Dibuku ya zole yayi ya Bantinu ke na kutatamana na kuzonzila mambu ya bayinsi ya bintinu ya Yuda mpe ya Isayeli. Ba kabulaka dibuku ya Bantinu na mabuku zole. Mabuku nyonso zole ke na kuzonzila kinkulu ya bintinu ya Isayeli mpe ya Yuda.
Dibuku ya zole ya Bantinu ke na kuzonzila bantangu zole ya mfunu mingi. Yawu ke na kuzonzila ntete-ntete bantangu ya mansukina ya mumbikudi Eliya tii na mbwilu ya kintinu ya Isayeli, na mvula ya 722 tekila mbutukulu ya Yesu. (2Bt 1.1–17.41).
Na manima, dibuku ke na kuzonzila bantangu ya kintinu ya Ezekyase tii na mbwilu ya Yelusalemi na mvula 586 tekila mbutukulu ya Yesu. (2Bt 18.1–25.30).
Dibuku ya zole ya Bantinu ke na kulakisa beto samu na yinki ba mwangisaka yinsi ya Isayeli mpe yinsi ya Yuda. Ata ti mimbikudi vwandaka kebisa bantu bambala mingi, bantu ya yinsi mpe bantinu vwandaka manga na kulanda Nzambi. Mwangusulu ya Yelusalemi kele mosi na kati ya mambu ya mpasi ya kulutila na yina me tadila nongo ya luzingu ya bantu ya Nzambi. Ya ke ya kusonama: «Ni nkele ya Yave me sala ti, mambu yayi kukumina Yelusalemi.» (2Bt 24.20).
Dibuku yayi lenda kukabuka mutindu yayi:
- Nzambi sembaka Akazya. (2Bt 1.1-18).
- Eliya kwendaka na zulu mpe Elize yinganaka yandi na kisika ya yandi. (2Bt 2.1–8.15).
- Bantinu ya Isayeli mpe ya Yuda. (2Bt 8.16–16.20).
- Mbwilu ya Samaliya. (2Bt 17.1-41).
- Ezekyase ntinu ya Yuda. (2Bt 18.1–20.21).
- Manase na Amone, bantinu ya Yuda. (2Bt 21.1-26).
- Ntinu Yozyase tangaka dibuku ya Musiku ya Nzambi. (2Bt 22.1–23.30).
- Bantinu ya nsuka ya Yuda. (2Bt 23.31–24.20).
- Mbwilu ya Yelusalemi. (2Bt 25.1-30).
1
Nzambi sembaka Akazya
1 Na manima ya lufwa ya Akabe, bantu ya Mowabe balukilaka bantu ya Isayeli.
2 Kilumbu mosi, ntinu Akazya kubwaka na yisi, katuka na nela ya kivinga ya yandi ya kibandu, kuna na Samaliya. Yandi lwalaka mputa ya nene. Na yina, yandi fidisaka bantumwa, yandi tubaka na bawu: «Beno kwenda yufula Baale-Zebube, nzambi ya bantu ya Ekelone, samu na kuzaba kana mu ke vuuka na mpasi yayi.» 3 Kasi mbazi ya Yave tubaka na Eliya, mu-Tisebi: «Telama, kwenda bwabana bantumwa ya ntinu ya Samaliya, nge zabisa bawu: Na Isayeli, ya kele ve na Nzambi, samu ti beno kwenda yufula Baale-Zebube, nzambi ya bantu ya Ekelone? 4 Ni yawu yina, Yave ke na kutuba: Nge ke katuka ve na mfulu, kisika yina nge kele, kaka kufwa nge ke kufwa.»
