Dibuku ya

KUBASIKA
NKOTOLO
Dibuku yayi, ni Moyize sonikaka yawu mpe nkumbu ya dibuku yango kele «KUBASIKA», samu ti ni dibuku yayi ke na kuzonzila wapi mutindu Yave kuulaka bana ya Isayeli na kubasisa bawu na bundongo ya Ngipiti. Dibuku yayi lenda kukabuka na bandambu tatu.
1 Na ndambu ya ntete (Kbk 1–3), bana ya Yakobi vwandaka zinga na yinsi ya Ngipiti mpe bawu vwandaka tala mpasi ya bundongo ya kulutila, kasi Yave soolaka Moyize samu na kubasisa bawu na Ngipiti, yinsi ya bundongo.
2 Na ndambu ya zole (Kbk 14–18), bantu ya Isayeli ke na kubasika na Ngipiti samu na kukwenda na yinsi ya kuyuma yina ba ke bokilaka Sinayi, kisika kele mongo ya Nzambi. Ntinu ya yinsi ya Ngipiti landaka bawu kintwadi na binwani ya yandi samu na kufwa bana ya Isayeli. Kasi Nzambi salaka bimangu samu na kuvuukisa bantu ya yandi. Na yina, bana ya Isayeli landaka nzyetolo ya bawu mpe Nzambi pesaka bawu madya mpe maza ya kunwa.
Na ndambu ya tatu (Kbk 19–40), bana ya Isayeli vwandaka na yisi ya mongo ya Sinayi. Kuna, Nzambi salaka ngwisani na bantu ya yandi. Na yina, yandi bokilaka Moyize na zulu ya mongo mpe yandi pesaka Moyize matadi ya Musiku. Nzambi zabisaka mpe na Moyize mutindu ya kusadila Musiku yango mpe na manima, Nzambi pesaka dyaka na Moyize bantumunu ya kutunga Yinzo ya Mbwabanu, kisika yandi ke banda na kubwabanaka yandi.

Dibuku yayi lenda kukabuka mutindu yayi:
- Bana ya Isayeli na kati ya bundongo (Kbk 1).
- Mbutukulu ya Moyize (Kbk 2).
- Moyize mpe Aloni na sika ya Falawo (Kbk 3–6).
- Nzambi fidisaka biyoolo kumi (Kbk 7–11).
- Mukembo ya Paki ya ntete (Kbk 12–13).
- Mubu ya batwandu mpe mongo ya Sinayi (Kbk 14–18).
- Nzambi pesaka Misiku kumi (Kbk 19–24).
- Nzambi pesaka bantumunu samu na Yinzo ya Mbwabanu (Kbk 25–27).
- Kisalu ya banganga-Nzambi mpe Saba (Kbk 28–31).
- Kiteki ya mwana ngombe (Kbk 32).
- Nzambi vutukilaka dyaka ngwisani na bantu ya yandi (Kbk 33–34).
- Bandukulu ya ntungulu ya Yinzo ya Mbwabanu (Kbk 35–39).
- Mbyekolo ya Yinzo ya Mbwabanu (Kbk 40).

BUNDONGO MPE KUBASIKA YA ISAYELI NA NGIPITI

1–15

Bundongo ya bana ya Isayeli na Ngipiti

1 Yayi ni bankumbu ya bana ya Isayeli[a] bayina kwizaka na Ngipiti kintwadi na Yakobi. Konso muntu kwizaka na dikanda ya yandi: 2 Lubene, Simewone, Levi, Yuda, 3 Isakale, Zabulone, Bezame, 4 Dane, Nefetali, Ngade, Asele. 5 Bayina butukaka na Yakobi vwandaka makumi nsambwadi. Na ntangu yina, Yosefi tekilaka na Ngipiti. 6 Yosefi na bampangi ya yandi nyonso mpe bantu nyonso ya mbandu yina manisaka na kufwa. 7 Na manima, bana ya Isayeli butanaka, bawu kumaka mingi, bawu butanaka mingi-mingi, mpe bawu vwandaka lutila na kukuma ngolo. Bawu manisaka na kufuluka na yinsi yina[b].

