinu ke vwanda dyaka ve na bayinti ya vinu.
Bafike ke vwanda dyaka ve na bayinti ya bafike.
Makasa ya bayinti ke yuma.
Mu ke pesa nyonso na bayina ke lutila kuna.»
Bantu
14 «Samu na yinki beto me vwandaka swii?
Beto yonzameno,
beto kwendeno ya beto na bambanza yina ke na bibaka ya lukengolo.
Beto kwenda kufwa kuna!
Yave, Nzambi ya beto ke na kumanisa na kufwa beto.
Yandi ke na kunwikisa beto maza ya yimbi
samu ti, beto me sala masumu na ntadisi ya yandi.
15 Beto vwandaka na kivuvu ti,
beto ke kuma na mavimpi ya mbote,
kasi ata dyambu ya mbote ke na kusalama.
Beto vwandaka vingila ntangu yina beto ke beluka,
kasi ni boma ke na kulutila.
16 Beto ke na kuwa makelele ya bampunda,
yawu ke na kuwakana katuka kuna na Dane[a].
Na kuwaka ndinga ya bampunda yango,
ntoto nyonso ke na kutekita.
Bambeni ke na kukwiza.
Bawu ke na kubebisa yinsi
mpe nyonso yina kele na yawu.
Bawu ke na kubebisa mbanza
mpe bantu nyonso yina ke zingaka kuna.»
Yave
17 «Ya tsyelika mu ke na kufidisa beno banyoka,
bampidi yina ba lenda kudingimisa ve,
bawu ke tatika beno.»
Ni Yave me tuba yawu.
Mpasi ya Yelemya
Yelemya
18 Ntima ya munu ke na kukwama,
kisi ya kubelusa munu kele ve,
mu ke na kutala mpasi mingi na ntima.
19 Mu ke na kuwa ndinga ya bantu ya munu yina ke na kuyawula
kuna na yinsi yina kele ntama:
«Yave ke dyaka ve na Siyone?
Siyone kele dyaka ve na ntinu ya yandi?»
Yave
«Samu na yinki bawu me sombola munu
na kusambilaka biteki ya bawu,
bima ya nzenza yina kele ve Nzambi?»
Yelemya
20 Ntangu ya kuyonzika bambuma me luta,
ndolo mpe me kuma na nsuka,
kasi beto me vuuka ve.
21 Mpasi ya bantu ya munu
ke na kumanisa munu ngolo.
Mu ke na kati ya bufwidi.
Mu ke na kati ya kyadi ya kulutila.
22 Na Ngalaade bakisi ke dyaka ve?
Banganga-kisi ke dyaka kuna ve?
Samu na yinki mputa ya bantu ya munu
ke na kumanisa ve?
23 Aa, kana yintu ya munu vwandaka mukelo ya maza,
kana meso ya munu vwandaka yinto ya mansangasa,
mu zolaka dila konso mpimpa na ntangu
bayina me kufwa na kati ya bantu ya munu!
<- Yelemya 7Yelemya 9 ->
- a Dane kele na node. Ya zola kutuba ti mbeni ke kwizila na node.