Na manima, Eliya kwendaka. 5 Bantumwa vutukaka na sika ya Akazya mpe yandi yufulaka bawu: «Samu na yinki beno me vutuka?» 6 Bawu tubaka na ntinu: «Muntu mosi me kwiza bwabana beto mpe yandi me zabisa beto ti beno vutuka na sika ya ntinu yina me fidisa beno mpe beno zabisa yandi: “Yave ke na kutuba: na Isayeli, ya kele ve na Nzambi, samu ti nge fidisa bantumwa na kwenda yufula Baale-Zebube, nzambi ya bantu ya Ekelone? Ni yawu yina, nge ke katuka ve na mfulu, kisika yina nge kele, kaka kufwa nge ke kufwa!”» 7 Akazya yufulaka bawu: «muntu yina kwizaka bwabana beno mpe me zabisa beno mambu yayi, wapi mutindu yandi vwandaka?» 8 Bantumwa vutulaka na ntinu: «muntu yango vwandaka ya kulwata kinkuti ya mpusu ya kibulu mpe yandi vwandaka na mukaba ya mpusu ya kibulu na luketo.» Na yina, Akazya tubaka: «ya kele ni Eliya, mu-Tisebi!»
Akazya mekaka na kukangisa Eliya
9 Ntinu fidisaka mfumu ya binwani makumi tanu na binwani makumi tanu ya yandi. Mfumu ya binwani kwendaka kintwadi na binwani ya yandi na sika ya Eliya. Eliya vwandaka ya kuvwanda na nsongi ya mongo. Mfumu ya binwani tubaka na Eliya: «Muntu ya Nzambi, ntinu me tuba: Kulumuka!» 10 Eliya vutulaka na mfumu yina: «Kana ya tsyelika mu kele muntu ya Nzambi, bika ti tiya kukatuka na zulu, yawu kulumuka na kwiza yoka nge, nge na makumi tanu ya binwani ya nge.» Na yina, tiya katukaka na zulu mpe yawu yokaka mfumu yina na binwani ya yandi.
11 Ntinu fidisaka dyaka mfumu ya nkaka ya binwani makumi tanu na makumi tanu ya binwani ya yandi. Mfumu yango tubaka na Eliya: «Muntu ya Nzambi, ntinu me tuba: Kulumuka na nswalu!» 12 Eliya vutulaka: «Kana ya tsyelika mu kele muntu ya Nzambi, bika ti tiya kukatuka na zulu, yawu kulumuka na kwiza yoka nge, nge na makumi tanu ya binwani ya nge.» Na yina, tiya katukaka na zulu mpe yawu yokaka mfumu yina na binwani ya yandi.
13 Na mbala ya tatu, Akazya fidisaka dyaka mfumu ya nkaka ya binwani makumi tanu na binwani ya yandi. Mfumu yango ya tatu kwendaka na mongo na kisika yina Eliya vwandaka. Ntangu yandi kumaka kuna, yandi fukamaka na mantwala ya Eliya mpe yandi bondilaka yandi mutindu yayi: «Muntu ya Nzambi, mulemvo ya nge, kufwa beto ve, tala beto kyadi, munu na bisadi ya nge makumi tanu yayi. 14 Mu zaba ti tiya katukaka na zulu mpe yawu kulumukaka na kwiza yoka bamfumu zole ya ntete ya binwani na binwani ya bawu. Kasi ntangu yayi, kufwa munu ve, tala munu kyadi!» 15 Mbazi ya Yave tubaka na Eliya: «Kwenda na yandi mpe kuvwanda ve na boma ya yandi.»
«Eliya telamaka mpe kwendaka na mfumu ya binwani na sika ya ntinu.» 16 Na manima, Eliya tubaka na ntinu: «Yave ke na kutuba: “ya kele ve na Nzambi na Isayeli yina ba lenda kwenda yufula? Nge ti, nge me fidisa bantumwa na kwenda yufula Baale-Zebube, nzambi ya bantu ya Ekelone. Ni yawu yina, nge ke katuka ve na mfulu, kisika yina nge kele, kaka kufwa nge ke kufwa!”» 17 Akazya kufwaka, mutindu Yave tubaka yawu na yinwa ya Eliya. Akazya vwandaka ve na mwana. Ni mpangi ya yandi, Yolame, yalaka na kisika ya yandi. Yawu salamaka na mvula ya zole ya kintinu ya Yolame, mwana ya Yosafate, ntinu ya Yuda.
18 Mambu ya nkaka yina Akazya salaka, yawu kele ya kusonama na kati ya dibuku ya kinkulu ya bantinu ya Isayeli.
