Kuyɛi Zɑ̃ɑ 15

Amɑlekɑ ŋɑ do ijuukpɑ̃i ɑnkɑ̃ɑnyi

1 Si ɑnyii nŋu, ǹ yɛ nyindɑ ɡɔ mɑ́ lelei Aɔ̃, í lɑ́ nɔ í nɛ njo. Iyi ǹ yɛ wee, ɑmɑlekɑ mɛɛje ɡɔ ŋɑ ɑ̀ wɑɑ mu ijuukpɑ̃ mɛɛje. Aŋɑi ɑ̀ jɛ ijuukpɑ̃i ɑnkɑ̃ɑnyi domi si bɛi idɔɔkɔ̃i Ilɑɑɔ̃ ɑ́ tɑ̃.

2 Ŋɔi ǹ yɛ tenku ɡɔ wɑ dɑɑnɑ bɛi diɡi í yɔɡɛɛ do inɑ. Nɔ ǹ yɛ inɛ ŋɑ iyi ɑ̀ jɛ iŋɑi sɑkou iɡũ do mii iyi ɑ̀ ɡbeu [a] do lɑmbɑi iriɛ. Inɛ ŋɑu ɑ̀ wɑɑ leekĩ si ɑntɑi tenkuu ɑ̀ wɑɑ mu mɔɔlɔ ŋɑ iyi Ilɑɑɔ̃ í nɑ ŋɑ. 3 À wɑɑ kɔ̃ irii Moizi, woo ce icɛi Ilɑɑɔ̃u, do ti Anɡudɑ̃u [b], ɑ̀ wɑɑ ni,

Aɔ̃ Lɑfɛ̃ɛ, ilu ɡbuɡbɑ̃ fei,

Icɛɛ í lɑ, nɔ í jɛ mɑɑmɑɑke.

Awɔi ì jɛ ɑmɑnlui ilɛ fei.

Kpɑ̃ɑɛ í jɛ ntɔ, nɔ í jɛ dee dee.

4 Yooi kɑɑ ce njoɛ, Lɑfɛ̃ɛ.

Yooi ɑ́ kɔ ku sɑɑbu iriɛ.

Awɔ ɑkɑ̃i ì jɛ inɛ kumɑ́.

Inɛi ilɛ bɑɑ yoomɑ fei ɑ́ nɑɑ bi tɛɛ,

Aɑ nɑ ɑ ɡulɛ ɑ tɔɔɛ,

Domi ì nyisi iyi kiitiɛ í jɛ dee dee.

5 Si ɑnyii nŋu, iyi ǹ cɔ ilu nɔ ǹ yɛ ɑ̀ cĩ kpɑsɛ̃i Ilɑɑɔ̃ iyi í wɑ lele, tenɡi bii í jɛ bi kuwɑi ɑkɑbuuɛu. 6 Amɑlekɑ mɛɛje ŋɑ iyi ɑ̀ wɑɑ mu ijuukpɑ̃ mɛɛje ŋɑu ɑ̀ fitɑ hɑi kpɑsɛ̃u. À wɑɑ dɑsi nyɑu fũfũ iyi wɑ dɑɑnɑ nɔ ɑ̀ wɑɑ dĩ sɑntikii wurɑ si kpɑkɑ nŋɑ. 7 Ŋɔi inɛ ɑkɑ̃i mii ilu hunde mɛɛ ŋɑu í nɑ ɑmɑlekɑ mɛɛje ŋɑu fɑtɑi wurɑ ɑrɑ mɛɛje iyi í kɔ̃ do idɔɔkɔ̃i Ilɑɑɔ̃, nŋu iyi í wɛɛ hee do ɑjɔ fei. 8 Nɔ kpɑsɛ̃u í kɔ̃ do cuɑ iyi wɑ nɑɑ hɑi si ɑmboei Ilɑɑɔ̃ do ɡbuɡbɑ̃ɛ. Inɛ ɡɔ kɑɑ nɔ ku yɔkɔ ku lɔ si inɔɛ hee ijuukpɑ̃i ɑmɑlekɑ mɛɛje ŋɑu koo kpɑò iri.

<- Kuyɛi Zɑ̃ɑ 14 Kuyɛi Zɑ̃ɑ 16 ->