1 Wɑɑti bɛɛbɛ kukpɔi inɛ ŋɑ iyi ɑ̀ wɑɑ too kpɑ̃ɑi Jesuu wɑ kɔ̃ɔsi. Ŋɔi Zuifu ŋɑ iyi ɑ̀ yɑ fɔ Gɛrɛkiu ɑ̀ wɑɑ ɡbɑɡbɑ si Zuifu ɑlɑlɑ ŋɑu domi si ijɛ iyi ɑ̀ yɑ mɑɑ kpɛ̃ɑ jɑɑɔ̃ ŋɑ wɑɑti kɑ̃mɑ fei ɑ̀ yɑ mɑɑ ɡbɛjɛ jɑɑɔ̃ nŋɑ ŋɑi. 2 Ŋɔi woo bɛ mɑɑteeji ŋɑu ɑ̀ tɔtɔɔ inɛ ŋɑ iyi ɑ̀ wɑɑ too kpɑ̃ɑi Jesu ŋɑu fei ɑ̀ ni, kù sĩɑ kɑ jɔ̀ idei Ilɑɑɔ̃ ku wɑɑzo kɑ mɑɑ ce idei ijɛ ŋɑ. 3 Nɑ nŋu, iŋɛ kpɑɑsi nwɑ ŋɑ, i cicɑ ɑmɑnɛ mɛɛje si inɔ nŋɛ, inɛ ŋɑ iyi ɑ̀ wɑɑ jɛ nŋɑ sɛɛdɑ jiidɑ, iyi ɑ̀ kɔ̃ò Hundei Ilɑɑɔ̃ do bisi, nɔ kɑ kɑ̃ɑ nŋɑ icɛu. 4 Ammɑ ɑwɑ tɑkɑ nwɑ ɑɑ kɑ mɑɑ ce kutɔɔ nɔ kɑ mɑɑ wɑɑzo idei Ilɑɑɔ̃ wɑɑti kɑ̃mɑ fei. 5 Inɛ ŋɑu fei ɑ̀ jɛsi ideu. Ŋɔi ɑ̀ cicɑ Etiɛni iyi í kɔ̃ò Hundei Ilɑɑɔ̃ nɔ nɑɑnɛɛ í lɑ. Si ɑnyii nŋu nɔ ɑ̀ cicɑ Filipu, do Pokɔɔ, do Nikɑnɔɔ, do Timɔɔ, do Pɑmenɑsi, do Nikolɑ inɛi Antiɔsi iyi í too kucei Zuifu ŋɑ wo í bɛi í nɑ í dɑsi Jesu nɑɑnɛu. 6 Ŋɔi ɑ̀ bɔò ŋɑ bi woo bɛ ŋɑu. Nɔ woo bɛ ŋɑu ɑ̀ ce kutɔɔ ɑ̀ le nŋɑ ɑwɔ si iri ku bɑ ɑ sintiò icɛ.

7 Bɛɛbɛ mɔi idei Ilɑɑɔ̃ í fɑnɡɑɑ wɑ koo nɔ kukpɔi inɛ ŋɑ iyi ɑ̀ wɑɑ too kpɑ̃ɑi Jesuu í kɔ̃ɔsi wɑ koo si ilui Zeruzɑlɛmu, nɔ woo weei Ilɑɑɔ̃ nkpɔ í dɑsi nɑɑnɛ.

8 Wee Etiɛni í nɛ ɡbuɡbɑ̃ ntɔ ntɔ nɔ Ilɑɑɔ̃ í ceɑɑ didɔ̃ nɔ í ce mɑɑmɑɑke do nyindɑ nlɑ ɡɔ ŋɑ si ɑninii inɛ ŋɑ. 9 Ammɑ inɛ ɡɔ ŋɑ ɑ̀ bɑ Etiɛni kɑkɔɔ ku ce. Inɛ ŋɑu ɡɔɡɔ ŋɑ hɑi ilɛi Silisii ɑ̀ nɑɑ do hɑi ilɛi Azii, ɡɔɡɔ ŋɑ mɔ inɛi Sirɛni ŋɑi do Alesɑndiri, ɑŋɑi ɑ̀ jɛ inɛi iɡbɛi Zuifu ɡɔ ŋɑ iyi ɑ̀ yɑ kpe ɑru ŋɑ iyi ɑ̀ jɔ̀. 10 Ammɑ ɑ kù nɔɔ domi wɑ fɔ idei do bisi do ɡbuɡbɑ̃i Hundei Ilɑɑɔ̃. 11 Ŋɔi ɑ̀ muɑ mɔkɔ ɡɔ ŋɑ fiɑ si ɑsii ku bɑ ɑ mɑ́ɑ ide. Nɔ inɛ ŋɑ iyi ɑ̀ muɑɑ fiɑ ŋɑu ɑ̀ sɔ̃ inɛ ŋɑ ɑ̀ ni ɑ̀ ɡbɔ inɛɛu ihɛ̃ wɑ fɔ lɑɑlɔi Moizi do Ilɑɑɔ̃. 12 Bɛɛbɛi ɑ̀ dedeò idɔɔkɔ̃i inɛ ŋɑ, do inɛ nɡbo ŋɑ do woo kɔ inɛ ŋɑ si woodɑ ŋɑ. À sɛkɛɛ si Etiɛni nɔ ɑ̀ muu ɑ̀ bɔòɛ si wɑjui iɡbɛi woo kiiti ŋɑu. 13 Si ɑnyiɛ ŋɔi ɑ̀ nɑɑò mɔkɔ ɡɔ ŋɑ wɑ iyi ɑ̀ nɑɑ ɑ̀ mɑ́ɑ ide ɑ̀ ni, inɛɛu ihɛ̃ wɑɑti kɑ̃mɑ fei í yɑ mɑɑ fɔ lɑɑlɔi kpɑsɛ̃i Ilɑɑɔ̃u do woodɑi Moizi. 14 À ɡbɔ iyi í fɔ í ni Jesu inɛi Nɑzɑrɛtiu ɑ́ lɛɡɛ kpɑsɛ̃u ihɛ̃ nɔ ku kpɑɑsi dedembɑ ŋɑ iyi Moizi í sɔ̃ wɑ fei. 15 Inɛ ŋɑ iyi ɑ̀ wɑ si iɡbɛu fei ɑ̀ kɑ̃si Etiɛni iju ŋɔi ɑ̀ yɛ wɑjuɛ wɑ dɑɑnɑ bɛi wɑjui ɑmɑlekɑ.

<- Woo Bɛ Ŋɑ 5Woo Bɛ Ŋɑ 7 ->