Dibuku ya zole ya

SAMWELE
NKOTOLO
Na mbandukulu, dibuku ya 2 Samwele vwandaka kaka dibuku mosi na dibuku ya 1 Samwele. Yawu vwandaka ya kuzabakana na nkumbu ya mumbikudi Samwele. Dibuku ya 2 Samwele ke na kuzonzila kintinu ya Davidi, ntinu ya zole mpe ya nene na Isayeli nyonso.
Davidi vwandaka muntu ya kukwikama na Nzambi, kasi yandi vwandaka kubwa mpe na masumu. Ata ti yandi vwandaka kubwa na masumu, yandi vwandaka ndima masembo ya Nzambi.

Dibuku yayi kele ya kukabuka mutindu yayi:
- Davidi kuwaka nsangu ya lufwa ya Sawule (2Sa 1.1-27).
- Davidi kumaka ntinu ya Yuda. (2Sa 2.1–4.12)
- Davidi kumaka ntinu ya Isayeli nyonso (2Sa 5.1–9.13).
- Disumu ya Davidi (2Sa 10.1–12.31).
- Amenone na Tamale (2Sa 13.1-39).
- Abesalome balukilaka tata ya yandi Davidi (2Sa 14.1–18.32).
- Ba-Ngabawone na ba-Filiseti (2Sa 21.1-22).
- Kimbangi ya Davidi (2Sa 22.1–23.7).
- Binwani ya ngolo ya Davidi (2Sa 23.8-39).
- Davidi salaka lutangusu (2Sa 24.1-25).

Davidi kuwaka nsangu ya lufwa ya Sawule

1 10 Na manima ya lufwa ya ntinu Sawule[a], Davidi kwizaka na Sikelange[b] na manima ya kununga ba-Amaleke[c]. Yandi vwandaka kuna bilumbu zole. 2 Na manima ya bilumbu zole, bakala mosi katukaka na kivwandu ya binwani ya Sawule. Yandi vwandaka na binkuti ya kupasuka mpe yintu ya yandi vwandaka ya kufuluka na ntoto. Ntangu yina yandi kumaka na sika ya Davidi, yandi kubwaka kizizi na ntoto, yandi fukamaka.

3 Davidi yufulaka yandi: «Wapi kisika nge me katuka?» Yandi vutulaka: «Mu me kima kivwandu ya binwani ya Isayeli.» 4 Davidi tubaka: «Zabisa munu yinki me salama kuna». Bakala yina tubaka: «Binwani ya Isayeli me kima mvita. Binwani mingi na kati ya bawu me kufwa. Sawule mpe na mwana ya yandi Yonatane me kufwa.» 5 Davidi yufulaka dyaka ntwenya yina natinaka yandi bansangu: «Wapi mutindu nge me zaba ti Sawule na mwana ya yandi Yonatane me kufwa?» 6 Ntwenya yina zabisaka yandi: «Mu vwandaka na zulu ya mongo ya Ngilebowa mpe mu me tala Sawule ya kuyekama na dyonga ya yandi. Binati bipusu-pusu ya mvita vwandaka fyetikisa yandi na balweka nyonso. 7 Yandi me baluka mpe yandi me tala munu. Yandi me bokila munu mpe mu me ndima: “Mfumu, munu yandi yayi.”» 8 Yandi me yufula munu: «Nge ke nani?» Mu me vutula: «Mu kele mu-Amaleke.» 9 Yandi me tuba na munu: «Mulemvo ya nge, belama na sika ya munu mpe kufwa munu, samu ti mu ke ntete moyo, kasi mu ke na kulenda dyaka ve. 10 Na yina, mu me belama na yandi mpe mu me kufwa yandi. Samu ti mu vwandaka me zaba ti na manima ya kubwa, yandi ke vuuka dyaka ve. Mfumu ya munu, mu me baka yimpu ya kintinu yina vwandaka na yintu ya yandi mpe mulunga yina vwandaka na diboko ya yandi. Mu me natina nge yawu.»

