15
Kitumbu ya bantu ya Mowabe
(15–16; Yel 48)
1 Kitumbu ya Mowabe.
Ee, na mpimpa mosi, mbanza ya Ale-Mowabe me mwangana!
Ale-Mowabe me kuma kaka swii,
na mpimpa mosi, yawu me mwangana!
Kile-Mowabe me kuma kaka swii[a].
2 Bawu ke na kukwenda na Yinzo ya nene ya Nzambi,
bantu ya Dibone ke na kuyuluka na bisika ya lusambulu yina kele na zulu ya myongo samu na kudila[b].
Bantu ya Mowabe ke na kuyawula kuna na mongo ya Nebo mpe na Medeba,
bayintu nyonso, ba me zenga yawu bansuki,
mandefo nyonso, ba me katula yawu.
3 Na babala-bala ya bambanza ya Mowabe, bantu me lwata bilele ya bufwidi,
na zulu ya miludi ya kuyalumuka mpe na bisika yina ba ke yonzamaka,
muntu-muntu ke na kulooka mpe ke na kudila mingi.
4 Bantu ya Esebone mpe ya Eleyale ke na kuyawula,
yawu ke na kuwakana tii na Yayase,
ni yawu yina binwani ya Mowabe ke na kulooka,
Mowabe ke na kutekita.
5 Ntima ya munu ke na kulooka samu na Mowabe:
Bawu ke na kukima tii na Soyale,
tii na Engelate-Selisila.
Bawu ke na kuyulukaka mongo ya Luyite na kudila nyonso,
na nzila yina ke kwendaka na Yolonayime,
bawu ke na kwendaka wakisa bandinga ya bawu ya mpasi,
6 samu ti maza ya Nimelime me sika,
matiti me yuma, yawu me beba,
matiti ya maza ke dyaka ve.
7 Ni yawu yina, ba ke na kulokota yina me bikana na bawu,
mpe bawu ke na kunata yawu na lweka ya nkaka ya muzumba, kisika ke menaka bayinti.
8 Samu ti ntoto nyonso ya ba-Mowabe me fuluka na bidilu,
kulooka yina bawu ke na kulooka ke na kukuma tii na Engelayime,
kuyawula ya bawu ke na kukwenda tii na Dibulu ya Maza ya Elime.
9 Maza yina ke lutilaka na mbanza ya Dimone me kuma menga na menga.
«Mu ke fidisa bampasi ya malu-malu na bwala Dimone,
nkosi mosi ke kwiza nwanisa bayina me bikana moyo na Mowabe,