8 Na manima, ntinu ya nkaka yina zabaka ve Yosefi bandaka na kuyala na Ngipiti. 9 Yandi tubaka na bantu ya yandi: «Beno tala, bana ya Isayeli me lutila na kukuma mingi mpe bawu me kuma na ngolo, kulutila beto. 10 Beto sadila bawu mayela, samu ti bawu tatamana ve na kukuma mingi. Samu ti, kana mvita kumina beto, bawu lenda vukana na bambeni ya beto, samu na kunwanisa beto, mpe na manima, bawu ke katuka ya bawu na yinsi yayi.» 11 Na yina, ba tudilaka bawu bamfumu ya bisalu ya ngolo, samu na kutalisa bawu mpasi, na kukwika bawu bisalu ya mpasi. Ni mutindu yina ba vwandaka tungila Falawo[c] bambanza Pitome na Lamesese, samu na kubumbilaka madya. 12 Kasi ata ti ba vwandaka lutisa na kutalisa bana ya Isayeli mpasi, bana ya Isayeli vwandaka lutila dyaka na kubutana mpe na kukuma mingi. Bantu ya Ngipiti kumaka na boma ya bana ya Isayeli. 13 Na yina, bantu ya Ngipiti kotisaka bana ya Isayeli na bundongo ya ngolo. 14 Bawu salaka ti luzingu ya bana ya Isayeli kuvwanda luzingu mosi ya ndudi, samu na bisalu ya ngolo yina ba vwandaka kwika bawu: kulamba kibuma, kuyidika bibiliki, kusala bisalu nyonso ya bilanga. Ni bisalu nyonso yayi ya ngolo ba vwandaka kwika bawu na kusala.

Lutumu ya Falawo ya kufwa bana ya babakala

15 Ya vwandaka na bakento zole ya ba-Ebeleyo yina ke butisaka. Bankumbu ya bawu vwandaka Sifela mpe ya nkaka Puwa. Ntinu ya Ngipiti zonzaka na bawu. 16 Yandi tubaka: «Ntangu beno ke butisa bakento ya ba-Ebeleyo, beno tala mwana kana yandi kele kento to bakala. Kana yandi kele mwana ya bakala, beno fwana kufwa yandi. Kana yandi kele mwana ya kento, beno bika yandi moyo.» 17 Kasi bibutisi yango vwandaka na boma ya Nzambi, mpe bawu salaka ve mutindu ntinu ya Ngipiti tubaka na bawu. Bawu vwandaka bika bana ya babakala kuzinga. 18 Na yina, ntinu ya Ngipiti bokilaka bibutisi yina, mpe yandi tubaka na bawu: «Samu na yinki beno ke na kusala mutindu yina? Samu na yinki beno ke na kubika bana ya babakala kuzinga?» 19 Bibutisi vutulaka na Falawo, ntinu ya Ngipiti: «Bakento ya ba-Ebeleyo kele ata fyoti ve mutindu bakento ya bantu ya Ngipiti. Mutindu bawu ke na ngolo mingi, bawu ke butaka tekila kibutisi kwiza kuma.»

20 Bantu ya Isayeli vwandaka lutila na kukuma mingi mpe na ngolo ya kulutila. Nzambi salaka mambu ya mbote na bibutisi yina. 21 Mutindu bibutisi yina vwandaka na boma ya Nzambi, Nzambi pesaka bawu bana mingi. 22 Na yina, Falawo, ntinu ya Ngipiti, pesaka ntumunu na bantu ya yandi nyonso mutindu yayi: «Bana nyonso ya ba-Ebeleyo yina ke butuka ya babakala, beno losa bawu na nzadi ya Nile. Kasi beno bika bana nyonso ya bakento kuzinga.»

Kubasika 2 ->