11 Na yina, Davidi pasulaka binkuti ya yandi mpe bayina nyonso vwandaka na yandi salaka mutindu mosi. 12 Bawu dilaka mpe Bawu minaka nsoki tii na nkokila. Bawu kotaka bufwidi samu na Sawule, samu na mwana ya yandi Yonatane mpe samu na bantu ya Yave, bantu ya Isayeli yina kufwaka na mvita. 13 Na manima, Davidi yufulaka na ntwenya yina natinaka yandi bansangu: «Nge ke muntu ya wapi kisika?» Yandi vutulaka: «Mu ke mwana ya mu-Amaleke, nzenza mosi yina kwizaka zinga na yinsi yayi.» 14 Davidi zabisaka yandi: «Wapi mutindu nge me tala ve boma na kulambula diboko ya nge, samu na kufwa ntinu yina Yave byekaka?» 15 Davidi bokilaka mosi na bisadi ya yandi mpe yandi tubaka na yandi: «Kwiza kufwa yandi!» Kisadi yina bulaka mu-Amaleke. Mpe mu-Amaleke yango kufwaka. 16 Davidi zabisaka yandi: «Nge ke na kufwa samu na yimbi ya nge mosi. Nge me funda nzutu ya nge, nge mosi na kutuba: “Ni munu me kufwa ntinu yina Yave byekaka.”»

Davidi yawulaka samu na lufwa ya Sawule mpe Yonatane

17 Na yina, Davidi yimbilaka mukunga yayi ya kyadi samu na lufwa ya Sawule mpe ya mwana ya yandi Yonatane. 18 Yandi tumisaka ti ba longisa yawu na bantu ya Yuda. Ya kele «Mukunga ya kyadi ya munani». Ya ke ya kusonama na Dibuku ya muntu ya kudedama.

19 Isayeli, bayina vwandaka sala nkembo ya nge me kufwa na zulu ya myongo!

Wapi mutindu binwani ya nge ya ngolo me kubwa?

20 Beno mwangisa ve nsangu yayi na mbanza Ngate.

Beno mwangisa yawu ve na banzila ya Asekelone.

Samu ti bakento ya ba-Filiseti kuyangalala ve.

Mpe samu ti bandumba ya bantu yina ba zengaka ve bubakala kudumuka ve na kilengi.

21 Beno, myongo ya Ngilebowa,

bika ti mvula mpe kinoko kubwidila dyaka beno ve.

Bika ti bilanga ya beno kupesa dyaka ve madya.

Samu ti ni kuna binwanunu ya beno yina ke kebaka ntulu talaka nsoni.

Ba ke banda na kupakulaka dyaka ve mafuta na kinwanunu ya Sawule yina ke kebaka ntulu.

22 Na kutangisa menga ya bambeni,

na kubasisa mafuta ya banzutu ya binwani ya ngolo,

munani ya Yonatane vwandaka vutuka manima ve.

Mbele ya Sawule mpe vwandaka basika ya mpamba ve.

23 Na luzingu nyonso ya bawu,

Sawule na Yonatane vwandaka ya kuzolakana,

mpe tii na lufwa ya bawu, bawu kabukaka ve.

Bawu vwandaka na mbangu kulutila bambemba.

Bawu vwandaka na ngolo kulutila bankosi.

24 Beno bakento ya Isayeli,

beno dila Sawule!

Yandi vwandaka lwatisa beno binkuti ya kitoko mpe ya ntalu.

Yandi vwandaka bongisa binkuti ya beno na bima ya wolo.

25 Wapi mutindu binwani ya ngolo me kubwa na kati ya mvita?

Wapi mutindu Yonatane me kufwa na zulu ya myongo?

26 Ntima ya munu ke na kutala mpasi samu na nge, Yonatane,

mpangi ya munu, nkundi ya munu ya ntima.

Luzolo ya nge samu na munu vwandaka mbote mingi kulutila luzolo ya bakento.

27 Wapi mutindu binwani ya ngolo me kufwa?

Wapi mutindu binwanunu ya mvita me bebana?

2 Samwele 2 ->